Slepo ma so wažne křižnišćo stać

srjeda, 08. januara 2020
artikl hódnoćić
(0 )

Slepo (AK/SN). Po Hórce pola Niskeje ma so nětko tež Slepo z wažnym křižnišćom stać, kotrež bus a železnicu zwjazuje. K tomu je so wčera Slepjanska gmejnska rada wuznała. Na swojim prěnim wuradźowanju lěta 2020 je gremij z wjetšinu wobzamknył, podać planowanja za tak mjenowane „zwiskowe stejnišćo bus-železnica“. Nadawk přewozmje Zhorjelski inženjerski běrow Richter & Kaup. Z wobzamknjenjom sćěhuje gmejnska rada poručenje Zhorjelskeho wokrjesa a zaměroweho wobchadneho zwjazka Hornja Łužica-Delnja Šleska (ZVON).

„Z naprawu chcetej wokrjes a ZVON wobchadnu infrastrukturu polěpšić“, zdźěli nawoda zarjada za planowanje, twarstwo a hórnistwo w zarjadniskim zwjazku Slepo Steffen Seidlich. Nastać maja tuž w Slepom hač do tři busowe zastanišća, zawróćenske městnosće za jězdźidła a čakanske wobłuki. ZVON mysličku podpěruje. Twarske kóšty wučinjeja po prěnich wobličenjach něhdźe 405 000 eurow. Z nich přewozmu Krajny zarjad za dróhotwar a wobchad (LASuV) 75 procentow, ZVON 20 procentow a gmejna pjeć procentow. Jako městnosć faworizuje komuna swójsku ležownosć za dene­rowym imbisom. Dalša móžnosć by komunalna ležownosć při bywšim młynje była. Konkretne wobličenje kóštow maja po słowach Seidlicha ZVONej za dalše planowanje zapodać.

Planowanja pak wuwabjeja tež kritiske přispomnjenja. Radźićelka Yvonne Sergon (Lěwica) žada sej na přikład město natwara małeho busoweho dwórnišća w Slepom najprjedy raz wobsahowe polěpšenje zjawneho bliskowobchada. Po jeje słowach „njeje płaćizna 4,60 eurow za jednu jězbu ze Slepoho do Běłeje Wody přicpějomna, a busowe dwórnišćo tež woprawdźe trěbne njeje“. Tohodla wona jako radźićelka kaž tež wobydlerka planowane křižnišćo bus-železnica wotpokazuje. Zdobom skedźbnja Sergon na ćežke pjenježne połoženje komuny, kotraž je w konsolidaciji hospodarskeho plana. Ingo Herschmann (njestronjan) pak ma křižnišćo za šansu a stopnjowanje hódnoty tamnišeho dwórnišća, Jörg Funda (CDU) tohorunja. Wjesnjanosta Reinhard Bork (CDU) nadźija so a wočakuje pod­pěru za předewzaće­ we wobłuku strukturneje změny.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND