Što smě město a što radźićeljo?

srjeda, 17. apryla 2019
artikl hódnoćić
(0 )

Zarjadnistwo smě nadawki hač do 25 000 eurow same přepodać

Kulow (AK/SN). Dyrbjało město Kulow swoje hłowne wustawki změnić, a smě zarjadnistwo z měšćanostu swobodnišo rozsudźić? Wo tym prašenju su tamniši měšćanscy radźićeljo na zašłym posedźenju kontrowersnje diskutowali. Hač do lěta 2001 smědźeše zarjadnistwo wo nadawkach hač do 25 000 hriwnow same rozsudźić, po tym bě hranica pola 13 000 eurow. W zašłych lětach pak so płaćizny zwyšichu, nimo toho ma so město wo cyły rjad twarskich projektow starać. Po słowach Kulowskeho měšćanosty Markusa Poscha (CDU) njeje hranica 13 000 eurow hižo načasna a měła so na 25 000 eurow zwyšić.

Radźićel Roland Homola (Powšitkowne wobydlerske zastupnistwo) měnješe, zo so tak kompetency změnja a prawo soburěčenja přichodnych radźićelow wobmjezuje. Hakle nowa měšćanska rada měła wo tym rozsudźić. Mathias Kockert (CDU) pak jemu znapřećiwi. „Tu njeń­dźe wo wjetše kompetency měšćanosty, ale wo to wolóžić wuběrk, kiž wo nadawkach rozsudźi. Přetož tón měješe w zašłosći jara wjele dźěła.“ Tež w techniskim wuběrku běchu so z temu zaběrali. „Wuměnjenja a płaćizny su dźensa hinaše. Měli měšćanosće telko dowěry měć, zo jemu při­zwolamy samostatnje a zamołwiće rozsu- dźić“, rjekny ­Georg Szczepanski (CDU).

Njeńdźe pak jenož wo dowěru, ale runje tak wo prawo sobupostajowanja radźićelow, wuzběhny Susanne Kockert (Powšitkowne wobydlerske zastupnistwo). Wona namjetowaše, wo temje pozdźišo rozsudźić a radšo hišće raz intensiwnje wo tym rěčeć. Diskusiju podpěrowaše tohorunja radźićel Michał Krječmar (Powšitkowne wobydlerske zastupnistwo). Wón pak njeby naležnosć do přichodneje wólbneje doby wotstorčił.

Skónčnje so wjetšina radźićelow za to wupraji, wo předłoze wothłosować. Z třomi napřećiwnymi hłosami čłonojo měšćanskeje rady wobzamknychu, hłowne wustawki změnić. Tak smětaj Kulowski měšćanosta a zarjadnistwo nětko wo nadawkach we wobjimje hač do 25 000 eurow samostatnje rozsudźić.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND