Zachowuja nabožne žiwjenje we wsy
Towarstwa najwšelakorišeho razu prěnje tydźenje lěta wužiwaja, zo bychu swoje dotalne dźěło bilancowali a so čłonam za skutkowanje dźakowali. Wčera bě tomu we Worklecach tak.
Worklecy (aha/SN). W juniju 2016 wopušćichu sotry rjadu Božeje předwidźiwosće – sydom jich tehdy hišće bě – Worklecy a podachu so do maćerneho domu w Münsteru. Tak njeje so jenož wobraz wsy změnił, ale tež jich zamołwite hladanje wjesneje kapałki so zakónči. Mnozy wěriwi Worklečenjo sej wuwědomichu, zo je zwučeny wopyt Božeje mšě njedźelu we wsy wohroženy. Zo pak njeby k tomu dóšło, běchu njeposrědnje do wopušćenja rjadniskich sotrow załožili Towarstwo kapałki Marije maćerje Božeje Worklecy, kotremuž dźensa 53 čłonow přisłuša.
Wobchod na pospyt, tak mjenowany test-shop, je tele dny Gordian Kral ...
Za dwurěčnosć w komunach
Budyšin (SN/at). Z wuradźowanjom w Serbskim instituće je dźěłowy kruh za serbske naležnosće Budyskeho wokrjesa wčera do lěta 2018 startował. Kaž wokrjesna społnomócnjena za serbske naležnosće Regina Krawcowa informuje, sćěhowachu čłonojo gremija wuwjedźenja dr. Sonje Wölkoweje wo skutkowanju a posłužbach wědomostneho zarjadnišća. Referentka skedźbni na to, zo njeje prěnjorjadny nadawk přełožki wobstarać, ale wědomostnje dźěłać. Přitomni rozjimachu prašenje, w kotrej měrje by móžno było komuny z koordinowanej přełožowarskej posłužbu podpěrać. Nimo toho žana přistupna serbskorěčna zarjadniska terminologija njepředleži.
Dźěłowy kruh chce so ze zapósłancom Sakskeho krajneho sejma Markom Šimanom (CDU), direktorom Załožby za serbski lud Janom Budarjom a zastupjerku Rěčneho centruma WITAJ zetkać, „zo bychmy rěčne a kulturne kubłanje dorosćenych ze wšelakich powołanskich wobłukow rozjimali“, Regina Krawcowa rozłožuje. Jedyn dypk při tym ma konstrukt serbskeje rěčneje šule być.
Krótkopowěsće (17.01.18)
Žadaja sej wjac kedźbnosće
Budyšin. Maćica Serbska žada sej w zwisku z diskusiju wo „wusměrjenju Budyšina 2030+“, wěnować wjetšu kedźbnosć dźěłu z partnerskimi městami, předewšěm w susodnymaj słowjanskimaj krajomaj. Wotpowědny list městu je předsydstwo wčera naćisnyło, kaž předsyda Jurij Łušćanski pisa. Wobzamkli su, zo budźe lětuša hłowna zhromadźizna 17. měrca w Budyskim Serbskim muzeju.
Wo swojej knize přednošowała
Ochranow. Najebać wjele sněha je wčera w Ochranowskim unitnym archiwje Ewangelskeje bratrowskeje jednoty 35 ludźi wuwjedźenja Lubiny Malinkoweje sćěhowało. Wona přednošowaše tam wuspěšnje wo swojej nazymu w LND wušłej knize „Um der Wenden Seelenheyl hochverdient – Reichsgraf Friedrich Caspar von Gersdorf“. W njej wuswětla skutkowanje von Gersdorfa na dobro serbstwa.
Bjez mištra z Łužicy
Po krutym časowym planje camprowali
Dźěwin (JoS/SN). Lětušu camprowansku sezonu su minjenu sobotu w Dźěwinje zahajili. Mjez něhdźe 20 camprowarjemi běchu mjedwjedź, pinguiny, jejkowa žona z wulkim košom a dalši. Derje wobstražowany bě wjesny zachod ze směra zwjazkoweje dróhi B 156. Dźěwinske camprowanje, kotrež dobrowólna wohnjowa wobora organizuje, ma wjelelětnu tradiciju. Kóždy z dorosćenych smě so wobdźělić, jeno dźěći maja z pěstowarnju swoje wosebite camprowanje.
Na kóždym statoku sej z wobydlerjemi k hudźbje dujerskeje kapały zarejwachu a poskićichu darićelam pampuch abo palenc. W korbje nahromadźichu so tak w běhu dnja jeja, połć a někotražkuli bleša. Byrnjež po krutym časowym planje camprowali, bě hižo ćma, jako wobdźělnicy posledni statok docpěchu. Nazběrane pjenjezy wužiwaja w běhu lěta za přibrjóžny swjedźeń, za pěstowarske dźěći a za adwentničku seniorow.
Policija (16.01.18)
Jastwu runje hišće tak zadźěwałoj
Pěskecy/Jěžow. W nadawku justicy bě minjenu sobotu popołdnju wobsadka Kamjenskeho policajskeho rewěra po puću. W Pěskecach wopytachu zastojnicy 52lětneho wjesnjana, za kotrymž Kasselske statne rěčnistwo pytaše. Muž njebě dotal pokutu 140 eurow zapłaćił. W Jěžowje zaklinkachu pola 25lětneho wobydlerja, kiž bě zabył chłostanski lisćik 25 eurow plus zarjadniske wudawki zapłaćić. We woběmaj padomaj staj potrjechenaj poslednju składnosć wužiłoj a wotewrjenu zličbowanku zapłaćiłoj. Njebyštaj-li to činiłoj, byštaj wobaj wjacednjowski přebytk w jastwje nastupić dyrbjałoj. Čehodla běštaj so mužej tak dołho dlijiłoj a swoju pokutu njezapłaćiłoj, z rozprawy policajskeje direkcije bohužel njewuchadźa.
Literarne motiwy Krabata
Budyšin. W zwisku z Krabatowej wustajeńcu w Budyskim Serbskim muzeju přednošuje tam jutře, srjedu, w 19 hodź. dr. Susanne Hozyna ze Serbskeho instituta pod hesłom „Bajki jako žórło wědy. Powědančko wo kuzłarju a jeho šulerju“ wo literarnych motiwach Krabatowych bajkow a powěsćow. Přednošk budźe w serbskej rěči a simultanje do němčiny přełoženy. Hodźinu do toho, we 18 hodź., poskića wodźenje po wosebitej wustajeńcy „KRABAT – Muž – Mytos – Marka.“ Zastup płaći pjeć eurow.
Durje kubłanišća wotewrjene
Radwor. Za někotre tydźenje dóstanu šulerjo 4. lětnika swoje kubłanske poručenje a dyrbja so za dalewjeduce kubłanišćo rozsudźić. Při namakanju praweho rozsuda chcedźa wosebje jich staršich podpěrać a witaja w Radworju pjatk, 19. januara, wot 17 do 19 hodź. do Serbskeje wyšeje šule „Dr. Marja Grólmusec“ na dźeń wotewrjenych duri. Wuknjacy prezentuja swoje wudźěłki z jednotliwych předmjetow a dźěłowych zjednoćenstwow. Na prašenja k šulskemu wotběhej wučerjo a šulerjo rady wotmołwja.
Mrějacych přewodźeć
Wužadanje a šansa za přichod
Srjedźołužiska gmejna Trjebin ma potencial za turistiske wuwiće
Trjebin (AK/SN). Gmejna Trjebin je spočatk tohole lěta turistiskemu zjednoćenstwu Nysowy kraj přistupiła. Tole je gmejnska rada na swojim njedawnym prěnim posedźenju lěta 2018 z jednym wzdatym hłosom wobzamknyła. W nowembru bě sobudźěłaćerka Maja Rublack-Daniel zaměry zjednoćenstwa bliže předstajiła.
Turistiske zjednoćenstwo Nysowy kraj wobsteji wot lěta 2002 a ma 26 čłonow. Su to města kaž Mužakow, Bernstadt a Rychbach, gmejny kaž Schönau-Berzdorf, předewzaća kaž Mužakowska železnica a kulturne městnosće kaž Slepjanski Serbski kulturny centrum. „Trjebin ma bjeze wšeho potencial za přichodne turistiske wuwiće“, podšmórny wjesnjanosta Waldemar Locke (CDU). K tomu słušeja po jeho słowach mjez druhim Šusterec statok, Brězowski jězor a tak mjenowana dendrologiska wjes. Sobustawski přinošk gmejny wučinja 231 eurow na lěto.
Pódla pjekarja tež mjaso a kołbasa
Worklecy (aha/SN). Tón, kiž poda so minjenu sobotu po zwučenym wašnju do Worklečanskeje Šlapec pjekarnje po całty, je w myslach snano wobžarował, zo njemóže to we wsy hižo zwjazać z nakupju čerstweje kołbasy. Dokelž to po zawrjenju kupnicy Edeka we Worklecach hižo móžno njeje, dyrbiš so chcyjo nochcyjo na dlěši puć nastajić. Najkrótšo by do Pančic-Kukowa było. Ale twara mosta nad Klóšterskej wodu dla je to z wokołopućemi zwjazane. Zwostanje tuž jenož hišće jězba do Kamjenca.
