„Zelena swěca“ za nowy centrum

štwórtk, 18. apryla 2019
artikl hódnoćić
(0 )

Załožba za serbski lud planuje, w Budyšinje na Hošic hasy nowy serbski zetkawanski centrum zarjadować. Twarjenje „Stareje póstownje“ ma so po pomniko­škitnych předpisach saněrować.

Budyšin (SN/mwe). Z wjetšinu hłosow su Budyscy radźićeljo wčera na zjawnym posedźenju měšćanskeje rady předani mě­sće słušacej ležownosći Załožbje za serbski lud přihłosowali. Płaćizna za pomnikoškitane twarjenje a k tomu słušacu ležownosć na Hošic hasy 9 – cyłkownje 1 520 kwadratnych metrow – wučinja wotpowědnje posudkej 42 000 eurow. Za dalšu, 250 kwadratnych metrow wulku ležownosć na Hošic hasy 7 płaći załožba 47 000 eurow.

Załožba za serbski lud je so 21. decembra 2018 z próstwu na Budyšin wobro­ćiła, zo chce měsće słušacej ležownosći kupić. Institucija planuje, na arealu serbski zetkawanski centrum zarjadować. Po tym, zo su zastupjerjo załožby měšćanskim radźićelam lětsa kónc januara předewzaće předstajili a zajim na kupjenju twarjenja a wobeju ležownosćow wobkrućili, wčera na posedźenju wjetšich diskusijow k temje njebě. Na posedźenju přitomny direktor Jan Budar je jara spokojom, zo maja Serbja nětko „zelenu swěcu“ za dalši zetkawanski centrum wosrjedź města. Njespjelni-li pak załožba swoju winowatosć, „Staru póstownju“ po pomnikoškitnych předpisach saněrować, město imobiliju z ležownosću po wot­powědnych zakonskich zasadach wróćo dóstanje, we wobzamknjenju rěka.

Z wjetšinu napřećiwnych hłosow Budyscy radźićeljo wčera próstwu frakcije FDP wotpokazachu. W fokusu steješe nowo­wuhotowanje Žitnych wikow a Bohatych wrotow k polěpšenju atraktiwity naměsta jako zachod do Budyskeho stare­ho města. Frakciski předsyda FDP Maik Hauschild mjez druhim zwurazni, zo měli ponowjenje poměrnje dodźer­žaneho naměsta do měšćanskeho etata 2020 zapisać. „Tole móžne njeje“, Juliane Naumann, měšćanostka za twarstwo ze stron­ měšćanskeho zarjadnistwa próstwu wotpokaza. Město dźě tuchwilu scyła kapacity za tajke předewzaće nima, zdobom steja druhe wažne a wjetše projekty w srjedźišću. Zo pak budźe polěp­šenje atraktiwity a nowowuhotowanje Budyskich Žitnych wikow přichodnje wažna tema, tomu wšitke frakcije přihłosowachu. „To je dobra tema za přichodny wólbny bój“, mjez druhim rěkaše.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND