Wjesela so nad druhim městnom
Budyšin/Bluń (CS/SN). Wjernarjecy w Załomskej gmejnje su wubědźowanje „Naša wjes ma přichod“ na runinje Budyskeho wokrjesa dobyli a dóstachu za to premiju 1 500 eurow. Druhe městno a 1 100 eurow wubědźi sej Bluń w gmejnje Halštrowska Hola. Wobě wsy wobdźělitej so klětu na sakskim krajnym wubědźowanju. Zastupjerjam wobeju wsow přepodachu nětko myto w Budyskim krajnoradnym zarjedźe.
Posudźowanska komisija pod nawodom Doris Loose z wokrjesneho wuwićoweho zarjada bě wosebje na koncepty wuwića, hospodarske iniciatiwy, socialny angažement a kulturne aktiwity kedźbowała. Kaž wona na mytowanju rjekny, je Bluń přez dobry wonkowny napohlad, čestnohamtsku prezencu a dalše prócowanja wo změnu wot hórnistwoweho k turistiskemu regionej napadnył.
Krótkopowěsće (18.09.17)
Přirodny dźiw we Łužicy
Stróža. Łuka z dźiwimi gladiolemi při Dubjanskim lěsu je přirodny dźiw Němskeje 2017. Wo to prócował bě so biosferowy rezerwat Hornjołužiska hola a haty, wobdźělacy so na wubědźowanju Heinza Sielmannoweje załožby. W interneće móžachu ludźo hač do 10. septembra wo namjetach wothłosować a su so za łuku gladiolow rozsudźili.
Dobrančan najlěpši pišćeler
Freiberg. Z wopytowarskim rekordom su so wčera 22. mjezynarodne Silbermannowe dny w sakskim Freibergu zakónčili. Kaž Gottfried Silbermannowa towaršnosć zdźěla, bě dwanaćednjowski festiwal z cyłkownje 17 koncertami 7 000 ludźi wopytało. Mjezynarodne wubědźowanje na pišćelach je 18lětny Johannes Kral z Dobranec dobył.
Znamjo mjezsobnosće
Zhorjelc. Němsko-pólske namjezne město Zhorjelc chce znamjo za mjezsobnosć w Europje sadźić. K 20. róčnicy podpisanja partnerskeho zrěčenja za europske město Zhorjelc/Zgorzelec planuja klětu wjacore zhromadne akcije. Z minjeny pjatk wotewrjenej wustajeńcu „Mytos Europa“ su přihoty za swjedźenske lěto zahajili.
Wuspěšny start do sezony
Policija (15.09.17)
Paducha kolesow lepili
Budyšin. Swójske koleso, kotrež běchu jej dźeń do toho na Šulskej pokradnyli, je 32lětna žona na Budyskej Róžowej wuhladała a policiju informowała. Zastojnicy tam chwilu łakachu a překwapichu skónčnje młodostneju w starobje 15 a 16 lět, kotrajž chcyštaj koleso wzać. Kaž młódši z njeju přizna, bě wón tele a dalšej kolesy pokradnył. Tež tamnej dwě 15lětny policiji přewostaji.
Duchowna hudźba zaklinči
Budyšin. Lětuši chórowy koncert Katolskeho tachantskeho chóra zaklinči njedźelu, 17. septembra, we 18 hodź. w Budyskej cyrkwi swj. Pětra. Lětsa budźe woprawdźita parlička cyrkwinskeje hudźby słyšeć: „Magnifikat“ Johna Ruttera za sopranowe solo, chór a orchester. Jendźelčan John Rutter je najbóle hraty žiwy komponist cyrkwinskeje hudźby přitomnosće. Jeho twórba „Magnifikat“ zjednoći překrasne melodije z modernymi zwukami a rytmami. Jana Pawoła Nagelowa twórba „Strowa sy, Marija“ a saksofonowy koncert Denisa Bédarda program wudospołnitej. Sopranistku Romy Petrick, saksofonista Tobiasa Witke a spěwarjow chóra přewodźa Serbski komorny orchester. Na pišćelach hraje prof. Martin Strohhäcker, cyłkowny nawod ma cyrkwinskohudźbny direktor Friedemann Böhme. Zastup je darmotny.
Prózdninska zaběra kiwa
Čuja so wobšudźeni a zludani
Róžant (JK/SN). Njedawno wozjewjena powěsć, zo bě gmejna Ralbicy-Róžant swoje znapřećiwjenje nastupajo twarsku próstwu Gröbnerec swójby – rozšěrić Ralbičansku kormjernju swini – cofnyła, je kaž granata do Delan dyriła. Na wčerawšim posedźenju gmejnskeje rady rozkładźe wjesnjanosta Hubertus Ryćer (CDU) pozadki a přičiny rozsuda.
Hižo wot lěta 2013 so gmejna prócuje tomu zadźěwać, zo Ralbičansku kormjernju swini dale rozšěrja a wutwarja. Njepřestajny smjerd kaž tež bjezkónčne transporty přez wjes su přičiny dosć, zo so wobydlerjo tomu spjećuja. Wša jich nadźija chowaše so w znapřećiwjenju gmejny přećiwo twarskej próstwje. Zo su je nětko cofnyli, ma woprawnjene přičiny, kotrež njejsu wina delanskeje gmejny, ale skerje tež Budyskeho krajnoradneho zarjada.
Prěni raz Hórčanski derby
W jubilejnym lěće jěchanskeho towarstwa turněr z nowosću
Hórki (BeW/SN). Hižo 24. raz přewjedźe jěchanske towarstwo Při Klóšterskej wodźe jutře a njedźelu swój turněr w přezpólnym jěchanju, dresurje a skakanju. Poslednje dźěła w Hórčanskim stadionje a kołowokoło njeho su zakónčene, krute zadźěwki steja na łuce a w lěsu, zdónki su składźene a hrjebje wotsyčene.
Z dalšim mužom NDP rěčał
Budyšin (SN/at). Jenož něšto dnjow do wurjadneho posedźenja Budyskeho wokrjesneho sejmika zadźerženja zastupowaceho krajneho rady Uda Wićaza (CDU) dla bu dalši kontakt komunalneho politikarja z NDP znaty. Tak njeje Udo Wićaz jeno z mužom NPD Marcom Wruckom rozmołwu měł a na Facebooku z nim chattował, ale je so nimo toho z nowym Budyskim wokrjesnym předsydu NDP Jürgenom Kühnom rozmołwjał. Budyski krajnoradny zarjad kontakt wobkrući. Kühn bě 11. awgusta naraz „wo durje klepał“ a chcyše wo tym informować, zo Wruck hižo wokrjesny předsyda NDP njeje, ale wón. Referent w běrowje krajneho rady Tobias Schilling rěči wo krótkej rozmołwje mjez Wićazom a Kühnom. Tón pak sćelakej MDR rjekny, zo bě 45 minutow z Wićazom rěčał.
Tak njeje połoženje za čoło Budyskeho krajnoradneho zarjada jednoriše, wšako so cyła wěrnosć hakle poněčim wukopa. Lěwica, SPD a Zeleni čuja so wobkrućeni, zo njemóže Udo Wićaz dlěje w zastojnstwje wostać.
Krótkopowěsće (15.09.17)
Zetkanje kritikarjow
Choćebuz. W tymle měsacu zhladuja potrjechene wsy na dźesać lět wuspěšneho spjećowanja přećiwo brunicowej jamje Janšojce-sewjer. 23. septembra chcedźa přećiwo dalšim jamam w Němskej a Pólskej znamjo sadźić. We Wótšowašu (Atterwasch) zetkaja so na hwězdny pochod. Chcedźa pokazać, zo njeje bój přećiwo Gubinskej jamje w susodnej Pólskej hišće zakónčeny.
Projekt Europskeje unije
Budyšin. Na Serbskej zakładnej šuli Budyšin přewjeduja tuchwilu projekt Europskeje unije na temu „homo et regio“. Zhromadnje z čěskimi šulerjemi wěnuja so wučerjo a dźěći žiwjenju ludźi w regionje. Wutoru chce sej wjace hač 40 serbskich a čěskich šulerjow zhromadnje z wučerjemi na wosebitej rallyeji sprjewine město wotkryć. Hłownje zaběrać budu so z Budyskimi wěžemi. Přewodźeć chce jich suknjerka Teda.
Młodostni hižo dźensa wola
We wobłuku dnja wotewrjeneho pomnika bě minjenu njedźelu tež ...
Policija (14.09.17)
Zastojnika do ruki kusnył
Čerwjene Noslicy. 27lětny muž je so wčera namócnje přećiwo zajeću wobarał. Policiju běchu wołali, dokelž wón nastajnosći po statnej dróze S 111 nóžkowaše. Jako zastojnicy přijědźechu, chcyše wón najprjedy ćeknyć, woni pak jeho dosahnychu. Na to so muž mócnje wobaraše, wućahny samo nóž a jednoho zastojnika do ruki kusny. Štyri wobsadki policajskich awtow běchu trěbne, zo bychu pólskeho staćana pod kontrolu dóstali. Wón steješe po wšěm zdaću pod wliwom drogow.
