Z hadźicu a bowami hašał

wutora, 09. julija 2019
artikl hódnoćić
(0 )
Na zahrodźe Žurec swójby w Hórkach je widźeć, zo su so sobotu popołdnju płomjenja hižo hač na jeho ležownosć žrali a zo bě je ho statok chutnje wohroženy.  Foto: Marian Wjeńka Na zahrodźe Žurec swójby w Hórkach je widźeć, zo su so sobotu popołdnju płomjenja hižo hač na jeho ležownosć žrali a zo bě je ho statok chutnje wohroženy. Foto: Marian Wjeńka

Žurec swójba wot wohenja pola Hórkow bjezposrědnje potrjechena była

Hórki (SN/MWj). Lětuši folklorny festiwal drje Rüdiger Žur ženje njezabudźe. Spěwar Serbskeho ludoweho ansambla bě sobotu popołdnju runje prěnje čisło programa SLA na farskim dworje zmištrował, jako znaći jemu při jewišću zdźělichu, zo so wokoło jeho statoka na kromje Hórkow lěs a polo palitej a zo by jeho pomoc doma trěbna była. „W prěnim wokomiku njejsym to ani chutnje brał, na to pak sym so w sekundach pře­wo­blekł a domoj smalił. Minutu poz­dźišo njebych tam ani dojěł, dokelž bě z wohnjowymi woborami kaž tež ze sutakami wšitko zastajane“, powěda Hórčan wčera, 48 hodźin po wulkim wohenju, kiž bě so na­ 30 hektarow šćernišća a na dalše šěsć hektarow lěsa wupřestrěł.

Po puću domoj jemu dwě wěcy přez hłowu šusknyštej. Zo móhli wobornicy při jeho domje hašeć, dyrbješe milinu za płót­ wokoło wowčeje pastwy wotpinyć a zdruha přewětrjenje domskeho hasnyć, zo njeby hišće wjace kura a smjerda do domu ćahnyło. Doma so sam do ha­šenja da, škitajo z hadźicu a bowami kromy swojeje zahrody. Hač tam bě so woheń hižo předrěł. W tym wokomiku pak so bliski lěs hižo połnje paleše. Móhłrjec w poslednim wokomiku so wobornikam poradźi tomu zadźěwać, zo škrički na Žurec statok přeskoča. By-li so woheń pjeć metrow dale žrał, by połoženje wo wjele, wjele chutniše było.

48 hodźin po wohenju Rüdiger Žur samo­ z tróšku humorom na hrózbny po­dawk zhladuje. Jako pak sobotu wječor domoj smaleše, jemu bě, kaž zo by něšto w nim přeskočiło, tak zo wón tón wokomik jenož hišće fungowaše, bjez emocijow. Hakle chwilu pozdźišo wón realizowaše, zo mějachu wobornicy bohudźak wšitko w horšći. Wječor je sej samo hišće do Chrósćic dojěł, ale prawy nutřkowny měr wón njenamaka, zo móhł sej programy jednotliwych skupin lubić dać. „Cyły wječor je we mni chětro dźěłało.“

Wčera popołdnju wuhlada Hórčan w bliskim lěsu hišće wjacore městna, hdźež so z lěsneje zemje kurješe a wětřik kuski drjewa stajnje zaso zažehlić da. Někotre bowy wody najprjedy raz najhóršemu wotpomhachu. Na susodnych polach su so slědy wulkeho wohenja mjeztym zminyli, dokelž je Sorabia spalene płoniny přeworała. Z pomjatka Rüdigera Žura a jeho swójby porno tomu so podawki minjeneje soboty ženje njepominu.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND