Lětsa žane chodojty a žane meje

srjeda, 22. apryla 2020
artikl hódnoćić
(0 )
Zjawne chodojtypalenje je mjeztym nimale wšudźe wotprajene. Tež w Pančicach-Kukowje žane njebudźe. Dokelž pak su tam hižo wulku hromadu nawozyli, dyrbi ju gmejna zaso zrumować. Foto: Marian Wjeńka Zjawne chodojtypalenje je mjeztym nimale wšudźe wotprajene. Tež w Pančicach-Kukowje žane njebudźe. Dokelž pak su tam hižo wulku hromadu nawozyli, dyrbi ju gmejna zaso zrumować. Foto: Marian Wjeńka

Mjez najwšelakorišimi zarjadowanjemi, kotrež so lětsa z woporom koronapandemije stanu, je nětko tež chodojtypalenje. Mjez Žuricami, Šunowom, ­Jaworu a Prawoćicami runje tak žane meje stajeć njesmědźa.

Pančicy-Kukow (SN/MWj). W pjeć gmejnach zarjadniskeho zwjazka Při Kló­šterskej wodźe so lětsa žane zjawne chodojtypalenje njewotměje. Na to su so wčera předsyda zarjadniskeho zwjazka Měrko Domaška a pjeć wjesnjanostow dojednali. Dołho běchu so wobydlerjo nadźijeli, zo móža woblubowany nałožk tola hišće na někajke wašnje přewjesć, a přede­wšěm swoje hałzy po nalětnim wurězanju na jednore wašnje wotbyć. „Nimo chodojtypalenja lětsa tež žane mejestajenje njebudźe“, praji Měrko ­Domaška na naprašowanje Serbskich Nowin.

Nadźiju mějachu hač do kónca tohorunja w Kulowje, Rakecach, Radworju a druhdźe. Tež tam su z rozsudom dołho čakali, ale tam je nětko runje tak wšitko wotprajene. W Njeswačidle běchu porno tomu hižo spočatk apryla rozsudźili, zo žane chodojty njepala. Hodźijske centralne chodojtypalenje z programom je tohorunja wotprajene.

A što činja wobydlerjo nětko ze swo­jimi hałzami, kotrež su hewak kóžde lěto na wulke hromady zwozyli? Na terenje zarjadniskeho zwjazka je zasadnje dowolene, zo směš z małym lěhwowym wohenjom hač do přeměra połdra metra na swójskej ležownosći swoje hałzy spalić, dołhož nikoho njepoćežuješ. Za njón ani dowolnosć njetrjebaš. Dale móžeš hałzy na kompostowych městnach wotbyć, kotrež su we wotpadkowym kalendru Budyskeho wokrjesa zapisane. Něchtóžkuli ma tež wotpowědnu mašinu doma, z kotrejž hałzy rozkuskuje a na přikład w kwětkowych rabatach rozdźěli.

Zajimawu alternatiwu poskića Njebjelčanska gmejna. Na terenje jeje komunalneho twarskeho zawoda móža wobydlerjo swoje hałzy hač do přeměra dźesać centimetrow na małe kuski rozrězać dać. Přiwjezć móža je zajutřišim, pjatk, wot 15 do 18 hodź. a sobotu, 25. apryla, wot 9 do 13 hodź., gmejna informuje.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND