Na kromje wsy bywši industrijowy centrum našli

wutora, 16. julija 2019
artikl hódnoćić
(0 )
Wšitke namakanki archeologojo w Slepom akribisce wopisachu a jich městnosć fotografowachu .  Foto: Constanze Knappowa Wšitke namakanki archeologojo w Slepom akribisce wopisachu a jich městnosć fotografowachu . Foto: Constanze Knappowa

Prjedy hač smě něchtó twarić, sej archeologojo městnosć bliže wobhladaja a za zajimawostkami pytaja. W Slepom, hdźež ma Nowy Miłoraz nastać, woni tójšto namakachu.

Slepo (CK/SN). Zbytki wudobywanja železoweje rudy z bywšich lětstotkow namakachu při wurywanjach na sewjernej kromje Slepoho. Archeologojo krajneho zarjada wuslědźichu nimale sto pjecow, kotrež běchu něhdy zwjetša po rynku natwarjene. To rěči za industrielne wužiwanje. „Slepo bě něhdy industrijowy centrum“, zwěsća nawoda wurywanjow Olaf Ullrich. Rudu wudobywachu něhdy při wjesnej hrjebi, něhdźe 200 metrow zdalene wot městna, hdźež chcedźa Miłoraz přesydlić.

Na něhdźe dwanaće hektarow wulkim polu kaž tež na něhdźe hektar wulkej płoninje, hdźež ma so Miłoraske po­hrjebnišćo přeměstnić, storčichu archeologojo na dalše namakanki. Ćmowe městna na zemi pokazachu na něhdyše jamy. Něhdźe 550 tajkich zwěsćichu. „To je wjace hač smy wočakowali“, wjeseli so Olaf Ullrich. W brunicowych jamach běchu tajke namakanki zwjetša pod lěsom a tuž poměrnje hłuboko. Na přepytowanej płoninje w Slepom porno tomu su generacije něštožkuli při woranju skóncowali. Přiwšěm namakachu „zaso raz wjetši dźěl sydlišća“. Wotpowědnje wulke bě wjeselo fachowcow.

Namakanki pochadźeja ze wšelakich dobow. Popjelnicowy row při puću do Dźěwina pochadźa z časa wokoło 1000 do Chrystusa. Dale zwěsćichu kulojte jamy z tójšto črjopami (800 do Chrystusa). Za čas Romskeho kejžorstwa (200 do Chrystusa) bě kónčina znowa wobsydlena. To wobkrućeja wjacore tak mjenowane jamowe domy. Wjele keramiskich namakankow pochadźa z časa wokoło 200 do 400 po Chrystusu. Wurjadnych metalowych namakankow pak njebě.

Archeologiske přepytowanja běchu w měrcu zahajili. Dołhodobne zrěčenje LEAG z krajnym archeologiskim zarjadom zaruči, zo so archeologiske swědki njezhubja. Mjeztym je přepytowana płonina zrumowana, wurywanja su wčera oficialnje zakónčili. Wjace hač 400 na­makanych jednotliwych kruchow su wumyli, akribisce wopisali, do titow połožili a městnosće fotografowali. Za archeologow započnje so nětko druhi dźěl jich sisyphusoweho­ dźěła, mjenujcy zakónčaca dokumentacija, zo móhli wuslědki na­drobnje wuhódnoćić.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND