Z elektromobilom w parku błudźenkow po puću być

štwórtk, 27. junija 2019
artikl hódnoćić
(0 )
Ulrich Klinkert, Elvira Mirle, Klaus Tschöke a Elke Köhler (wotlěwa) wjesela so we parku błudźenkow nad nowym elektromobilom.  Foto: Andreas Kirschke Ulrich Klinkert, Elvira Mirle, Klaus Tschöke a Elke Köhler (wotlěwa) wjesela so we parku błudźenkow nad nowym elektromobilom. Foto: Andreas Kirschke

Wochozy (AK/SN). Łužiski park błudźenkow we Wochozach je wotnětka za ludźi z chorobnym stołom a za tych, kotřiž kmanje chodźić njemóža, lěpje přistupny. Woni móža sej park z nowym elektromobilom wotkryć a wšudźe tam po­zastać, hdźež rjane wuhlady na to přeprošeja.

„Reagujemy tak na wulku ličbu naprašowanjow. Nastajnosći dóstawachmy telefonaty zarjadnišćow za zbrašenych abo tež priwatnych wosobow“, podšmórny předsyda spěchowanskeho towarstwa parka błudźenkow Ulrich Klinkert předwčerawšim na přepodaću jězdźidła. Wone płaći 23 000 eurow. Financowali su je dźakowano spěchowanju z programa „Najlubše blečki za wšěch“ sakskeho ministerstwa za socialne a škit přetrjebarjow. W Pólskej twarjene jězdźidło móža jedna wosoba w chorobnym stole a k tomu třo přewodźerjo wužiwać, abo cyłkownje pjeć wosobow. Elektromobil jědźe ze spěšnosću 15 km/h hač do 40 kilometrow daloko, potom dyrbja jeho baterije zaso nabiwać. Za wodźidłom sedźi sobudźěłaćer parka, kiž po puću jeho zajimawostki rozłožuje.

„To je originelne a pomocliwe“, měnješe Elke Köhler z Běłeje Wody. 61lětna je na chorobny stoł pokazana a bě wutoru prěni raz w parku błudźenkow a zdobom prěnja, kotraž elektromobil wužiwaše. Runje tak wjeseleše so pozdźišo Cindy Tobias z Wojerec. 33lětna sedźi tohorunja w chorobnym stole. „Předewšěm horu­ horje je za mnje ćežko, a runje tak za toho, kiž mje ćišći. Z tajkim elektromobilom je wšitko wjele jednoriše.“

„Nadźijamy so, zo mnohich wužiwarjow chorobneho stoła a ludźi, kotřiž kmanje njechodźa, docpějemy. Tež woni dyrbja składnosć měć sej naš park wobhladać“, rjekny jednaćel parka Klaus Tschöke. Dohromady maja we Wochozach 7,5 km pućikow. Na najwjetšim dźělu z nich hodźi so elektro­mobil wužiwać. Za to su dźěl pućikow zrunali.

Najnowšu naprawu parka wita tohorunja Elvira Mirle, wot lěta 2009 hłownohamtska społnomócnjena za zbrašenych w Zhorjelskim wokrjesu. Po jeje słowach financuja we wokrjesu cyłkownje 13 naprawow přez program „Najlubše blečki za wšěch“, a to we wobjimje 231 000 eurow.­

Wochožanskemu parkej błudźenkow je wažne, zo žane zadźěwki wopyt nje­znjemóžnjeja. Tak maja tam nuzniki za zbrašenych a w zarjadniskim twarjenju lift, z kotrymž dóstanu so zajimcy do wustajeńcy a na zarjadowanja. Nimo toho wupožčeja potrěbnym chorobnej stołaj. Po namjeće Elviry Mirle móhli dalše naprawy pruwować a na přikład wosebite wodźenja za slepych a špatnje widźacych poskićeć. To móhło dalše wopytowarske skupiny přiwabić. Wšitke trěbne informacije nadeńdu zajimcy internetnje pod www.findlingspark-nochten.de.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND