Ze sydlišćom so bliže zaběraja
Zachować dopomnjenki na swojich prjedownikow, na hižo njeeksistowace wsy a sydlišća su wažny wobstatk našeje kultury. Po tym maja so tež w Drěwcach we Łazowskej gmejnje.
Drěwcy (AK/SN). „Neu Driewitz – Borduc – 1831–1900“ steji na wopomjatnym kamjenju. Tón dopomina na małe sydlišćo dwaj kilometraj južnje Drěwcow. „Direktnje při puću wot Lipiča do Drěwcow chcemy na tule městnosć skedźbnić a dopomnjenki přichodnym generacijam zachować“, rjekny čłon wjesneje rady Werner Bunk minjenu sobotu, jako kamjeń poswjećichu. Sydlišćo rěkaše serbsce Borduc, štož woznamjenješe „mała chójna“, rozłoži Werner Bunk. 1831 bě wone nastało. Wudwór a pjeć statokow tam něhdy mějachu. Hižo 1900 pak sydlišćo hospodarskich přičin dla spušćichu. „Najskerje bě to přemało wody dla“, praji wjesny předstejićer Frank Linge. Posledni póstowy zapřah je 1904 přez Borduc jěł. Wjace faktow (hišće) znate njeje. Nětko chcedźa so z tym zaběrać, čehodla swójby sem přićahnychu, kelko wobydlerjow tu bě, kajki bě jich wšědny dźeń, hač su serbsce rěčeli a kotre swójby to scyła běchu. „To chcemy z pomocu wobydlerjow wuslědźić“, Linge podšmórny.
Za lětni hudźbny wječor pod hołym njebjom skićeše areal při ...
Krótkopowěsće (19.06.19)
Łužiskej přinoškaj
Wrócław. Serbski ludowy ansambl pokaza we wobłuku festiwala Kalejdoskop kultur swój program „Naša duša“. Dalši łužiski přinošk je čitanje Měrany Cušcyneje a Měrćina Wjenka. Nimo kulturow narodnych mjeńšin je 20. róčnica załoženja regionalneho partnerstwa Sakskeje a Delnjeje Šleskeje ćežišćo swjedźenja, kotryž zajutřišim we Wrócławju zahaja.
Na wuprawje w Litawskej
Wilnius. Čłonojo chóra 1. serbskeje kulturneje brigady su sej we wobłuku swojeje wuprawy do Litawskeje wčera ortodoksnu cyrkej w stolicy Wilniusu wobhladali. Po wodźenju přewjedźechu pod hołym njebjom probu za dźensniši wustup. Popołdnju wopytachu Miłosćiwu madonu. Nawječor přebywachu w synagoze a zanjesechu tam jednu twórbu.
„Naša Domowina“ wušła
Bywši maturanća so zetkali
K jubilejej na serbskosć wsy dopominali
Sprjejcy (JoS/SN). Za Sprjejcami w gmejnje Sprjewiny Doł leži składnostnje 600. róčnicy prěnjeho naspomnjenja swjedźenski tydźeń, kaž drje jón wjes hišće dožiwiła njeje. Hromadźe z wobydlerjemi, gmejnu, wohnjowej woboru, cyrkwju a mnohimi dalšimi partnerami běchu jón předewšěm čłonojo póstniskeho a tradiciskeho towarstwa cyłe lěto přihotowali. Wuzběhnyć maja so dopomnjenki na serbsku zašłosć wsy, kotrež su tež minjeny kónc tydźenja prezentowali. Wjacori wobydlerjo wočinichu za to swoje statoki. Na nich hraješe pozawnowy chór, holcy w serbskej narodnej drasće rozdawachu specielnje prasowane jubilejne brikety a stare traktory běchu runje tak widźeć kaž prěnje płody ze zahrodow a Sprjejčanskich polow. Na pobrjohu Małeje Sprjewje poskićachu k wobjedu karpy a pstruhi. Tež we wosadnym domje předstajichu serbske nałožki, mjez druhim debjerki jutrownych jejkow ze wsy, z gmejny a z bliskeho Grodka. Wotewrjene statoki nadeńdźechu mjez wopytowarjemi tež tohodla přewšo dobry wothłós, dokelž móžachu sej woni wšudźe něšto k jědźi a k piću popřeć.
Policija (18.06.19)
Na twarnišću zachadźeli
Kamjenc. Tójšto škody načinichu njeznaći minjeny kónc tydźenja na twarnišću nakupowanišća na Kamjenskej Fichtowej. Na nowym špundowanju zawostajichu woni móranja z čerwjenej barbu. Mjez druhim napisachu we wulkosći třoch króć pjeć metrow pismiki ACAB. Dale su polcu a sćěny z barbu napryskali. A skónčnje storčichu nakupowanski wozyčk do wokna a je rozbichu. Kelko škody dokładnje načinichu, njeje hišće doskónčnje zwěsćene. Kriminalna policija so z tymle padom zaběra.
Do domu Njechorńskeho
Njechorń. Dźeń wotewrjenych duri přewjedźe župa „Jan Arnošt Smoler“ sobotu, 22. junija, wot 14 do 17 hodź. w Domje Měrćina Nowaka-Njechorńskeho. Tam přeprošeja na pućowanje po šćežkach Měrćina Nowaka wokoło Njechornja. W domje poskićeja wodźenja w serbskej a němskej rěči, w ateljeju čita dr. Ruth Thiemannowa. Tež za dźěći budźe zaběra přihotowana. Dale pokazaja zhromadnje ze Serbskim kulturnym archiwom krótkofilmaj wo Měrćinje Nowaku z lěta 1975. Tež kofej a tykanc budźe w poskitku. Župne předsydstwo wšitkich zajimcow na přijomnu bjesadu a na zajimawe popołdnjo cyle wutrobnje wita.
Kak chcemy stari być?
Wojerecy. We Wojerowskej měšćanskej bibliotece na Bonhoefferowej wotměje so jutře, srjedu, w 15 hodź. dalše zarjadowanje w rjedźe „Etika a literatura“ hromadźe z łužiskej jězorinowej kliniku. Pod hesłom „Kak chcemy stari być – kak stari chcemy być?“ porěča wo tym, kotre žiwjenske formy su za staršich ludźi trěbne a kmane.
Róčnica ze stawizniskej přehladku
Smječkecy (aha/SN). Zo wědźa Smječkečenjo kóždolětnje swój třidnjowski wjesny swjedźeń na dobrym niwowje přewjesć, móžeše minjeny kónc tydźenja wjele ludźi znowa dožiwić. Wo to postarałoj bě so 44 čłonow wopřijacy wjesny klub ze swojim agilnym předsydu Handrijom Hejdušku a 26 čłonow młodźinskeho kluba, kotryž nawjedujetaj Marian Budar a Benjamin Gregor.
Prěni raz su njedźelu w Njebjelčicach dźěćace čaporowe wiki ...
Krótkopowěsće (18.06.19)
Druhi plan naprawow schwalili
Drježdźany. Sakske statne knježerstwo je dźensa druhi plan naprawow wobzamknyło, z kotrymž chce nałožowanje serbšćiny posylnić a wožiwić. Plan wopřijima dwanaće zaměrow z 21 předewzaćemi. Po słowach přisłušneje ministerki dr. Evy-Marije Stange (SPD) „dyrbi wšudźe znate a samozrozumliwe być, zo w Sakskej tež serbsce rěča“.
Bombu namakali
Baršć/Rogow. Znješkódnjenja bomby z Druheje swětoweje wójny dla dyrbješe dźensa něhdźe 1 500 ludźi w Baršću zawrjeny kruh nimale kilometra wokoło namakanišća wopušćić. 250 kilogramow ćežku bombu běchu wčera při twarskich dźěłach w měšćanskim dźělu Rogowje namakali. Ewakuacija měješe hač do připołdnja wotzamknjena być, a město chcyše naprawu hišće dźensa zaso zběhnyć.
Bydlenje wurumowane
