Přetwar w časowym planje

póndźela, 20. apryla 2020
artikl hódnoćić
(0 )
Mjeztym zo je so w bywšej kupnicy nutřka hižo wjele změniło, twarja wonka betonowu platu, zo móhli zawěsćenski běrow rozšěrić.  Foto: Marian Wjeńka Mjeztym zo je so w bywšej kupnicy nutřka hižo wjele změniło, twarja wonka betonowu platu, zo móhli zawěsćenski běrow rozšěrić. Foto: Marian Wjeńka

Mnohich Worklečanow zajimuje, kak z bywšeje wjesneje kupnicy dnjowa hladarnja za starych ludźi nastawa. Někotři su tam samo hižo po twarnišću dundali, štož pak njeje dowolene. SN su so wo aktualnym stawje wobhonili.

Worklecy (SN/MWj). Na twarnišćach je přistup zakazany. To płaći tež za bywšu Worklečansku kupnicu. Dokelž pak někotrehožkuli wjesnjana zajimowaše, kajke tam nětko wupada, dyrbješe mějićel Carsten Šnajder twarski płót wokoło swojeho objekta stajić, zo njeby k njezbožam dóšło. Serbske Nowiny pak smědźachu so takrjec oficialnje rozhladować.

Wonkownje jako prěnje napadnje, zo su so wjacore štomy na ležownosći zhubili. „Te běchu na puću, dokelž ma so tam přizamknjenje pitneje wody kłasć. Nimo toho planuju na třěše fotowoltaisku připrawu, kotraž by hewak w chłódku štomow była“, zawěsćenski markler rozłoži. Před jeho běrowom nastawa tuchwilu betonowa plata, na kotrejž ma so zawěsćenski běrow rozšěrić.

Hdźež su w předawarni něhdy kołbasu, butru, muku a dalše twory wšědneje potrjeby předawali, maš dźensa ćeže, stare struktury twarjenja spóznać. Tu je tójšto nowych sćěnow nastało, dalše su so zminyli, někotre durje buchu zamurjowane, druhe su k tomu přišli. Carsten Šnajder rozkładźe, hdźe budu wulka přebywarnja, terapeutiske a wotpočowanske rumnosće, kuchnja, sanitarne rumnosće, běrow atd. Cyłkowny zakładny rys domu je mjeztym tajki, kaž budźe wón za hladarnju starych ludźi trěbny. Dokelž dyrbjachu dotal w zawěsćenskim běrowje dale tepić, njemóžachu stare tepjenje hišće wutorhać. Tež to pak so přichodne dny stanje, tak zo móža potom nowe instalować započeć. Cyłkownje su z přetwarom w planje, a Worklečan sej wězo přeje, zo tomu tež přichodne měsacy tak wostanje. Potom móhli w nowej hladarni 1. februara 2021 dźěłać započeć.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND