Njebjelčicy (JK/SN). Gmejnski planowar Jules Butuel předstaji na wčerawšim posedźenju Njebjelčanskeje gmejnskeje rady wuslědki pruwowanja a stejišća zastupjerjow zjawnych zajimow k wob­twa­rjenskemu planej za Lindach. Gmejna so hižo wosom lět prócuje zdźěłać za pře­strjeń, hdźež je plahowarnja rancow a kotruž tohodla jako přemysłownišćo wobhladuja, wotpowědne wustawki. Te su zakład za wšě naslědne naprawy, hdyž chcedźa na přikład dalše předewzaća zaměstnić abo hižo wobstejace zawody rozšěrić, ale tež za rozšěrjenje wsy a nowe twarjenja. Na zjawne wupołoženje naćiskow dóńdźechu přewažnje pozitiwne reakcije, a tak móžeše gmejnska rada wčera wustawki wo wobtwarjenju Lindacha doskónčnje wobzamknyć.