Znowa su so wčera w Róžeńće zetkali dobrowólni, kotřiž chcedźa internetnu stronu srjedźoeuropskich putniskich městnow aktualizować a pućowanske šćežki na teritoriju gmejny wutworić. A bohužel bě jich znowa jenož horstka ludźi. Za to pak běchu jich ideje ćim zrališe a konkretniše hač prěni raz.
Róžant (JK/SN). Móžne pućowanske šćežki na teritoriju gmejny Ralbicy-Róžant měli so w třoch kategorijach wutworić, zo bychu rozdźělnym zajimam a narokam pućowacych wotpowědowali. Su to ryzy pućowanske šćežki za pěšich, kolesowanske šćežki a naročne za ekstremnych kolesowarjow z BMX-kolesami, za kotrychž su w gmejnje wotpowědne přirodne wuměnjenja date.