Wulka pomoc potrěbnym

pjatk, 24. meje 2019
artikl hódnoćić
(0 )
Smjerdźečan Gerat Róbl pojědźe lětsa přidatnje ze zajimcami do bosniskeho Medźugorja.  Foto: Alfons Handrik Smjerdźečan Gerat Róbl pojědźe lětsa přidatnje ze zajimcami do bosniskeho Medźugorja. Foto: Alfons Handrik

Nimo derje dźěłaceje wohnjoweje wobory a młodźinskeho kluba skedźbnjeja na Smjerdźacu w Delanach hnydom štyri daloko znate towarstwa. Jedne z nich je w meji 2001 załožene Towarstwo swj. Filomeny ze swojimi dźewjeć čłonami.

Smjerdźaca (aha/SN). 1995 přepoda te­hdy 34lětny Gerat Róbl jako čłon Towarstwa Cyrila a Metoda na putniskej jězbje do Medźugorja za dźěćace rehabilitaciske srjedźišćo w Chorwatskej pjenježnu zběrku. Dokelž bě widźał, kak trěbna tam pomoc nuzu tradacym je, ale tež w Bosniskej, Bołharskej a druhdźe, stara so wón wo pjenježne zběrki a twarski material. Při tym jeho łužiske twarske firmy podpěraja. Gerat Róbl je wjele po puću. W Medźugorju bě hižo wjace hač połsta razow a zmóžni tež mnohim ludźom sej tam dojěć. Tak organizuje putniske jězby. Hakle njedawno tam zaso bě. Dokelž tež za planowanu jězbu w nazymskich prózdninach hižo žanoho městna nima, je so Róbl rozsudźił, wot 31. awgusta do 7. septembra dalšu spřihotować.

Wot časa załoženja Towarstwa swj. Filomeny je Gerat Róbl jeho předsyda. Kóžde druhe lěto je wjele mocy za přewjedźenje – loni bě to 13. raz – beneficneho koncerta we Łazku nałožił. Dźesać lět po załoženju towarstwa poby na přeprošenje prof. dr. Mileny Waleweje w bołharskim městačku Razgrad. Štož je tam w chorownjach, syrotownjach a sydlišćach mjeńšin kaž Sintow a Romow widźał, zamóže lědma wopisać. Tuž je so rozsudźił, tež tam pomhać. Naprašował je so w Pančičanskej apotece, hdźež dósta telefonowej čisle. Prěnja naprašowana firma njemóžeše pomhać. Zamołwita pola rady města w Halle porno tomu chcyše wědźeć: „Kak wulke maće nakładne awto? Móžeće dóstać, kelkož trjebaće.“ Z wulkim nakładnym awtom su tam 35 paletow ze srědkami za hladanje dźěći a starych ludźi wotewzali. W Razgradźe bě to wulka pomoc, štož zaruči potrjebu chorownje, starownje a dźěćaceho domu na dwě lěće. Dwójce – stajnje něhdźe 6 000 eurow – bu dobytk beneficneho koncerta we Łazku přepodaty za socialne projekty w Razgradźe. Zo bychu pomocne srědki sprawnje rozdźělili, je Smjerdźečan pomhał załožić towarstwo Odyseja, kotrež Silwija Walewa nawjeduje.

Lětsa jutry wopyta bywši krajny rada regiona Razgrad Pjotr Wasil Łužicu. Wón je socialnje angažowany a jeho dźowka – šulerka na tamnišim gymnaziju – derje němsce rěči. Wotpohlad Wasila je, na wsy njedaloko Razgrada załožić projekt, podobny Misionskemu dworej w Lěskej. W lěću chce so Gerat Róbl wospjet do Razgrada podać, zo by sobu jednał a projekt nastorčił.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND