Tema wohnjowa wobora steješe w minjenych měsacach hižo wjacekróć na dnjowym porjedźe Radworskeje gmejnskeje rady. Zawčerawšim bě tomu znowa tak.
Radwor (mdź/SN). Dobrowólna wohnjowa wobora w Radworju ma zaso nawodu. Je to znowa Rüdiger Schmidt. Na swojim posedźenju zawčerawšim su jeho Radworscy gmejnscy radźićeljo wobkrućili. Wón běše to tež hižo hač do kónca julija, po tym je wjesnjanosta Wincenc Baberška (CDU) zastojnstwo přechodnje wukonjał.
Zhorjelc (AK/SN). Etat Zhorjelskeho wokrjesa je najprjedy dale blokowany. To podšmórny komornik Thomas Gampe wčera na posedźenju wokrjesneho sejmika. Při tym zhladowaše wón na to, kak su aktualny etat w prěnim połlěće zeskutkownili. „Mamy wotchilenje wot plana we wysokosći minus 5,5 milionow eurow“, wón wuswětli.
Budyšin (SN/at). Z wužiwanjom serbskeje rěče w dźěławosći wokrjesneho zarjadnistwa je so dźěłowy kruh za serbske naležnosće Budyskeho wokrjesa zawčerawšim znowa zaběrał. Kaž wokrjesna społnomócnjena Regina Krawcowa zdźěli, mějachu čłonojo gremija na zakładźe lońšeho zetkanja jasne prašenja. Nawodnica běrowa krajneho rady Uta Döring rysowaše, kak na přikład na serbskosć w nadpismach na lětakach a hamtskim łopjenu dźiwaja, a zo su ryzy serbskorěčny flajer za wukubłanje kubłarkow/kubłarjow wudali. Za medijowy wobłuk – nowiny, internet – chcedźa ramikowe wobstejnosće w nowinarskim běrowje polěpšić. Wjetšina dwurěčnych popisanjow na zjawnych twarjenjach ma kónc lěta zwoprawdźena być, rozłoži nawoda wobchodniskeho wobłuka 1 krajnoradneho zarjada Udo Wićaz. Wón chce tež dalšich posłužbarjow w zjawnosći k dwurěčnemu popisanju pohnuć.
Regina Krawcowa serbskich wobydlerjow znowa namołwi, „wužiwać prawo serbskorěčneje komunikacije, hač ertneje abo pisomneje, na zjawnych zarjadach serbskeho sydlenskeho ruma“.
Spožča Myto Domowiny
Budyšin. Dr. Karlej Kowalewskemu, Margot Hašcynej, Manfredej Hermašej a Dieterej Wendischej spožča lětsa Myto Domowiny. To zdźěli wčera mytowanski wuběrk. Swjedźenske zarjadowanje budźe 13. oktobra w Budyskim Serbskim domje.
Młodostni za projekt počesćeni
Lubij/Berlin. Angažowanych młodostnych z Lubija počesćichu w Berlinje z mytom „CHILDREN Jugend hilft!“. Woni běchu so z projektom „3eck Soccer“ přećiwo mnohim dalšim požadarjam přesadźili. Mandźelska zwjazkoweho prezidenta Franka-Waltera Steinmeiera Elke Büdenbender je jich njedźelu na hrodźe Bellevue přijała. Tamne dny swojeho přebytka wobdźělichu so młodostni na wšelkich dźěłarničkach.
Serbske plakaty zničene
Budyšin. Kandidatka strony SPD za zwjazkowy sejm dr. Uta Strewe wobžaruje zaměrne ničenje serbskich wólbnych plakatow. Wona pak tež wobkedźbuje, zo so nimo serbskich wosebje plakaty socialdemokratow potorhaja, tak zo dyrbjachu je we Wjazońcy, Póckowach, Zemicach-Tumicach, Kulowje, Budyšinje a Wojerecach wuměnić.
Lětsa na Młynkec łuce
Němcy. 10 000 eurow je město Wojerecy do noweho hrajkanišća inwestowało, kotrež su tele dny w Němcach přepodali. Nimo suwadła maja tam nětko čumpjel, dźěćacy karusel a dalše nastroje. W minjenymaj tydźenjomaj su sobudźěłaćerjo komunalneho twarskeho zawoda stare nastroje wotstronili. Nětko chcedźa fundamenty za nowe nastroje kidać. Nanojo ze wsy su wjace hač sto tonow pěska na hrajkanišćo wozyli.
Kóždy dyrbjał pomhać móc
Kamjenc. Na darmotnym dalekubłanju w prěnjej pomocy móža so zajimcy jutře, štwórtk, wot 9.30 do 11.30 hodź. na Kamjenskim Šulskim naměsće wobdźělić. Lěkarjo chorownje swj. Jana kaž tež wuchowanscy asistenća pokazaja, kak móžeš pomoc potrěbneho z masažu wutroby wožiwjeć spytać. „Móže kóždeho trjechić, zo wutroba nadobo bić přestanje. Tohodla dyrbjał kóždy kmany być w tajkim padźe pomhać“, praji lěkarski direktor chorownje dr. Franc Eiselt.
Budyšin (CS/SN). Prěni „karjerowy dźeń“ wotmě so tele dny w Budyskej wotnožce ENSO na Drježdźanskej. Zaměr bě, młodych ludźi na powołanske a studijne móžnosće energijoweho zastaraćela skedźbnjeć a runje tak pokazać, zo poskića ENSO młodym ludźom we wuchodnej Sakskej bydlenju bliske dźěłowe městna. Předewzaće wukubłuje monterow za elektriske připrawy, elektronikarjow a mechanikarjow kaž tež překupcow. ENSO je nimo toho studentam spušćomny partner. Jim, ale tež wšěm dalšim skićeše karjerowy dźeń tójšto zajimaweho. Tak wopytowarjam pokazachu, kak wotměnjawe dźěło přistajenych je a kotru techniku při tym wužiwaja.
Budyšin (SN/MWj). Dźewjaty raz přeproša Budyscy korčmarjo póndźelu, 2. oktobra, potajkim wječor do Dnja němskeje jednoty, na korčmarsku kermušu. Tónraz wobdźěli so dźesać hosćencow a barow, kotrež chcedźa so na te wašnje wopytowarjam za jich swěru přez cyłe lěto dźakować. Zarjadowanje organizuje towarstwo Budyska staroměšćanska tejka. Kaž Melanie Jursch z jeho předsydstwa zdźěli, zaklinči w kóždym z wobdźělenych hosćencow live-hudźba. Hudźbna paleta saha wot rocka přez łaćonskoameriske rytmy hač k srjedźowěkowskim zynkam a italskim spěwam. Zastup je darmotny.
Mjez kapałami budźe tež ta Wotrowčana Juliana Bulanka. Wona chce w hosćencu Culinarium nimo dalšich štučkow tež serbske popowe title hrać, přeradźa hosćencar Roman Wagner. Tohodla drje smě so wón tež lětsa na serbskich hosći wjeselić, kotřiž sej tam po jeho nazhonjenjach zaměrnje dóńdu. Kapały započnu něhdźe w 20.30 hodź. hudźić.