Po informacijach měšćanskeho zarjadnistwa je něhdźe 90 000 ludźi ...
Policija (31.05.19)
Sam so přizjewił
Budyšin. Njewšědny wopyt mějachu zastojnicy Budyskeho policajskeho rewěra na Tuchorskej zawčerawšim wječor. Jako so hižo něchtóžkuli na dźeń muži přihotowaše, přizjewi so tam 28lětny muž, za kotrymž policija hižo dlěši čas pytaše. Přećiwo njemu předležachu mjenujcy wjacore přikazy zajeća, dokelž njebě pjenježne pokuty dotal zapłaćił. Po wšěm zdaću začuwaše na sebje mjeztym tak wulki ćišć, zo wón wšitke napołožene pokuty naraz zapłaći. Dohromady jednaše so wo 380 eurow, kaž Zhorjelska policajska direkcija informuje. Na to smědźeše 28lětny policajski rewěr jako swobodny čłowjek wopušćić.
Pomocnicy pytani
Chrósćicy. Za XIII. mjezynarodny folklorny festiwal pytaja pomocnikow wot 16 lět hłownje za natwar a wottwar jewišćow kaž tež za přihot infrastruktury w Chrósćicach, a to wot wutory, 2. julija, hač do wutory, 9. julija. Zajimcy njech so prošu w regionalnym běrowje Domowiny w Chrósćicach přizjewja, pod telefonowym čisłom 035796/ 96 254 abo e-mailnje pod .
Swjeća w starym měsće
Wojerecy. Hižo wot wčerawšeho maja we Wojerecach lětuši staroměšćanski swjedźeń. Jutře wot 13 hodź. předstaja so na jewišću při radnicy najwšelakoriše talenty. Wječor wočakuja kapału Nordstern. Po njedźelnym rańšim piwku z Rakečanskim dujerskim orchestrom budźe wot 15 hodź. serbski program z Ćišćanskej rejwanskej skupinu a z tamnišim Serbskim dźěćacym towarstwom. Wot 17.30 hodź. wustupi k zakónčenju swjedźenja Choćebuska kapała Total. Tohorunja njedźelu budźe w zwěrjencu dźěćacy měšćanski dźeń.
Lěsna kupjel wočini
Spominaja na 300 lět wobstaća winicy w Małej Nydeji
Wojerecy (KD/SN). Před 300 lětami bě hrabinka Katharina von Teschen jako wobsedźerka Wojerowskeho knjejstwa winicu w Małej Nydej znowa zapołožić dała. Cyle w znamjenju tohole jubileja steji njedźelu, 2. junija, lětuše zarjadowanje Wojerowskeje Kulturneje fabriki „KunstLandStrich“, na kotrymž so prawidłownje tež wobydlerjo z Małeje Nydeje, předewšěm ći z Winicoweje hasy, wobdźěleja. Tak chcedźa na přikład Petschikecy a dalše swójby swoje statoki wopytowarjam wočinić a na nich něhdyše ratarske žiwjenje wokoło Wojerec pokazać. Nimo toho wotměje so pola Petschikec njedźelu w 15 hodź. přednošk, na kotrymž porěči Marcel Steller z Wojerowskeho měšćanskeho muzeja wo winicarstwje we Łužicy.
Mužojo sej zhromadnje wulećeli
Sydom Horow na Horach
Hory (UH/SN). Wočakuješ-li po dlěšej přestawce zaso hosći, to wšitko trochu dokładnišo wurjedźiš, přihotuješ překwapjenki a začuwaš při wšěm dźěle wulke wjeselo. Runje tak dźe so wobydlerjam Horow w gmejnje Halštrowska Hola, kotřiž přihotowachu minjene dny a tydźenje 13. narodne zetkanje wsow a městow z mjenom Hory. Po cyłym Zwjazku mamy dohromady wosom městow a gmejnow kaž tež 17 dalšich měšćanskich a gmejnskich dźělow z tymle mjenom. Wot 1995 přewjeduja kóždej dwě lěće kónc tydźenja po Božim spěću zetkanje Horjanow, kotřiž chcedźa Hory z druhich kónčin kraja kaž tež jich wobydlerjow a wosebitosće zeznać.
Woleni wjesni radźićeljo
Smjerdźaca/Łazk
CDU: Kerstin Kühnowa (76 hłosow), Joachim Kral (73), Gabriel Krawc (69), Tomaš Róbl (46)
Sernjany/Hrańca
CDU: Pětr Kokla (86), André Handrik (59), Werner Čornak (53)
jednotliwy namjet: Carola Weclichowa (2)
Róžant
CDU: Bosćij Kokla (128), Tilo Žur (96)
Swobodne wolerske zjednoćenstwo „Delany“: Tereza Handrikowa (76)
Konjecy/Šunow
CDU: Janina Wjeselina (158), Dierk Šewc (70)
Sportowcy Konjecy/Šunow: Frank Šołta (192), Stefan Woko (137), Olaf Thiel (104), Křesćan Gruhn (73)
Nowoslicy
CDU: Tomaš Kutter (35), Christina Domašcyna (31), Christina Hendrušcyna (16)
Wotrow
Tomaš Zahn (40), Stefan Weclich (37), Měrko Pohonč (34), Jurij Wrobl (23), Marcel Rjeda (21)
(Wólbnych namjetow stron abo zjednoćenstwow njebě.)
Lejno/Zejicy/Časecy
Stefan Cyž (24), Stefan Handrik (13), Markus Kusber (10), Daniel Probian (9), Michał Jakubaš (7)
(Wólbnych namjetow stron abo zjednoćenstwow njebě.)
Redakcija SN za prawosć podatych ličbow hłosow njerukuje.
Šibjeńca z jubilejom
Kaolin z kromy Chrósćic za awtowe wobruče a samo wołojniki
Chrósćicy (aha/SN). Jědźeš-li z Jaseńcy do směra na Chrósćicy, wjedźe puć přez 216 metrow wysoku hórku, kotraž mjenuje so Šibjeńca. 31. awgusta 1804 bu tam wěsty Jakub Kmjeć z Kozarc a w Baćonju ženjeny jako posledni wotprawjeny. Dwě lěće do toho bě wón pola Wudworskeho Wróbla woheń zamiškrił, na čož so poł wjeski wotpali a wjele skotu zahiny. Chróšćanskaj kapłanaj Jakub Cyž a Michał Haška staj jeho, po tym zo bu k smjerći zasudźeny, na šibjeńcu přewodźałoj.
Dźakowna klientel
Krótkopowěsće (31.05.19)
Skawća pućowali
Slepo. Serbske skawtske pućowanje su dźensa při Lěsnym haće pola Slepoho zakónčili. Na dwudnjowskim pućowanju Slepjanskeje ewangelskeje wosady wobdźěli so dźesać skawtow, kotřiž na Slepjanskej zakładnej šuli serbšćinu wuknu. Pod nawodom fararki Malinkoweje běchu zhromadnje po puću, su čołmikowali a stanowali. Při wječornym lěhwowym wohenju su tež serbske pěsnje spěwali.
Wo strukturnej změnje
Budyšin. Strukturna změna we Łužicy bě tema diskusijneho wječora srjedu w Budyskim Dźiwadle na hrodźe. Rozjimane bu prašenje, što přińdźe po brunicy. Wo tym je 25 zajimcow zdźěla chětro emocionalnje diskutowało. Jasne wuprajenje bě, zo jeničce inwesticije a spěchowanske programy za pozitiwnu změnu njedosahaja.
Do partnerskeho wokrjesa
