Zakładne zrěčenje za přesydlenje Miłoraza hišće w měrcu podpisaja

Trjebin (AK/SN). Planowane přesydlenje Miłoraza lěta trajacu njewěstosć woby­dlerjow skónči. Za ludźi a za Trjebinsku gmejnu pak je to ćežki krok. To podšmórny wjesnjanosta Waldemar Locke (CDU) na wčerawšim posedźenju gmejnskeje rady. „Tak zhubi so wjes, hdźež su ludźo ze swojej domiznu a z jeje žiwjenskimi wašnjemi zwjazani“, komentowaše wón rozsud LEAG. 14. februara bě ener­gijowy koncern powěsć na njezjawnej wobydlerskej zhromadźiznje zdźělił.

Miłoraz je po słowach Waldemara Locki­ poslednja wjes w Sakskej, kotruž wotbagruja. Rozsud wotpowěduje tym wobydlerjam, kotřiž su so za zawěsćenje dźěłowych městnow wuprajili. Zakładne zrěčenje wo přesydlenju Miłoraza do sewjerneho dźěla Slepoho chcedźa gmejnje Trjebin a Slepo kaž tež LEAG hišće w měrcu podpisać. Wot apryla chcedźa přesydlensku městnosć wotkryć, tam trěbne puće twarić a jednotliwe ležownosće wšěm trěbnym medijam přizamknyć. Najwjetši dźěl něhdźe 200 Miłoražanow chce do Noweho Miłoraza přećahnyć.

Hodźij. Serbski sejm na swoje přichodne zjawne wuradźowanje wutrobnje přeproša. Wone wotměje so sobotu, 9. měrca, w 13 hodź. w Hodźijskej starej šuli pódla cyrkwje na nawsy. Hosćo su tuž witani. Posedźenje zahaja zaso z poskitkom rozmołwow za hosći.

Přeprošeni su předsyda Domowiny Dawid Statnik, dr. Fabian Kaulfürst wot skupiny Kukowskich prašakow kaž tež Hodźijski­ wjesnjanosta Gerald Meyer (njestronjan). Dale chcedźa wobjednawać mjez druhim stejišća ke kóncej wudobywanja­ brunicy, přihoty kubłanskeho wjerška kaž tež dźěłowy staw wuběrka wustawa a prawo nastupajo nutřkowne połoženje serbskeho ludu, přihoty statnych zrěčenjow a připó­znaće jako indigeny lud.

Hižo w 10 hodź. wotměje so dźěłarnička wo zaměrnych krokach k wjace bazowej demokratiji, wo tak mjenowanej třećej mocy, jako dźěłarnja za rozrisanje problemow a za wuwiće konceptow.

Drohe awto zaso maja

Zhorjelc. Nimale 70 000 eurow drohi BMW-kabrio je policija zawčerawšim popołdnju w Kodersdorfje pola Zhorjelca zadźeržała. Jeho 24lětneho wodźerja nachwilnje zajachu. Mjeztym je wón w přepytowanskej jatbje. Wulce motorizowany BMW M 4 je policistam na awtodróze A 4 napadnył, dokelž běštej přičinjenej čisle wot hinašeho awta. Jako chcychu ćmowe jězdźidło pola Budyšina zadźeržeć, stupi šofer na płun. Wón smaleše do směra na Zhorjelc, policisća za nim. Helikopter z powětra akciju přewodźeše. W Kodersdorfje 24lětny A 4 wopušći. We wsy BMW wuhladachu a šofera zajachu. Wón bě jězdźidło w nocy do toho w Badensko-Württembergskej pokradnył. Awto fungowaše bjez kluča. Skućićel bě po wšěm zdaću w běhu sekundow z techniskej pomocu­ škričkowy signal wotpopadnył, awto wočinił a z nim wotjěł.

Wjele lět su swójby w Pančicach-Kukowje a wokolinje dźěći z Černobylskeho regiona hospodowali. Nětko Kamjenske Černobylske towarstwo znowa hóstne swójby pyta.

Kamjenc (SN). Dwaceći dźěći ze zaprudźenych wsow běłoruskeho wokrjesa Buda-Košeljowo přežiwi lětsa w lěću na přeprošenje­ Kamjenskeho Černobylskeho towarstwa tři tydźenje w Kamjencu jako dožiwjenjowpołny prózdninski čas. Runja zašłym lětam budu so wone při sportowych a druhich zaběrach wočerstwjeć, podadźa so na wulětaj do Drježdźan a do Sakskeje Šwicy, pućuja do wokoliny Lessingoweho města a dožiwja zajimawe zetkanja z němskimi kaž serbskimi dźěćimi.