Ludźo za strowotnistwo trěbni

Kamjenc. Wjace hač 170 000 dźěławych trjeba Sakska hač do lěta 2030 w strowotnistwje, kaž wuchadźa z wo- bličenja Statistiskeho krajneho zarjada w Kamjencu. Porno poslednjej kalkula­ciji 2015 je to rozrost wo wjace hač 19 000 połnych dźěłowych městnow. Najwjace dźěłowych mocow je trěbnych w hladanskim wobłuku.

Skruća team zarjadnistwa

Stróža. Jako „ranger Hornjeje Łužicy“ znaty Gisbert Hiller přisłuša nětko teamej zarjadnistwa biosferoweho rezerwata UNESCO Hornjołužiska hola a haty, informuje zarjadnišćo. Z Hillerom su přewšo angažowaneho a profesionelneho sobudźěłaćerja za wopytowarski informaciski centrum zdobyli, měni zarjadniski nawoda Torsten Roch.

Priwatny koncern bilion hódny

Jastwu zadźěwał, dalšu pokutu dóstał

Spale. Swojemu zajeću móžeše 51lětny w Spalach předwčerawšim zadźěwać. Poprawom běchu policisća k njemu jěli, zo bychu jeho njepłaćeneje pokuty dla zajeli. Wón pak žadanu sumu na městnje zaruna a njetrjeba tuž do jastwa. „Bohužel“ pak zastojnicy pytnychu, zo měješe pytany, kiž bě so runje z awtom nawróćił, „chorhojčku“. Test wuda 0,5 promilow alkohola w kreji. Nětko budźe muž dyrbjeć znajmjeńša 500 ­eurow płaćić, měsac nóžkować a dóstanje dypk w Flensburgu.

Chrjebja-Nowa Wjes (FAG/SN). Jónu w lěće přeměni so hrodowy park w Chrjebi-Nowej Wsy na swjedźensku milu z mnohimi sportowymi a kulturnymi wjerškami. Minjeny kónc tydźenja bě zaso raz tak daloko, zo wotměchu tam lětni, sportowy a hrodowy swjedźeń – mjeztym hižo 71. raz –, kotryž je tež lětsa zaso tysacy hosći přiwabił. „Hižo pjatk wječor poskići 130 sobuskutkowacych wulku rejwansku show. Lětsa bě na tym šěsć skupin wobdźělenych, kotrež pokazachu wulkotny třištwórćhodźinski program. Pjatkowne předstajenje je generalna proba, wšako rejwansku show njedźelu popołdnju hišće raz pokazaja“, rozłoži Reiner Preuß z kulturneho towarstwa. Lětsa steješe wšitko pod hesłom „Wobkuzłacy swět Disneyjowych filmow“. „Kostimy za program su sej kaž kóžde ­lěto žony ze wsy sami wumyslili a zešili“, Reiner Preuß doda.

Ličba bjezdźěłnych w Hornjej Łužicy je w juliju lochce stupała. To wšak ­bě Budyska agentura za dźěło tež tak wočakowała.

Budyšin (CK/SN). W juliju bě w Hornjej Łužicy 18 990 žonow a muži bjezdźěłnych. To je 159 wjac hač měsac do toho. Kaž wočakowane, je tuž bjezdźěłnosć w regionje lochce přiběrała, dokelž njebuchu mnozy młodźi ludźo, kaž hižo ­minjene lěta tež, po wukubłanju přewzaći. Za přičinu, so znjeměrnić dać, pak to nawoda Budyskeje agentury za dźěło Thomas Berndt nima. „Dźěłowe wiki su robustne a přijimanjakmane“, wón rozłožuje. Berndt je tež wšitkim, kotřiž po wukubłanju dźěło njedóstachu, poručił na agenturu přińć. Tam móža jim aktualnje 4 567 městnow we wuchodnej Sakskej posrědkować. Z 1 134 drje je naj­wjace poskitkow dale z wobłuka dźěła na čas, ale tež w dalšich branšach nowych sobudźěłaćerjow pytaja. Tak maja na přikład w předźěłacym přemysle tuchwilu 893 swobodnych městnow. 420 w strowotnistwje a socialni­stwje, 339 w twarstwje.