Worklečanska gmejnska rada lětuši hospodarski plan schwaliła

Worklecy (SN/MWj). Poměrnje pozdźe drje, ale přeco hišće zašo hač loni je Worklečanska gmejnska rada na swojim zašłym posedźenju minjeny štwórtk hospodarski plan za tele lěto wobzamknyła. W nim wotbłyšćuje so spagat, na jednym boku wobydlerjow přidatnje njepoćežować a runočasnje wšitke winowatostne nadawki spjelnić móc.

Kaž wjesnjanosta Franc Brusk (CDU) rozłoži, ma lětuši etat wobjim 2,4 milionow eurow. Dokelž dyrbja tež wotpisanja wuzbytkować, zwostanje po planje deficit nimale 150 000 eurow. Přiwšěm so na sadźbach za ležownostnej dawkaj A a B ničo njezměni. Za to pak dyrbja něhdźe 409 000 eurow wokrjesneho wotedawka płaćić. Na financowanju zarjadniskeho zwjazka Při Klóšterskej wodźe wobdźěli so gmejna Worklecy z něhdźe 195 000 eurami. Wobě sumje stej tójšto wjetšej hač před lětom. Kónc lěta 2019 budźe komuna ze 438 eurami na wobydlerja zadołžena. To je přeco hišće daloko pod hranicu, kotraž je gmejnam w Swobodnym staće Sakskej jako hornja hranica poručena. Ta leži pola­ 850 eurow.