Wšě wagony do Sprjewje padnyliW druhej połojcy 19. lětstotka za ...
W druhej połojcy 19. lětstotka za čas industrializacije twarjachu tež w Hornjej Łužicy železniske čary. Runočasnje nastachu dwórnišća, stražniske chěžki a wuhibkarnje. W lětnjej seriji so rozhladujemy, kak trěbne wone něhdy běchu a što je so z nimi stało. (8)
Wot spočatka decembra 1890 móžachu ludźo z ćahom z Rakec do Budyšina a wróćo jězdźić. Runočasnje twarjachu při čarje nimo dalšich tež zastanišćo na Židowje. Wone steješe samotne na kóncu Židowskeho wjesneho puća, wjeduceho po dole Jordanoweje rěčki. Za Židowčanow kaž tež Ćemjerčanow bě to spomóžne wolóženje, zo njetrjebachu hač na zastanišćo w Ratarjecach abo samo na Budyske dwórnišćo nóžkować. Wjetši wuznam pak měješe zastanišćo na Židowje za wobydlerjow a personal bliskeho, wot lěta 1873 wobstejaceho wobwodneho hojenskeho wustawa, z kotrehož wutworichu 1924 hladarnju.
Upcycling steješe dźensa w srjedźišću prózdninskeho poskitka w ...
Kulojte blido babow ze žadanjemi
Sakske baby a frakcija Zelenych w Sakskim krajnym sejmje maja zhromadne zaměry. Zeleni žadaja sej dalšu podpěru swobodneho stata hladajo na financowanje babow a jich skutkowanje na dobro młodych swójbow.
Drježdźany (SN/MiR). Hladajo na dale a wjac porodow ma so ličba łožow w tuchwilu 41 sakskich porodnych klinikach přepruwować. Centralny problem wostanje nuznje trěbna reforma winowatostneho zawěsćenja za baby. Kulojte blido babow, kotrež bu na iniciatiwu frakcije Zelenych kaž tež sakskeho zwjazka babow załožene a na kotrymž wobdźěleja so tež serbscy zajimcy, je so pod mjenom „Pomoc k porodej a zastaranju babow“ wospjet w njeprawidłownym wotstawku wotměło. Přichodnje chce so gremij dwójce wob lěto schadźować.
Krótkopowěsće (19.07.18)
Polěpša wohnjoškit
Picnjo. Po wohenju na něhdźe 80 hektarach w Luboraskej holi chcedźa tam wohnjoškitne pasma rozšěrić. To ma wokolne lěsy a wsy lěpje škitać, pisa Picnjanske krajne wyše lěsnistwo. Dale rozmysluja wo tym, lěsne puće wutwarić a přidatne studnje twarić, zo by zastaranje z hašenskej wodu zawěsćene było. Njedawny woheń su hakle po dwěmaj dnjomaj zhašeli.
Digitalny portal za fachowcow
Drježdźany. Pod www.heimat-fürfachkräfte.de maja nětko za wšěch, kotřiž chcyli do Sakskeje ćahnyć, nowe poskitki. Kaž zdźěli sakski hospodarski minister za Martin Dulig (SPD), ma portal być digitalny pućnik. Z pomocu karty namakaja zajimcy zdobom wšitke pěstowarnje, šule a dalše kubłanišća w regionje, do kotrehož chcedźa.
Za wuspěšny studij
Policija (18.07.18)
Spinadła zaprajili
Worcyn. Wodźer traktora je so zawčerawšim při wobchadnym njezbožu pola Worcyna ćežko zranił. Na wuskim puću dyrbješe wón borzdźić. Po wšěm zdaću pak spinadła dweju připowěšakow zaprajichu, tak zo wozaj do napřećo přijěduceho Lkw-ja zrazyštej. Nakładowany rěpik so na jězdnju wusypa.
Tři kapały na Pastwinej horje
Kamjenc. Po wuchodoněmskich rockowych legendach swjatki sobotu na Kamjenskej Pastwinej horje dožiwja tam sobotu, 28. julija, dalši koncertny wjeršk lěta. Tón dźeń hudźa tam wot 19 hodź. hnydom tři znate kapały zašłych lět, mjenujcy Nazareth, Creedence Clearwater Revived (CCR) a Omega. Zastupne lisćiki dóstanu zajimcy w znatych předpředawanišćach abo internetnje pod www.eventim.de.
Cyła wjes swjeći
Sulšecy. Z natočenjom piwa a wubědźowanjom wohnjowych wobornikow nad 40 lětami započnje so zajutřišim, pjatk, lětuši wjesny swjedźeń w delnich Sulšecach. Wječor pokazaja filmy z wjesneje „čapornje“. Sobotu wot 13 hodź. steji wubědźowanje w třělenju jědnatkow na programje a wot 21 hodź. tak mjenowany „WiesnBeats“. Wjeršk budźe njedźelu w 16 hodź. swjedźenski program „Sulšecy news“. Wjesna rada, wohnjowa wobora a młodźina wšitkich přeprošeja.
Rozmołwy lěpše hač chłostanje
Kulow (AK/SN). Po tym zo běštaj w Kulowskim policajskim běrowje dwaj zastojnikaj na wuměnk šłoj, su tam z třomi połnymi městnami zaso dospołnje wobsadźeni.
Jedne z třoch městnow ma Kristin Hänsel, wobydlerska policistka za Kulow a Wóslink. Po wuchodźenju šule wuknješe wona na Drježdźanskej policajskej šuli. Najprjedy je w Drježdźanach koparske hry, koncerty a demonstracije sobu zawěsćiła. Pozdźišo skutkowaše we wšědnej policajskej słužbje we Wojerecach. „Wobchadne njezboža a zadobywanja wobdźěłać, rozestajenja mjez susodami wujednać a přeńdźenja chłostać běchu moje nadawki“, powěda 43lětna policajska hłowna mišterka. Lěpšina bě, zo měješe stajnje kolegu poboku, z kotrymž móžeše so wothłosować.
Nowa hala za twarski zawod
Radwor (SN/MkWj). Radźićeljo Radworskeje gmejny su wčera wječor wuhibki za twar noweho domicila gmejnskeho twarskeho zawoda połožili, přepodawši nadawki twarskim zawodam, kotrež běchu so na zjawnym wupisanju wobdźělili. Nastać ma nowa hala za nimale 250 000 eurow při wohnjowej woborje. Wjesnjanosta Wincenc Baberška (CDU) wopodstatni přidatne wudawki z njeznjesliwymi wuměnjenjemi za dźěłaćerjow mjez druhim w sanitarnym wobłuku. Wón pak zdobom na to skedźbni, zo njebychu sej přidatne wudawki dowolić móhli, njeby-li swobodny stat kóždej gmejnje 70 000 eurow přidatnje přewostajił.
Hospodarski plan dwělomny
Wyši měšćanosta Běłeje Wody rozsudej radźićelow znapřećiwił
Běła Woda (CK/SN). K wurjadnemu posedźenju zetka so jutře, štwórtk, Běłowodźanska měšćanska rada. W juniju bě wjetšina jeje čłonow hospodarski plan 2018 wobzamknyła. Přećiwo tomu pak je wyši měšćanosta Torsten Pötzsch (Klartext) na komunalnym dohladowanskim zarjedźe Zhorjelskeho wokrjesa weto zapołožił. Njerozrisane dypki su přistajenski stop w měšćanskim zarjadnistwje, lisćina šmórnjenych inwesticijow a přenjesenje dobytka komunalnych firmow na město.
Wulke přeće so nětko spjelni
Byrnjež prózdniny byli, knježeše na dworje Worklečanskeje šule wčera popołdnju čiłe žiwjenje. Tójšto dźěći, ale tež jich starši a dalši wjesnjenjo su snano nic historiski, ale přiwšěm wažny podawk dožiwili.
Worklecy (SN/MWj). Wšitke ample za twar noweho horta we Worklecach pokazuja wot wčerawšeho zelenu swěcu. Z rukow statneho sekretara w sakskim wobswětowym a ratarskim ministerstwje dr. Franka Pfeila přija wjesnjanosta Franc Brusk (CDU) přizwolenje za spěchowanske srědki we wobjimje 1,35 milionow eurow. To wotpowěduje 75 procentam cyłkowneje inwesticije nimale dweju milionow eurow. Za Worklečansku gmejnu zbywa 469 000 eurow swójskeho podźěla. Tón financuja ze 169 000 eurami z tak mjenowanych swójskich likwidnych srědkow a z kreditom 300 000 eurow, kaž Franc Brusk wčera rozłoži. Twarsku dowolnosć gmejna hižo ma.
