W Nukničanskej Brězanec bróžni wočakuja zaso wulki hołk a tołk
Nuknica (SN/mwe). „Sioux tepi bozanku“ rěka program 22. jolka-swjedźenja sobotu w Nuknicy. Pod nawodom Michała Cyža su do njeho muski a dźěćacy chór, žónska skupina, SG Sněhowka a nic naposledk kapała SerBeat zapřijate. Wězo změje braška Marko Jurk z Prawoćic, kaž wot wšeho spočatka, zaso moderaciju na starosći. A dźakowni organizatorojo su, zo jim ratar Józef Brězan znowa swoju bróžnju přewostaji.
Něhdźe dźesać tydźenjow je so wosebity gremij wokoło Jakuba Brězana, Feliksa Woka, Katrin Matkec a dalšich ze spěwami, skečemi a rejemi zaběrał. Njeje dźě lochko kóžde lěto program na porjadnym niwowje zestajeć, sej směški a pryzle wo regionalnych a nadregionalnych podawkach wumyslić. To rěka, zo chcedźa tež zaso wěstych ludźi na cyle wosebite a zwučene „Nukničanske wašnje pošwikać“.