W Hózku móst ponowjeja – Kulowscy a Ralbičanscy křižerjo pojěchaja hinak
Hózk (SN/JaW). Wot póndźele, 11. měrca, wostanje hłowna dróha přez Hózk za wobchad zawrjena. To zdźěli sobudźěłaćerka nowinskeho wotrjada Budyskeho krajnoradneho zarjada Sarah Günther na naprašowanje. Tež křižerskej procesionaj z Kulowa a Ralbic změjetej so lětsa na wokołopuć nastajić, rěka we wotmołwje krajnoradneho zarjada SN.
Přičina za dospołne zaraćenje dróhi a lětušu wobjězdku křižerjow je ponowjenje mosta nad Čornym Halštrowom. „Móst damy dospołnje zwottorhać a znowa natwarić. Naprawa traje hač do decembra“, Sarah Günther piše. Nowy móst so wot stareho předewšěm w tym rozeznawa, zo njezměje žadyn srjedźanski stołp. Zdobom rozšěrja dołhosć wo dwaj na 26 metrow. „To je wuslědk najnowšich wobličenjow škita před wulkej wodu a z tym zwjazanym wottokom wody.“ Kaž Günther dale připowědźi, připrawja na mosće zdobom nowu šćežku za pěškow.