Akcija na mnohe wašnje pozbudźa
Dwaj měsacaj po zahajenju wuměłskeho projekta „Swětło pozbudźa“ z Reck-linghausenskim wuměłcom Ludgerom Hinsu móža organizatorojo prěnju pozitiwnu mjezybilancu sćahnyć.
Budyšin (SN). „Naš ekumeniski projekt je derje přiwzaty. Na mnohich zarjadowanjach so wobstajnje 30 do wjacore sta wopytowarjow wobdźěleja“, praji tachantski farar Wito Sćapan jako sobuiniciator. Na 13 wažnych městnach w Budyšinje a blišej wokolinje su swětłowe křiže a dalše dźěła wuměłca Ludgera Hinsy widźeć, mjez druhim w Muzeju Budyšin, w Němsko-Serbskim ludowym dźiwadle, w Budyskim wopomnišću, w Smochčanskim Domje biskopa Bena kaž tež w cyrkwjach města. W tachantskej cyrkwi su wjacore twórby wuměłca widźeć. Hač do swjatkow steji hišće dobry dźesatk zarjadowanjow na programje. Samo na jednym z měšćanskich busow je wabjenje za projekt naćišćane.
Hišće hač do kónca tohole lěta maja twarske dźěła wokoło ...
Na wuwiće cyłeje gmejny dźiwać
Na lisćinje Serbskeho wolerskeho zjednoćenstwa Radwor k wólbam tamnišeje noweje gmejnskeje rady steji mjeno, kotrež tam dotal hišće stało njeje – Cyril Hančik z Radworja. 41lětny rodźeny Měrkowčan je w Choćebuzu wotrostł, hdźež je tež do šule chodźił. 1995 so wón ze staršimaj do Měrkowa nawróći. Po maturje studowaše w Lipsku medicinu, štož lěta 2003 zakónči. Powołanske žiwjenje jako lěkar wjedźeše jeho do Lipska, Drježdźan, Budyšina, Niskeje a Běłeje Wody, hdźež nawjedowaše wot lěta 2014 anesteziju a intensiwnu staciju. Wot lońšeho nawjeduje młody Serb tamnišu paliatiwnu staciju. Před sydom lětami móžeše młoda Hančikec swójba w Radworju do noweho domu zaćahnyć.
Krótkopowěsće (10.05.19)
Zhladuja kritisce na domiznu
Berlin. Hudźbna skupina Silbermond w swojim nowym spěwje „Mój wuchod“ kritisce na swoju domiznu zhladuje. W dźensa wozjewjenej akustikowej baladźe tematizuje skupina ze spěwarku Stefanie Kloß njepřećelske nadběhi na wukrajnikow a pačenje towaršnosće. „Škałby du přez swójby a škałba dźe tež přeze mnje. Wšako wěm: Ze srjedźnym porstom problem njerozrisamy“, w spěwje rěka.
Nastupny wopyt pola Serbow
Budyšin. Nowy nawoda Smochčanskeho Domu biskopa Bena Sebastian Kieslich chce nawjazać na dobre zhromadne dźěło swojeho předchadnika z Domowinu a jeho zarjadnišća jako spěchowanskeho čłona třěšneho zwjazka. To wobkrući Kieslich na wčerawšim nastupnym wopyće w Serbskim domje, hdźež je so z předsydu Dawidom Statnikom a jednaćelom Markom Kowarjom rozmołwjał.
Serbowce najlěpšej
Policija (09.05.19)
Kolesowar smjertnje znjezbožił
Mučow. Tragiske wobchadne njezbožo je so wčera rano na zwjazkowej dróze B 96n stało. 61lětny kolesowar jědźeše po lěsnym pućiku z Hórnikec do Ćiska. Jako chcyše B 96n přeprěčić, přewidźa wón po wšěm zdaću so bližacy transporter, kotrehož 63lětny šofer njemóžeše hižo borzdźić. Kolesowar so tak ćežko zrani, zo hišće na městnje njezboža zemrě. Dróha bě šěsć hodźin dospołnje zawrjena.
Zaběraja so z keramiku
Sejmikarjo so schadźuja
Njebjelčicy. Přichodne zjawne posedźenje Serbskeho sejma wotměje so 11. a 12. meje w Njebjelčicach. Sobotu dopołdnja planuja dźěłarničku, na kotrejž chcedźa sej nadawki a zamołwitosće dorěčeć. Popołdnju wuradźuja jednotliwe wuběrki paralelnje wo swojich temach. Wječor wobhladaja sej sejmikarjo poslednje předstajenje inscenacije NSLDź „Wopušćeny dom“. Přizamknje so diskusija z dźiwadźelnikami a režiserku, na kotrejž móža so tež wšitcy dalši přihladowarjo wobdźělić. Njedźelu dopołdnja chcedźa wuběrki mjez druhim přichodne posedźenje sejma přihotować. Zajimcy su wutrobnje přeprošeni.
Chór Budyšin koncertuje
Smochćicy. We wobłuku Smochčanskeho jewišća wotměje so zajutřišim, sobotu, w 19.30 hodź. koncert w Domje biskopa Bena. Wječor wuhotuja chór Budyšin a Markkleebergscy wokalisća. Jich wosom čłonow zaběra so předewšěm z naročnej a-cappella-hudźbu. Spěwarjo chóra Budyšin zanjesu mjez druhim twórby Jana Bulanka, Bjarnata Krawca a Korle Awgusta Kocora. Zastup je darmotny, organizatorojo pak proša wo dar.
Film dokumentuje přesydlenje
Trjebinska pěstowarnja „Lutki“ dóstanje nowej čumpadle
Trjebin (AK/SN). Podstupimske předewzaće Filmart hižo wjacore lěta Trjebinsku gmejnu dokumentarisce přewodźa. „Smy so nětko wo dalšich krokach dorozumili“, zdźěli wjesnjanosta Waldemar Locke (CDU) na wčerawšim posedźenju gmejnskich radźićelow. Filmart ma nětko tež přesydlenje Miłoražanow do Slepoho kaž tež do Trjebina přewodźeć. Hač do lěta 2024 budu filmowcy we wsy po puću. Při tym koncentruja so předewšěm na druhi dźěl zakładneho zrěčenja wo Miłorazu, kotryž su energijowy koncern LEAG kaž tež gmejnje Slepo a Trjebin 28. měrca podpisali. Druhi dźěl rjaduje komunalne prašenja. W Nowym Miłorazu dóstanu wobydlerjo zaso swój wjesny towarstwowy dom, wohnjowobornu gratownju, pohrjebnišćo, mału kupjel, pomnik za padłych wobeju swětoweju wójnow kaž tež zwóńcu.
Hižo w čakarni so derje čuć
W Kulowje su njedawno nowe fyzioterapeutiske praksowe rumnosće Hagena Melchera požohnowali. Při jich wuhotowanju su tež na pozdatne maličkosće kedźbowali.
Kulow (RL/SN). „Wotnětka přińdu radšo pjeć mjeńšin prjedy na swoje fyzioterapeutiske terminy“, praji Helmut Hörauf z Kulowa. Wšako so jemu hižo čakarnja noweje praksy za fyzioterapiju Hagena Melchera na Budyskej dróze lubi. „Ta je jara rjana a derje poradźena. To móžeš sej čakanski čas woprawdźe lubić dać“, měni 68lětny Serb. Najbóle napadnje štyri metry šěroki a dwaj metraj wysoki Michelangelowy wobraz „Stworjenje Hadama“, kotrehož original móžeš w Sixtinskej kapale we Vatikanje wobdźiwać. Pod wobrazom so pacienća w jednym z křesłow posydnu. Dale wuhladaja woni meter wulku stelu z marmora, w kotrejž so kula we wodźe wjerći. Tejka a swěčnik tohorunja napadnjetej.
