Sulšečenjo kónc tydźenja syły wopytowarjow pohosćili a zabawjeli
Sulšecy (SN/mwe). W delnich Sulšecach wotměwaše so kónc tydźenja tradicionalny wjesny swjedźeń, na kotrymž móžachu wot pjatka do wčerawšeho při najrjeńšim lěćnym wjedrje syły hosći wšěch generacijow ze wsy, ze susodnych wsow, Wojerec, ale tež z Budyskich a Kamjenskich kónčin witać. Přihotowali su čłonojo młodźinskeho kluba „Halštrowska młodźina“ wokoło jeho nawody Feliksa Šěna, wohnjowi wobornicy a mnozy dalši rjenje wupyšene swjedźenišćo na sportnišću, hdźež so wubědźowanja a programy wotměwachu. Kaž w zašłych znajmjeńša 20 lětach měješe wšitke wotežki wokoło za mału wjes wulkeho podawka wjesny předstejićel Jurij Brösan w horšći. Na kóncu steješe „prěni muž“ wčera nawječor we wulkim zakónčacym programje swjedźenja sam w srjedźišću zabawy. Wšako bě so z nim moderator Matthias Fröhlich z Kulowa sadźił, zo měli w běhu třištwórć hodźiny znajmjeńša dwanaće a poł pora – žony a mužojo – w typiskej bayerskej drasće na jewišću stać.