Módre folije njejsu dowolene

štwórtk, 21. měrca 2019
artikl hódnoćić
(0 )
Jězdźidła wuchowanskeje słužby w Budyskim wokrjesu njesmědźa hižo z módrymi reflektowacymi folijemi polěpjene być. Na někotrych  su je hižo wotstronili (naprawo).  Foto: Christian Essler Jězdźidła wuchowanskeje słužby w Budyskim wokrjesu njesmědźa hižo z módrymi reflektowacymi folijemi polěpjene być. Na někotrych su je hižo wotstronili (naprawo). Foto: Christian Essler

Wuchowanske jězdźidła w Budyskim wokrjesu trjebaja nowy design

Budyšin (CE/SN). Dźakowano njewšědnemu wonkownemu wuhotowanju su wuchowanske jězdźidła w Budyskim wokrjesu dotal dosć napadne. Šoferam je často hnydom jasne, zo so wuchowanske jězdźidło bliži, hdyž na žołtym transporteru markantne čerwjeno-módre smuhi wuhladaja. Před něhdźe dźesać lětami je Budyski ­wokrjes tónle design zawjedł, mějo so po wuhotowanju wuchowanskich jězdźidłow w Belgiskej a Nižozemskej.

Nětko pak dyrbješe wokrjes Budyšin wot prěnich jězdźidłow nalěpjene smuhi zaso wotstronić. Přičina je, zo jedna so při módrych smuhach wo wosebitu foliju, kotraž swěcu reflektuje. Samo na sebi je to dobra wěc, wšako dyrbja wuchowanske awta tež póćmje spóznajomne być. Ale wot lońšeho awgusta tajka folija hižo dowolena njeje, štož woznamjenja, zo potrjechene jězdźidła žane nowe wobkrućenje TÜVa njedóstanu. Tak dyrbješe krajnoradny zarjad pola někotrych zasadźenskich jězdźidłow hižo zapřimnyć a módru reflektowacu foliju wotstronić. Nětko su někotre žołte jězdźi­dła jenož hišće z někotrymi čerwjenymi smuhami po puću.

„Zo su reflektowace folije na jězdźi­dłach wohnjoweje wobory, wuchowanskeje słužby a katastrofoweho škita dowolene, je naležnosć kraja“, wuswětla Sarah Günter z Budyskeho krajnoradneho zarjada. W Sakskej bě dotal jeničce rjadowane, kak maja napadne smuhi na jězdźidłach wohnjoweje wobory a katastrofoweho škita wupadać. W zhromadnym postajenju stej nětko nutřkowne ministerstwo a ministerstwo za hospodarstwo, dźěło a wobchad zakótwiłoj, kotre předpisy za wuchowansku słužbu płaća. A tu je zapisane, zo tajke módre folije dowolene njejsu. Dale tam rěka, zo njeń­dźe jenož wo to, jězdźidła lěpje spóznać, ale tež „normowany wonkowny napohlad w swobodnym staće“ sposrědkować. „Tu­chwilu wobě ministerstwje a Budyski wokrjes wo nadrobnosćach jednaja“, praji rěčnik hospodarskeho ministerstwa. Doniž pak njeje wuwzaćne rjadowanje abo hinaše rozrisanje za jězdźidła w Budyskim wokrjesu namakane, dyrbi krajnoradny zarjad na tych jězdźi­dłach, kotrež dyrbja přichodny čas na hłowne přepytowanje TÜV, módre folije wotstronić.

Štó wotstronjenje folijow płaći, njeje po informacijach z krajnoradneho za­rjada jasne. Potrjechenych je wšitkich 75 jězdźidłow wuchowanskeje słužby w Budyskim wokrjesu. K nim słušeja nimo wuchowanskich awtow tež chorobne transportne a awta nuzowych lěkarjow. Hižo w aprylu abo w meji chcedźa nowe jězdźidło přepodać, kotrež změje dospołnje nowy design, zo bychu přichodnje móžnym konfliktam z puća šli. Nowy design chcedźa potom tež zjaw­nosći předstajić.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND