Na Budyskim spjatym jězoru přewjeduja nětko wědomostny projekt
Budyšin (SN/MWj). Drježdźanska techniska uniwersita a Magdeburgski wobswětowy slědźerski centrum Helmholtz stej sej Budyski spjaty jězor za njewšědny slědźerski projekt wuzwoliłoj. Tu pušćichu wčera na wodu wosebitu płuwacu platformu, na kotrejž je retomas komplikowanych měrjenskich nastrojow instalowany. Platforma wostanje nětko wjacore měsacy na městnje blisko spjateje murje zakótwjena.
Kaž jedyn z nawodow projekta dr. Uwe Spank rozłoži, chcedźa ze slědźerskim projektom hłownje zwěsćić, kelko metana so w jězoru z mikroorganizmow twori a kelko z toho płuna so z wody do powětra dóstawa. To je po počasach dosć rozdźělne, dokelž su na přikład nalěto zymne a ćopliše woršty wody cyle hinaše hač w horcym lěću. Za to je jedna z wědomostnych sobudźěłaćerkow nowy nastroj wuwiła, kotryž njeměri jenož mnóstwo metana, ale tež, w kotrym času a kak intensiwnje tón na powjerch stupa. Dale měrja wuměnu wuhlikoweho dioksida mjez jězorom a powětrom, energijowu wuměnu, kelko wody so wupari a dalše parametry.