Zarjadniski zwjazk Při Klóšterskej wodźe ma wulke starosće, swój hospodarski plan za přichodne lěto nastajić. Na jednym boku dyrbi zwjazk porjadne dźěło w zmysle sobustawskich gmejnow zaručić, dyrbi so pak při tym přiběrajcy ze zwyšenjom tarifowych mzdow kaž tež z běrokratiskimi předpisami zaběrać. Na tamnym boku so prócuje, zo wostanje poćežowanje za jednotliwe gmejny znjesliwe. Tónle spagat bě hižo stajnje wulke wužadanje. Nětko pak so zda, zo zarjadniski zwjazk swoje hranicy docpěje. A w tym wokomiku so zaso hłosy sylnišo jewja, kotrež namjetuja, wu­tworić wulkogmejnu. Tež ja njebych ničo přećiwo tomu měł, bychu-li so gmejny zjednoćili. Ničo druhe dźě tuchwilny konstrukt zarjadniskeho zwjazka tež njeje. Myslu sej samo, zo so ani telko změniło njeby a zo hodźał so wulki dźěl nadawkow zjednorić, kotrež so nětko pjeć abo samo šěsć razow wukonjeja. Marian Wjeńka

Budyšin (SN). Města Budyšin, Zhorjelc a Wojerecy podpěruja prócowanje, strukturnu změnu we Łužicy zhromadnje zmištrować. Kaž Budyske měšćanske zarjadnistwo zdźěla, su so wyši měšćanosća tutych třoch komunow nadcentralneho zwjazka městow na to dojednali so zamołwiće na procesu wobdźělić. Woni reaguja na mjezyrozprawu komisije za rozrost, strukturnu změnu a dźěło, wšako njesteja jenož wot kónca wudoby­wa­nja brunicy direktnje potrjechene komuny a wokrjesy w srjedźišću strukturneje změny. Ně, maja ju za cyłotne wužadanje regionej mjez Königs Wuster­hause­nom a Žitawu. Łužiskemu kruhej wobkrućeja wyši měšćanosća wuběrne dźěło. „Nětko měł wšón region za jedyn postronk ćahnyć“, rjekny Budyska měšćanska hłowa Alexander Ahrens (SPD). Mjez druhim móhło požadanje Žitawy wo titl kulturna stolica Europy tomu słužić, Łužicu zaso jako cyłk rozumić a zhromadnje za region a strukturnu změnu nowe a inowatiwne mysle wuwić.

Wyši měšćanosća runje tak witaja, zo po Zhorjelskim nětko tež Budyski wo­krjes wotpohladuje towaršnosći Hospodarski region Łužica přistupić.

Stabilne dźěłowe wiki

Budyšin. We wuchodnej Sakskej bě w nowembrje 17 842 bjedźěłnych, dwaceći mjenje hač w oktobrje a 1 578 mjenje hač loni w samsnym měsacu. Předstajejo aktualnu dźěłowičnu rozprawu skedźbni Ilona Winge-Paul, operatiwna jednaćelka Budyskeje dźěłoweje agentury, dźěłodawarjow dźensa na sezonowy pjenjez krótkodźěła dla, zo bychu w zymje pušćenjam zadźěwali.

Olympiada rušćiny zahajena

Aumund-Hammersbeck. Łužica je na 14. zwjazkowej olympiadźe ruskeje rěče sylnje zastupjena. Na wčera blisko Bremena zahajenym wurisanju zastupuje Saksku mjez druhim 17lětna Lejnjanka Tereza Kubicec, šulerka Kamjenskeho Lessingoweho gymnazija. Wšitcy třo wobdźělnicy Braniborskeje, Gustav Konzack, Isabel Möbus a Adam Ratica, su šulerjo Grabinskeho gymnazija.

Módroćišć kulturne herbstwo

Žonam pjenjezy wulišćić spytali

Běła Woda. Njeznaći wobšudnicy su zawčerawšim popołdnju w Běłej Wodźe spytali, třom staršim žonam přez telefon pjenjezy wulišćić. W jednym padźe cuza žona rentnarce něšto wo strowotniskej nuzowej situaciji powědaše, w tamnymaj padomaj wudawaše so wona jako po­zdatna wnučka, kotraž chcyła „wowku“ wo pjenjezy prosyć. Wšitke tři rentnarki w starobje 82 do 88 lět su pak prawje reagowali, telefonat přetorhnyli a policiju zazwonili.