Policija (08.06.17)

štwórtk, 08. junija 2017 spisane wot:

Wopity z pokradnjenym mopedom

Budyšin. 21lětneho wodźerja mopeda typa S 51 je policija w nocy na srjedu w Budyšinje kontrolowała a při tym hnydom wjacore delikty zwěsćiła. Młody muž scyła žanu jězbnu dowolnosć njeměješe a moped tež zawěsćeny njebě. Nimo toho měješe wón 0,78 promilow alkohola w kreji. A skónčnje so wukopa, zo bě 21lětny moped krótko do toho pokradnył. Nětko drje so z tymle padom statne rěčnistwo dale zaběra.

Kolesa wotšrubowali

Bukecy. Swjatkowny kónc tydźenja pobychu njeznaći na terenje firmy w Bukecach. Tam wotšrubowachu wot wosoboweho awta typa VW Passat wšitke štyri kolesa. Dale měrjachu so woni na Audi. Tomu pobrachujetej nětko wonkownej špihelej. Cyłkowna škoda wučinja dohromady nimale 2 000 eurow.

Skupinarjo rjedźa

štwórtk, 08. junija 2017 spisane wot:

Pančicy-Kukow. Čłonojo Domowinskeje skupiny Pančicy-Kukow njech njezabudu na swoju přichodnu rjedźensku akciju při pomniku Jakuba Barta-Ćišinskeho w Lipju, kotraž budźe sobotu, 10. junija. Wobdźělnicy zetkaja so w 9 hodź. Njech sej kóždy trěbny dźěłowy grat sobu přinjese.

Wo narodnostnej politice

Budyšin. Europski klub přeprošuje pjatk, 9. junija, we 18 hodź. na přednošk a diskusiju na temu „Narodnostna politika Španiskeje republiki“. Zarjadowanje wotměje so na žurli Budyskeho Serbskeho domu. Referent budźe Raúl Alfredo Enzenbach z Magdeburga. Jako zawod porěči zapósłanc Sakskeho krajneho sejma Hajko Kozel (Lěwica) wo narodnostnej politice Weimarskeje republiki a nacistiskeho knježerstwa wot 1918 hač do 30tych lět 20. lětstotka. Moderěrować budźe publicist Sieghard Kozel.

Při Pastwinej horje twarja

Nadźija za lokomotiwu

štwórtk, 08. junija 2017 spisane wot:

Darowanska akcija ma techniskemu pomnikej při dwórnišću pomhać

Budyšin (CK/SN). Z hiobskej powěsću je Budyski měšćanski radźićel Heinrich Schleppers wulke rozhorjenje wuskutkował. W socialnych syćach wón rozprawješe, zo drje so stara parna lokomotiwa před Budyskim dwórnišćom wuchować njehodźi, dokelž za to trěbne 50 000 eurow tola nazběrać njemóže. Hišće w aprylu bě połoženje hinaše a cyła naležnosć po dobrym puću. Kaž radźićel CDU tehdy rjekny, je předewzaće zdobył, kotrež móhło lokomotiwu bjez krana na nowe městno dowjezć. Dalša firma chcyše so wo kolije starać. Nowe městno bě namakane a za lokomotiwu drje tež nowy wobsedźer. To bě wjelelubjace. Do Božeho spěća dochadźeše pak powěsć, zo dyrbi so lokomotiwa hač do kónca junija z naměsta před dwórnišćom zminyć. Trěbne pjenjezy za to, ju na nowe městno přenjesć, pak nazběrane njeběchu.

Nowe wustawki za pohrjebnišćo

štwórtk, 08. junija 2017 spisane wot:

Wulka Dubrawa (CS/SN). Lěsne pohrjebnišćo we Wulkej Dubrawje steješe w srjedźišću zašłeho posedźenja tamnišeje gmejnskeje rady. Za nje mějachu radźićeljo nowe wustawki a nowy porjad płaći­znow wobzamknyć. Wustawki běchu trěbne, zo bychu jednotny wonkowny wobraz zaručili. To potrjechi předewšěm wysokosć narownych kamjenjow. Tak maja tam jednoho „rekordnika“ z 3,40 metrami wysokosće. Tajkim padam chcedźa přichodnje zadźěwać. W nowych wustawkach je zapisane, zo maja narowne kamjenje maksimalnje meter wysoke być.

Mjez 88 skupinami, kotrež so w Budyskim wokrjesu na 48hodźinskej akciji wobdźěla, je prěni raz 9. lětnik Ralbičanskeje wyšeje šule. Šulerjo a šulerki wuplěchu a porjeńšichu dźensa dopołdnja šulsku zahrodu zakładneje šule, pomhachu kubłarkam Ralbičanskeje­ pěstowarnje při rjedźenju meblow a přewzachu tam dalše dźěła. W mjenje gmejny Ralbicy-Róžant so Michał Šołta (2. wotprawa) z pokalom a wopismom za angažement młodostnych podźakowa. Přichodne dny so tohorunja Smječkečanski młodźinski klub, 9. lětnik Worklečanskeje wyšeje šule kaž tež dwě skupinje z Kulowskeje šule na akciji wobdźěla. Foto: Franciska Zopic

Hrajnišćo w Rakojdach ponowja

srjeda, 07. junija 2017 spisane wot:
Wulke wjeselo knježeše wčera w Bartskim sportowym towarstwje. Andreas Schumann ze sakskeho nutřkowneho ministerstwa (2. wotlěwa) přepoda přizwolenje za 32 000 eurow spěchowanja. Te kaž tež někotre bule přijimowaše předsyda towarstwa Frank Nowak (2. wotprawa). Z pjenjezami móža twjerde hrajnišćo w Rakojdach ponowić, při čimž chcedźa so sportowcy sami gratu přimać. Dohromady inwestuja 65 000 eurow. Tole zwjeseli wčera tohorunja zapósłanca Sakskeho krajneho sejma Marka Šimana (nalěwo) a Malešanskeho wjesnjanostu Matthiasa Seidela (naprawo, wobaj CDU). Foto: Carmen Schumann

Policija (07.06.17)

srjeda, 07. junija 2017 spisane wot:

Kolesowarka znjezbožiła

Budyšin. Při wobchadnym njezbožu ­ćežko zraniła je so wčera kolesowarka w Budyšinje. 66lětna jědźeše na Mužakowskej do směra centruma. 25lětny wodźer wulkeho nakładneho awta chcyše tam naprawo na Schäfferowu wotbočić, ­rentnarku je po wšěm zdaću přewidźał a do njeje załoži. Při tym so wona ćežko ­zrani, tak zo dyrbjachu ju k lěkarskemu zastaranju do bliskeje chorownje dowjezć. Wobchadna njezbožowa słužba nětko za dokładnymi přičinami zražki slědźi.

Za ležownosće so dale zajimuja

srjeda, 07. junija 2017 spisane wot:

Gmejnska rada Ralbicy-Róžant nowy koncept předstajiła

Róžant/Sernjany (JK/SN). Kónc meje je gmejnska rada Ralbicy-Róžant přepro­syła tych, kotřiž maja dale zajim, na ležownoći Při Hórce w Sernjanach twarić, zo by jim předstajiła předźěłany a znowa wob­ličeny koncept, kak ma na ležownosći w Sernjanach dale hić. Nowy a na za­jimy přichodnych twarcow wusměrjeny projekt bě zdźěłał a wobličił Ralbičanski projektant Stanisław Statnik. Nastork za to­ běchu radźićeljo dali na posedźenju gmejnskeje rady w aprylu, po tym zo běchu so wjacori twarscy zajimcy za dalšim postupom w Sernjanch naprašowali.

Mnozy sej wětrnik wobhladali

srjeda, 07. junija 2017 spisane wot:

Kaž na mnohich dalšich městnach wotmě so zawčerawšim tež w Němcach Němski dźeń młynow, a to hižo 21. raz. Z njewěstym wuhladom na wjedro natwarichu čłonojo towarstwa stany a z dobrym wjedrom w 10 hodź. hosći witachu. Hižo při zahajenju běše nawal za wodźenja po młynje wulki. Wučerka Daniela Krügerowa hosćom jara nazornje techniku a stawizny młyna rozłoži. Mjeztym bě tež wulki nawal pola plahowarjow nuklow, kiž mějachu wustajeńcu swojich štyrinohatych lubuškow přihotowanu. Někotre zwěrjata sy w tomboli samo dobyć móhł. Němčanski dom žiwjenskeje pomocy demonstrowaše, kak so korbiki pletu a je tež předawaše. Tež hobbymolerka Wórša Walterowa wustaješe swoje wobrazy. Při stejnišću za třělenje bě zajim wulki. Mjeztym dachu sej hosćo šaš­liki a praženu kołbasu słodźeć.

Wosebje bohaty běše wuběr tykanca, tak zo po wobjedźe mnoho hosći na kofej přichwata. Mjeztym móžachu dźěći paslić a na ponijach Wojerowskeje dźěćaceje a młodźinskeje farmy jěchać. Čłonojo towarstwa běchu z wopytom přewšo spokojom. Achim Nowak

Předewšěm z klasikarjemi zahorił

srjeda, 07. junija 2017 spisane wot:
Před wupředatymi trawersami na Kamjenskej Pastwinej horje je woblubowany šlagrowy­ spěwar Roland Kaiser minjenu njedźelu koncertował. We wobłuku swojeje lětušeje live&openair-tury wón syły přihladowarjow tež z nowšimi spěwami zahori,­ předewšěm pak ze swojimi znatymi klasikarjemi, kaž „Joana“ abo „Santa Maria“. Dokelž bě koncert hižo dlěje wupředaty, bě nawal ludźi wotpowědnje wulki. Mnozy ani sčasom njedočinichu, tak zo Roland Kaiser štwórć hodźiny pozdźišo koncer­tować započa. Foto: Daniel Schäfer

Serbska debata

nowostki LND