Serbske mjena zachować
Trjebin (AK/SN). Serbske swójbne a ležownostne mjena su kulturne bohatstwo a herbstwo regiona. Wone su hłuboko w domizniskich stawiznach zakótwjene. „ Chcemy je před zabyćom zachować. Wažne nam je wuslědźić, zwotkel wone pochadźeja a što woznamjenjeja. Chcemy je zjimać a přichodnym generacijam dale dać – hač jako chroniku, wustajeńcu a brošuru, je hišće wotewrjene“, podšmórny Angelika Balccyna, předsydka Trjebinskeje Domowinskeje skupiny minjeny pjatk w Hanza Šusterowym domje. Tema wječorka rěkaše „Na Šusterec kachlowej ławce – Dopomnjenki a stawiznički wo Trjebinskich burach.“ Někotři zajimowani wobydlerjo so tuž w małym kruhu zeńdźechu.
Hižo w nowembru 2017 a aprylu 2018 běchu so w Trjebinje statokowym a swójbnym mjenam wěnowali. Wobydlerjo móžachu je jako skicu hromadźe znosyć. Na to je Domowinska skupina nětko nawjazała. „Zo dźěl Trjebina wotbagruja, je hladajo na temu wosebje brizantne“, zwurazni dr. Ruth Mróskec z Budyšina, rodźena Trjebinjanka a Slepjansku narěč wobknježaca wědoma Serbowka.
Bórze „hojernja bjez papjery“
Na rěčnu hodźinu do „Meje“
Radwor (SN). Radworski gmejnski zwjazk CDU přeprosy jutře, 22. meje na rěčnu hodźinu wo temje „Je situacija spokojaca?“. Na zarjadowanju póńdźe wo medicinske zastaranje w komunje. Jako hosći su sej bywšu zapósłanču zwjazkoweho sejma a čłonka jeho strowotniskeho wuběrka Marju Michałkowu, społnomócnjenu medicinskeho zastaranskeho centruma Hornja Łužica Kristin Bartke kaž tež domjacu lěkarku, internistku dr. Moniku Liznarjowu, přeprosyli. Rěčna hodźina w Radworskim hosćencu „Meja“ započnje so w 19.30 hodź.
Dźěłarnička „Přichod Krabat“
Družču drastu hotowali
Dwanaće młodych maćerjow sej prawe woblěkanje pokazać dało
Chrósćicy (SN/mwe). W zetkawanskej rumnosći Chróšćanskeje fary knježeše minjenu sobotu něhdźe w 14 hodź. ćicha, ale tola dosć napjata atmosfera. Dwanaće młodych serbskich maćerjow bě přeprošenje župy „Michał Hórnik“ sćěhowało a sej na dźěłarničku hotowanja družčeje drasty dojěło. Mjelčicy a sćerpnje dachu sej tři holcy jehlički na so tykać, włosy česać a drastu woblěkać. A wšitke mějachu wjeselo přihladować, kak je jako družku hotuja, što wšo hotowarniči jim a maćerjam při tym powědaštej a pokazowaštej. Po něhdźe dwěmaj hodźinomaj zwučowanja móžachu sej wobdźělnicy tójšto pokiwow a dobrych radow sobu wzać.
Wjele ludźi dojědźe sej předwčerawšim, njedźelu, do ...
Z widom bjez předsudkow
Byrnjež dotal nazhonjenja na polu komunalneje politiki njeměła, njetrjebaše Jadwiga Ledźborjowa dołho wo tym rozmyslować, so sama z kandidatku za přichodnu gmejnsku radu w Chrósćicach stać. Na naprašowanje tamnišeho wjesnjanosty Marka Klimana (CDU) so wona zwólniwa wuprajił, na lisćinje Křesćansko-demokratiskeje unije k wólbam nastupić. „Sprěnja chcu z kandidaturu žónsku kwotu w radźe zwyšić. Zdruha je to za mnje jako socialnu pedagogowku logiska konsekwenca, cyłkowno-towaršnostnje so angažować. Jedyn z hłownych nadawkow socialneho dźěła je, prewentiwnje na přikład na socialne deficity skedźbnjeć, poskitki we wobłuku kubłanja kaž tež za wólny čas iniciěrować a na zakładźe politiskeho wobwliwowanja tomu polěkować, wuměnjenja towaršnostnych wobstejnosćow změnić“, 38lětna rodźena Prawočanka rozłožuje. Jeli ju wólbokmani wuzwola, chce so Ledźborjowa „wosebje na socialnym a kulturnym polu angažować. Dokelž sym wjacore lěta zwonka Łužicy powołansce skutkowała, mam wid bjez předsudkow na tudyše poměry.
Krótkopowěsće (21.05.19)
Bórze nowa terminowa protyka
Budyšin. Załožba za serbski lud je kooperaciske zrěčenje z firmu SAXO’Phon GmbH podpisała. Tak chce serbsku kulturnu protyku dalewuwić, kaž zdźěla. Předewzaće ma nazhonjenja z kalendrom dźenika Sächsische Zeitung a je tuž kompetentny partner za wuwiwanje protyki. Nastać ma nowa trojorěčna homepage za serbske terminy, kotraž ma wot septembra přistupna być.
Poslednja šansa podpisać
Drježdźany. Za podpismowu akciju „Zhromadne šule w Sakskej – dlěje zhromadnje wuknyć“ bu dotal 35 757 wobkrućenych podpismow zezběranych. Posledni dźeń, na kotrymž budźe po cyłej Sakskej składnosć tajke hromadźić, je Mjezynarodny dźeń dźěsća 1. junija. To zdźěli wčera Burkhard Naumann, koordinator mjenowaneje akcije.
Šupiznak město pandy
Čorne mróčele zliwk sobu přinjesli
To njebudźe so zawěsće jenož dźěćom lubić
Zhromadnje přihotuja Wěteńčenjo nowe hrajkanišćo we wsy
Wěteńca (JK/SN). Jara konkretne předstawy wo tym, kak měło na nowym hrajkanišću we Wěteńcy wupadać, nimaja jenož tamniše dźěći, ale tež jich starši. Tak su minjeny štwórtk we wulkej ličbje na druhi termin přichwatali, zo bychu sej wo tym hłójčku łamali a ideje wuwiwali. Zhromadnje z krajinowej architektku Susann Uhlig z Radebergskeho planowanskeho běrowa Schubert a z Njebjelčanskim wjesnjanostu Tomašom Čornakom (CDU) rozmyslowachu woni na płoninje, na kotrejž Wěteńčenjo sportuja, ale tež zhromadnje swjeća, kajke móhło wjesne hrajkanišćo wupadać. Na ležownosći maja dźěći drje hižo někotre nastroje, ale te hižo w tajkim stawje njejsu, zo bychu dźěći wužadali. Čumpjel samo wjace wužiwać njemóža, dokelž je prěkuš přetłaty.
Policija (20.05.19)
Pjeć ćežko zranjenych
Fischbach. Sobotu wo połnocy bě 29lětny wodźer VW Pasasta na zwjazkowej dróze B 6 z Biskopic do Fischbacha po puću. Za Großharthauwom zajědźe wón z dotal njeznateje přičiny na hórce naraz na lěwu stronu jězdnje a zrazy do jemu napřećopřijěduceho Audija A 6. Jeho 40lětny šofer, 40lětna sobujěduca a dwě dźěsći w starobje dweju a dźewjeć lět so při tym ćežko zranichu. Wšitkich na njezbožu wobdźělenych, tež zawinowarja, dowjezechu do bliskich chorownjow.
