Krótkopowěsće (30.12.16)
Tilich za lěpše mjeno Sakskeje
Drježdźany. Sakski ministerski prezident Stanisław Tilich (CDU) so nadźija, zo swobodny stat po namócnosćach přećiwo wukrajnikam a prawicarskich krawalach swoje mjeno poněčim zaso polěpši. Dopóznaće, zo bě „wohidna mjeńšina“ dobre mjeno kraja do błóta steptała, je jemu „hórke dopóznaće lěta 2016“, rjekny Tilich powěsćerni dpa.
Nadźijeja so polěpšenja
Drježdźany. Plahowarjo dejkow so nadźijeja, zo so połoženje na mlokowych wikach klětu polěpši. „2016 bě plahowarjam dejkow najćeše lěto po přewróće“, praješe hłowny jednaćel krajneho zwjazka ratarjow, Manfred Uhlemann nowinarjam. Mnohe zawody běchu w swojej eksistency wohrožene, dokelž „je mlokowa kriza njewšědnje dołho trała“.
Wosada za hłuchich
Krótkopowěsće (29.12.16)
Tójšto dźiwiny třělili
Dubrjenk. Hońtwjerske drustwo Dubrjenk přewjedźe wčera pod nawodom dr. Pětra Brězana ze Sulšec pola Kulowa – wotnajerja tamnišich lěsow – 26. hońtwu mjez hodami a Nowym lětom. Wobdźěliło je so 44 honjerjow a 42 hońtwjerjow, telko kaž hišće ženje do toho. Tež ličbu třělenych kruchow dźiwiny njejsu minjene 25 lět w Dubrjenku hišće měli. Wčera ležachu tam dwě jelenicy, dwanaće dźiwich swini a jedna liška.
Škitne naprawy dale polěpšić
Drježdźany. Sakska je lětsa 178 milionow eurow za škitne naprawy přećiwo wulkej wodźe nałožiła. Wudali su pjenjezy za twarske objekty w srjedźnej Sakskej a Rudnych horinach, kaž minister za wobswět Thomas Schmidt (CDU) zdźěli. Klětu planuja runje telko spěchowanskich srědkow. Potom chcedźa mjez druhim nasypy podłu rěki Čorneho Halštrowa ponowić.
Něšto mjenje nadpadow
Wiesbaden. Ličba nadpadow na domy požadarjow azyla je lětsa snadnje woteběrała. Kaž Zwjazkowy kriminalny zarjad informuje, su hač do 27. decembra 921 njeskutkow zličili. Loni bě jich 1 031. We 867 padach je policija prawicarskoekstremistiski pozadk zwěsćiła.
Tež ćěkancy mjez akterami byli
Po zwěrjencu so wodźić dali
Wojerecy (SN/mwe). Najebać špatne wjedro je wutoru něhdźe połsta zajimcow, mjez nimi tójšto swójbow, na hodowne wodźenje po Wojerowskim zwěrjencu přišło. „Tule rjanu tradiciju mnozy něhdyši Wojerowčenjo, kotřiž w cuzbje bydla a swjate dny doma přebywaja, skomdźić nochcedźa.“ To rjekny Silke Kühn, coologiska šulska pedagogowka. „Mnozy chcedźa wědźeć, što je so w zašłosći pola nas změniło.“ Tak móžeše wona wćipnym připosłucharjam powědać, zo su w minjenych tydźenjach zwěrjencowy hat dospołnje ponowili a znowa wobsadźili. Wopicy dóstachu nowu čumpjel darjenu a dalše zwěrjata nowe hěty. Wo tajke móžnosće so tež darićeljo z města staraja. Wobdźiwać móžachu hosćo nimo připrawow ponowjene hrajkanišćo. Zańdźene lěta su we Wojerowskim zwěrjencu tójšto zwoprawdźili, štož mjenuja „kroki po puću k geocowej“.
Silke Kühn so wjeseli, zo su Wojerowčenjo ze swojim zwěrjencom zwjazani, zo pak „je wón tež turistam w jězorinje přeco dobra adresa za wopyt a rjane dožiwjenje. Někotryžkuli z hosći je tu hižo jako dźěćo na kozy sedźał a nětko činja to wnučki.“
Pacientam maćeršćina wažna
Chorownja swj. Jana so wobstajnje prócuje serbskich hladarjow zasadźeć
Kamjenc (SN/mwe). Lětsa je w Kamjenskej chorowni maltezow swj. Jana dźewjeć młodostnych swoje wukubłanje jako strowotniski a hladar chorych zahajiło. Přichodne tři lěta budu woni w nutřkownej medicinje, w chirurgiji a gyne- kologiji/porodowej pomocy kaž tež w intensiwnej medicinje chorownje swoje nazhonjenja zběrać móc. Zdobom změja tež eksterne zasadźenja we wokolnych hojernjach.
Dokelž je mjez pacientami wjele Serbow, prócuje so chorownja maltezow swj. Jana wo to, tež serbskorěčny dorost zdobyć. Lětsa so to bohužel radźiło njeje. Kaž Ines Eifler, zamołwita kliniki za nowinarske dźěło, na naprašowanje Serbskich Nowin zdźěli, „mjez wukubłacymi w prěnim lěće tónkróć žani Serbja njejsu. W třećim wukubłanskim lěće mamy wjacorych wukubłacych ze serbskimi korjenjemi. Kaž po cyłej Sakskej je tež pola nas ličba přizjewjenjow woteběrała. Bychmy sej wjace požadarjow přeli, radlubje tež ze serbskim pozadkom.“
Policija (29.12.16)
Rubizna so njezadaniła
Biskopicy. Mólička rubizna je wuslědk njeskutka w nocy na wutoru w Großdrebnitzu pola Biskopic. Tam běchu so njeznaći přez njezamknjene wokno do zawoda zadobyli. Nadźijejo so wulkeje rubizny pokradnychu hnydom cyłu kasu. W njej wšak bě jenož 2,50 eurow. Wěcna škoda, kotraž předewzaću nasta, wučinja porno tomu 1 000 eurow.
Paduši zwrěšćili
Kamjenc. Hodowne swjate dny chcychu so njeznaći w Kamjencu do rumnosćow zawoda pod Šibjeńcu zadobyć. Poradźiło pak so jim to njeje. Wěcnu škodu na durjach kaž tež na woknje trochuja tohorunja na něhdźe 1 000 eurow.
Mysla na hody
Z taflemi wo stawiznach informować
Informaciska tafla dopomina přichodnje na lěta 1872 natwarjenu a dźensa pod pomnikoškitom stejacu škleńčernju „Gelsdorfhütte“. Taflu su tydźenja w Běłej Wodźe wotkryli.
Běła Woda (AK/SN). „Tu započachu so stawizny města, stawizny industrijneje produkcije škleńcy. Hětownja Wilhelma Gelsdorfa bě Běłowodźanska prěnja škleńčernja“, podšmórny Karl-Heinz Melcher, předsyda čestnohamtskeje pomnikoweje komisije města. Dotal je komisija tři tajke informaciske tafle wotkryła.
Po wobstajnym dešćowanju wčera a zawčerawšim bě we łužiskich ...
Krótkopowěsće (28.12.16)
Zapalerjo zajeći
Budyšin. Po pospytanym zapalerstwje při přebywarni požadarjow azyla w Budyšinje před tydźenjomaj je policija třoch podhladnych zajała. Mužojo w starobje 19 do 23 lět buchu hižo 23. decembra zajeći a sedźa wot toho časa w přepytowanskej jatbje, kaž rěčnica policije zdźěli. Woni běchu w nocy na 13. december z bencinom pjelnjene a zapalene bleše na dom mjetali. Na zbožo njeje k žanej škodźe dóšło.
Dulig namołwja předewzaća
Drježdźany. Sakski hospodarski minister Martin Dulig (SPD) předewzaća w kraju namołwja, so na zasadne změny w awtowej branši na dobro elektromobility nastajić. Němska awtoindustrija je wuwiće minjene lěta „trochu zaspała“, rjekny Dulig powěsćerni dpa. Nětko pak wobkedźbuje wón wulku dynamiku, na kotrejž měła so tež Sakska wobdźělić.
Hrajki zběrali
Drježdźany. Wobradźenje dale dźe: Mnozy wobydlerjo Drježdźan su wčera we wobłuku zběranskeje akcije trjebane abo nowe hrajki jako hodowny dar za dźěći z potrěbnych swójbow znosyli. Drježdźanske wobchadne zawody přewostajichu za to cyły bus, hdźež móžachu ludźo hrajki wotedać.
