Sprawnje spěchować njeje lochko
Rakečanska gmejnska rada je na swojim zašłym posedźenju podpěru wjesnym towarstwam wobzamknyła.
Rakecy (JK/SN). Po spřisahanju třoch radźićelow, kotřiž njemóžachu so na konstituowacym posedźenju w awgusće wobdźělić, móžeše Rakečanska gmejnska rada minjenu srjedu ze swojim wobšěrnym dnjowym porjadom pokročować.
Najwažniši dypk při tym bě diskusija wo rozprawje pruwowanskeje firmy k zahajenskej bilancy gmejny k 1. januarej 2013. Pruwowanje na městnje kaž tež eksterne bě gmejna derje wobstała, a hač na někotre kritiske přispomnjenja pruwowanskeje firmy a pokiwy zličbowanskeho zarjada za bilancy přichodnych lět njeje na rozprawje ničo wustajić, měnješe wjesnjanosta Swen Nowotny (CDU). „Dźakuju so wšitkim wobdźělenym, předewšěm financnemu zarjadej gmejny.“
„My za Saksku“ klětu dale wjedu
Drježdźany (SN). Sakska čestnohamtski angažement wobydlerjow dale spěchuje. Za klětu přewostaja we wobłuku programa „My za Saksku“ dohromady jědnaće milionow eurow. Program bu do noweje směrnicy wo spěchowanju towaršnostneje zwjazanosće přiwzaty, kaž statne ministerstwo za socialne a škit přetrjebarjow w Drježdźanach informuje.
Za swoje přerězne měsačne zasadźenje znajmjeńša 20 hodźin móža wobydlerjo přez nošerja projekta pawšalne zarunanje měsačnje hač do 40 eurow dóstać. Kaž z nowinskeje zdźělenki ministerstwa dale wuchadźa, podpěruje swobodny stat na te wašnje 23 000 čestnohamtsce skutkowacych.
Projektowi nošerjo – to móža towarstwa, zwjazki, załožby, cyrkwje kaž tež města a gmejny być – móža hač do 31. winowca 2019 swoje próstwy za lěto 2020 zapodać. Spěchowany budźe angažement na přikład we wobłukach socialne, kultura, sport, wobswět a towaršnosć. Drježdźanska wobydlerska załožba próstwy wobdźěłuje. Trěbne nowe formulary kaž tež podłožki programa su pod www.ehrenamt.sachsen.de přistupne.
Krótkopowěsće (23.09.19)
Z ciwilnej njeposłušnosću
Berlin. Akciske zwjazkarstwo Ende Gelände je po wozjewjenju klimoweho paketa zwjazkoweho knježerstwa dźensa masowe akcije ciwilneje njeposłušnosće we łužiskim brunicowym rewěrje připowědźiło. Tysacy ludźi chcedźa kónc tydźenja wot 29. nowembra do 1. decembra 2019 ze swojim ćěłom wuhlowu infrastrukturu blokować. To ma wotmołwa na „dospołne zaprajenje zwjazkoweho knježerstwa w klimowej politice“ być.
Günter Kunert njeboh
Kaisborstel. Wuznamny našočasny basnik Günter Kunert je minjenu sobotu 90lětny w swojim domje w schleswigsko-holsteinskim Kaisborstelu zemrěł. W jeho žiwjenju a tworjenju wotbłyšćowachu so stawizny Němskeje w 20. lětstoku. 1976 bě Kumert jedyn z prěnich, kotřiž podpisachu protest přećiwo wusydlenju Wolfa Biermanna z NDR, tři lěta pozdźišo wón sam kraj do směra na zapad wopušći. Nimale 70 lět je njewšědnje produktiwny awtor publikował.
„Čornemu“ twarjenju zadźěwać
Policija (20.09.19)
Ćežko zranjenej wosobje
Njebjelčicy. Při zražce wosoboweju awtow wčera popołdnju krótko po štyrjoch na S 94 pola Njebjelčic buštej dwě wosobje ćežko zranjenej. Policija dyrbješe dróhu dospołnje zaraćić.
Serbskosć ma wostać
Pro a kontra wužiwanja dweju rěčow na gmejnskich radach rozjimali
Róžant (SN/JaW). Serbskosć na posedźenjach gmejnskeje rady Ralbicy-Róžant budźe čłon gmejnskeho parlamenta Tomaš Bjeńš (SWZ Delany) ze wšej swojej mocu zakitować. To připowědźi wón njedawno na zašłym a zdobom prěnim wuradźowanju rady w nowej wobsadce w Róžeńće. „W serbskim sydlenskim rumje Sakskeje stej serbšćina a němčina hamtskej rěči. Tež w jednanskim porjedźe gmejny stej wobě jako runoprawnej jednanskej rěči zapisanej. Tuž njedam sej prawo wzać, swoju maćeršćinu tež na wuradźowanjach gmejnskeho parlamenta wužiwać“, Konječan swoje stejišćo raznje podšmórny.
Lětsa drastu a črije njezběraja
Smjerdźaca (SN). Towarstwo swj. Filomeny chce lětsa znowa dźěći a swójby, kotrež přebywaja w maćerno-dźěćacym domje, w čěskim Dolní Podluží kaž tež w bołharskim měsće Razgrad k hodam zawjeselić. To připowědźi předsyda Gerat Róbl.
Kaž Smjerdźečan zdźěla zběraja za to znowa hodowne pakćiki. Jich wobsah njepředpisuja. „Zapakować móža zajimcy do nich słódčizny, hrajki, pisanski material a podobne. Spomóžne pak nam je, hdyž nańdźemy na pakćiku zdźělenku, hač je za swójbu, holcu abo hólca a tohorunja w kotrej starobje“, piše Róbl.
Pakćiki, poćehnjenja a hygieniske twory přijimuja wot póndźele, 25. nowembra, hač do štwórtka, 28. nowembra, stajnje wot 17 do 18 hodź. w Smjerdźečanskim kulturnym domje. Tola kedźbu: Trjebanu drastu kaž tež črije pak lětsa njezběraja, Róbl skedźbnja.
Wěnuja so strowoće
Dobry wuskutk na image gmejny
Wot wčerawšeho wječora je nětko tež Worklečanska nowa gmejnska rada dźěłokmana.
Worklecy (JK/SN). Po swojim zawjazanju wěnowachu so gmejnscy radźićeljo hnydom poměrnje wobšěrnemu dnjowemu porjadej. Na prěnim městnje zdźěli wjesnjanosta Franc Brusk (CDU), zo bě w času wot wólbow hač k prěnjemu posedźenju trěbne, tworić nuzne rozsudy nastupajo nowotwar šulskeho horta. Tak mějachu losy za elektro- a sanitarnu instalaciju rozdźělić. Tohodla wopyta wjesnjanosta kóždeho čłona rady wosobinsce a jemu naćisk wobzamknjenja k rozdźělenju losow předstaji a měješe na kóncu přezjedne přihłosowanje za to, přepodać trěbne dźěła domjacymaj firmomaj. Elektroinstalaciju přewozmje Njebjelčanski zawod Šuster a sanitarne nastroje budźe Worklečanska firma Floriana Šołty instalować.
