Jězdźidło zymskeje słužby wupadnje
Prěni zymski swjedźeń w Strowotnej studni
Budyšin (CS/SN). Na Naměsće přećelstwa ludow w Budyskej měšćanskej štwórći Strowotna studnja wotměwa so wot wčerawšeho prěni raz zymski swjedźeń. Hač do njedźele maja we wutepjenym stanje dźěćace skupiny, towarstwo Swětłownja Majak kaž tež hwězdni spěwarjo Carity swój wustup, kotryž je stajnje w 14.30 hodź. K zakónčenju přewjedu njedźelu wot 16.30 hodź. lampionowy ćah pod přewodom młodźinskeho dujerskeho orchestra. Naměsto chcedźa tón dźeń ze swěčkami a heliumowymi balonami wupyšić, a klankodźiwadźelnica Valeiya Pierstorf předstaji hru „Buratino“.
Na wšitkich dnjach móžeš sej horce wino, słódčizny abo tež praženu kołbasku słodźeć dać. Wo to staraja so hosćencar Manfred Lüdtke kaž tež Heischec předewzaće z Bórka a Budyske Wjenkec rěznistwo. Předewzaći GAIA a Budyska bydlenjotwarska towaršnosć jako wulkej přenajerjej bydlenjow w Strowotnej studni zymski swjedźeń organizujetej. Stan je dźěłaćerski samaritanski zwjazk přewostajił a Serbski ludowy ansambl jewišćo.
Policija (05.01.17)
Pytaja swědkow
Smjerdźaca. K wobchadnemu njezbožu, kotrež je so zawčerawšim na dróze mjez Smjerdźacej a Němskimi Pazlicami stało, pyta policija swědkow. Krótko po 15.30 hodź. bě wodźer VW Golfa po wšěm zdaću tak daloko nalěwo jěł, zo dyrbješe so napřećo jěduca 22lětna šoferka VWja Polo wuwinyć. Při tym zajědźe wona přez kromu jězdnje, zhubi kontrolu nad wodźidłom a suny so z awtom na lěwym boku puća do přirowa. Na zbožo so młoda žona njezrani, na jeje jězdźidle pak nasta 5 000 eurow škody. Wodźer tamneho awta so zhubi. Štóž je njezbožo wobkedźbował abo móže pokiwy k wodźerjej Golfa dać, njech přizjewi so pod telefonowym čisłom 03578/ 35 20.
Nimale milion eurow za hród
Pod pomnikoškitom stejacy Wojerowski hród dyrbja nuznje ponowić. Za to wotzamknje město nad Čornym Halštrowom zrěčenje ze zwěrjencowej, kulturnej a kubłanskej towaršnosću.
Wojerecy (AK/SN). 983 000 eurow ma saněrowanje Wojerowskeho hrodu płaćić. Město liči ze spěchowanskimi srědkami z programa měšćanski přetwar wuchod. Z njeho nadźijeja so 85 procentow spěchowanja, štož by 835 000 eurow było. Nošer twarskeje naprawy ma zwěrjencowa, kulturna a kubłanska towaršnosć być, kotraž stara so wo muzej na hrodźe. Jeje podźěl by 15 procentow wučinjał, potajkim něhdźe 48 000 eurow.
Zapósłanc nitki spletł
Krótkopowěsće (05.01.17)
Mjenje zrěčenjow
Budyšin. 98 žonow a 270 muži je loni wukubłanske zrěčenje w rjemjeslniskich zawodach Budyskeho wokrjesa podpisało. Přirunujo z lětom 2015 pak je so ličba pomjeńšiła. To bě jich hišće 433, kaž wozjewi dźensa rjemjeslniska komora Drježdźany. W Zhorjelskim wokrjesu wosta ličba 261 podpisanych wukubłanskich zrěčenjow konstantna.
Lěwica z rekordom
Drježdźany. Cyłkownje 328 nowych sobustawow móžeše sakski krajny zwjazk Lěwicy minjene lěto witać. To je rekord. Najmłóši sobustaw bě za čas zastupa 16, najstarši 68 lět. Přiwšěm je 394 ludźi stronu předewšěm starobnych přičin dla wopušćiło. Pjeć procentow wustupjenych pak mjenowaše politiske wusměrjenje jako přičinu.
Wjace mzdy dóstali
Berlin. Tarifowe mzdy wučomnikow su po wuhódnoćenju zwjazkoweho instituta za powołanske kubłanje w lěće 2016 znowa stupali. Tak dóstachu wučomnicy na zapadźe Němskeje přez cyły wukubłanski čas brutto měsačnje přerěznje 859 eurow. Na wuchodźe Němskeje je so tarif wo 4,9 procentow zwyšił. Tu dóstachu młodostni přerěznje 807 eurow bruttomzdy na měsac.
Freund dale njeskaka
Miliony za wokrjesne dróhi
Wokrjes Budyšin chce lětsa wjacore dróhi zdźěla abo dospołnje ponowić a někotre twarske naprawy dokónčić. Tež serbske wsy z naprawow za nimale dwucyfrowu milionowu ličbu profituja.
Budyšin (SN/JaW). Nimale dźesać milionow eurow chce wokrjes Budyšin lětsa za zwuporjedźenje a wutwar dróhow nałožić. Z toho maja tež serbske a dwurěčne komuny profitować, wobkrući našemu wječornikej na naprašowanje sobudźěłaćerka wotrjada za zjawnostne a nowinske dźěło Budyskeho krajnoradneho zarjada Sabine Rötschke.
Tak chce wokrjes za něhdźe 1,3 miliony eurow wjacore puće z bitumenom znowa pokryć. 380 000 eurow wuda mjez druhim za dróhu přez Zdźěr, kotruž započnu najzašo w aprylu ponowjeć. 20 000 eurow wjace ma předwidźane za ponowjenje powjercha dróhi ze Šunowa do delnich Sulšec. Twarske dźěła su za junij a julij planowane. Za čas ponowjenja měli so wobydlerjo na poćeženja a móžne wobjězdki nastajić. W samsnym času chcedźa tež dróhu mjez Sepicami (Schwepnitz) a Zelenej Hrabowku (Grüngräbchen) za 130 000 eurow znowa asfaltěrować.
Krótkopowěsće (04.01.17)
Młodźina zaso hudźi
Zły Komorow. Lětuše wubědźowanje „Młodźina hudźi“ w regionje Braniborska-juh budźe wot 12. do 14. januara w Złym Komorowje. 377 wobdźělnikow je so za nje přizjewiło. Wučerjo kaž tež nawodźa hudźbnych šulow, orchestrowi hudźbnicy a profesorojo chcedźa jich wukony posudźować.
Załožba dale inwestuje
Mužakow. Do kupanskeho parka w Mužakowje chce Pücklerowa załožba lětsa něhdźe 2,5 milionow eurow inwestować. Nastać maja tam bydlenja. Za wilu Bellevue chcedźa 1,8 milionow eurow nałožić. Tež saněrowanje kupanskeho domu słuša do twarskich předewzaćow Pückleroweje załožby. Wot meje ma Mužakowska lěsna železnica hač do kupanskeho parka jězdźić.
Wuhotuja hłownu přehladku
Drježdźany. Němski hygienowy muzej w Drježdźanach wuhotuje 4. saksku krajnu přehladku na temu industrijna kultura w lěće 2020. Sakska ministerka za wuměłstwo dr. Eva-Maria Stange (SPD) je muzej dźensa jako nošerja hłowneje wustajeńcy pomjenowała. Swobodny stat spěchuje přewjedźenje 4. sakskeje wustajeńcy a přidatne přehladki hač do lěta 2021 z 5,8 milionami eurow.
Kónc za Spahića
Policija (04.01.17)
Rumpodich drje přemało wobradźił
Kinspork. Po wšěm zdaću njespokojom ze swojimi hodownymi darami běštaj mužej w Kinsporku. Zawčerawšim informowachu swědcy policiju, zo běštaj wonaj z kupnicy 37 taflow šokolody spakosćiłoj a z awtom ćeknyłoj. Zastojnicy jězdźidło pozdźišo na zwjazkowej dróze B 97 zadźeržachu a muži w starobje 35 a 29 lět kontrolowachu. Při tym njenamakachu jenož mjenowane šokolody, ale tež dalše słódčizny w hódnoće něhdźe 200 eurow. Dźěl z toho pochadźeše z padustwa samsny dźeń w dalšej Kinsporskej kupnicy. Policija paduchow nachwilnje zaja.
Drogi brał a znjezbožił
Biskopicy. Z dotal njeznatych přičin je póndźelu wječor 36lětny wodźer awta Subaru w Biskopicach na prawym boku jězdnje do dweju płotow zrazył a na to ćeknył. Dźakowano pokiwej swědka lepichu muža na to na bliskim parkowanišću. Při kontroli zwěsćichu, zo steješe wón pod wliwom amfetaminow. Tuž jeho k wotedaću kreje přewodźachu.
Mjenje dołha wopłóčkow dla
Kulow (AK/SN). Wopłóčkowy zawod města Kulowa je w lěće 2015 derje hospodarił. „Z našeho wotličenja wuchadźa dobytk 70 000 eurow. Lěto do toho mějachmy hišće deficit 24 000 eurow“, rozłoži Jurij Brösan, nawoda wopłóčkoweho zawoda, na zašłym posedźenju Kulowskeje měšćanskeje rady. Po jeho słowach mějachu 1,194 milionow eurow dochodow a 1,124 milionow eurow wudawkow.
„Njemějachmy žane wjetše inwesticije. Dyrbjachmy jeničce někotre klumpy wuměnić“, rjekny Brösan. W lětomaj 2018 a 2019 budźe tomu hinak. Potom dyrbja wjetši dźěl klumpow ponowić. Wina na tym pak su zdźěla tež wobydlerjo, kotřiž často wěcy do nuznika mjetaja, kotrež w nim ničo pytać nimaja. Za to wopłóčkowe připrawy prosće twarjene njejsu. Tohodla apelowaše Brösan na posedźenju radźićelow na sobuzamołwitosć wobydlerjow we wšitkich přizamknjenych domjacnosćach.
