Nadźija za Solarworld
Kamjenica. Za wuchodoněmskej tworni twarca solarnych modulow Solarworld we Freibergu a Arnstadće wobsteji nadźija na wuchowanje. Kaž rjadowar insolwency Horst Piepenburg dźensa zdźěli, wón tuchwilu ze skupinu inwestorow wo přewzaću dweju twornjow jedna. Přewzaće pak budźe drje z drastiskim wottwarom dźěłowych městnow zwjazane.
Wjace pjenjez zapósłancam
Drježdźany. Zapósłancy Sakskeho krajneho sejma dóstanu wot 1. awgusta wjace pjenjez. Kaž nowina Freie Presse w Kamjenicy piše, zwyši so měsačne zakładne zarunanje 126 zapósłancow wo 181 eurow na potom 5 668,16 eurow brutto. Zwyšenje wo 3,3 procenty wotpowěduje powšitkownemu wuwiću dochodow. Krajny sejm bě lěta 2010 tajke awtomatiske zwyšenje k 1. awgustej wobzamknył.
Žiwidła na pósće nakupować
Handy wažniši był hač wobchad
Rakecy. Policija prosy wo pomoc při wujasnjenju njezboža. Na Rakečanskej Zahrodowej bě sobotu kolesowar do Daewoowa zrazył – wón bě so bóle handyjej wěnował hač wobchadej – a ćeknył. Na awće nasta škoda něhdźe tysac eurow. Policija pyta za něhdźe 25lětnym 1,75 metrow wulkim mužom z krótkimi čornymi włosami. Koleso měješe tak mjenowane buwołowe wodźidło. Informacije přijimuje Wojerowski policajski rewěr.
Kamjenc (UM/SN). Wokrjes Budyšin je Lessingowemu městu Kamjencej poskićił, jemu płuwansku halu na Macherowej hasy za jenički euro předać. To wuchadźa z lista 1. přirjadnika Budyskeho krajneho rady Uda Wićaza (CDU) Kamjenskemu wyšemu měšćanosće Rolandej Dantzej (njestronjan), kotryž tež Serbskim Nowinam předleži. W lisće skedźbnja Wićaz hišće raz na to, zo hospodarski plan Budyskeho wokrjesa „wot šulskeho lěta 2018/2019 hižo žane etatowe srědki za dalše wobhospodarjenje kupjele njewopřijima“. Nimo toho su wšitke dalše płuwarnje w zamołwitosći jednotliwych městow, komunow abo zaměrowych zwjazkow.
„Wuchadźejo ze zamołwitosće města Kamjenca a wobkedźbujo jeho dalše wuwiće poskićamy wam kup płuwanskeje hale za płaćiznu jednoho eura“, piše 1. přirjadnik krajneho rady mjez druhim Kamjenskemu wyšemu měšćanosće Rolandej Dantzej.
W swojej lětušej dowolowej seriji předstajamy wosoby, kotrež na někajkežkuli wašnje stawizny zachowuja, zo starožitnosće zběraja a je zdźěla zjawnosći spřistupnjeja.
Žana wulka woda
Drježdźany. Najebać dlěje trajacy dešć njeje staw wody w sakskich rěkach dramatisce přiběrał. Někotre pódlanske rěki hornjeho Łobja mějachu drje dźensa rano wjace wody hač hewak, akutneho wohroženja pak njebě, wobswětowe ministerstwo na swojej internetnej stronje zdźěla. Jutře ma so po informacijach wjedrarjow zaso jara dešćować. Potom móhł strach wulkeje wody přiběrać.
Padustwa sadu přiběraja
Podstupim. Braniborscy plahowarjo sadu bědźa so přiběrajcy z padustwami na plantažach. Paduši měrja so na jabłuka, holanske jahody a wišnje, zo bychu je sami přetrjebali abo na wikach předawali, informuje rěčnik Berlinsko-braniborskeho zahrodniskeho zwjazka. Lětsa je to ćim bolostniše, dokelž maja sadowcy nalětnich zmjerzkow dla mjenje płodow.
Čěska chce Libyskej pomhać
200 milionow za nowše awta
Lipsk. Awtotwarc BMW chce lakěrarnju w swojej Lipšćanskej tworni rozšěrić kaž tež twar karoserijow a montažu přerjadować. Za naprawy nałoži 200 milionow eurow, kaž předewzaće dźensa zdźěli. Dźěła chcedźa spočatk přichodneho lěta zahajić a 2020 dokónčić. Zawod ma so tak na produkciju nowych generacijow awtowych modelow přihotować.
Dźiwje swinje so rozmnožeja
Drježdźany. Sakscy hońtwjerjo su lětsa hižo wjace hač 33 250 dźiwich swini třěleli. To je trójce telko kaž w lěće 1991, informuje ratarski minister Thomas Schmidt (CDU). Najebać třělenje wobstatk dźiwich swini dale rozrostuje. To njewjedźe jenož k wjetšim škodam w ratarstwje, ale polěkuje tež rozmnoženju afriskeje swinjaceje mrětwy, kotraž je mjeztym susodnu Čěsku docpěła.
Awta bjez wodźerja testować