Delnjowujězdźan najlěpši škotowar
Srjedź decembra wotzamknychu serbscy seniorojo-škotowarjo w Radworskim hosćencu „Meja“ swoje turněry lěta 2018. Dnjowy dobyćer, Křesćan Weclich z Nuknicy, bě z wukonom 2 659 dypkow spokojom, njemóžeše so pak po wuspěšnych lětach tónraz mjez prěnimi třomi zaměstnić. Nimale přez cyłe lěto bě Franc Nowak z Noweje Wjeski tabulku nawjedował, na poslednim turněrje pak je jeho Wolfgang Kühne z Delnjeho Wujězda hišće přesćahnył. Ze solidnym wukonom bu Jurij Hanto z Budyšina dobry třeći. Dalši zaměstnjeni su Křesćan Weclich, Herman Woko, Siegfried Rawa a Pawoł Šołta-Šunowski.
Cyłkownje je so lětsa 32 škotowarjow na dwanaće turněrach wobdźěliło, štož je snadnje mjenje porno minjenym lětam. Najebać to zahaja woni w januaru 2019 w Lejnjanskim Kubicec hosćencu swoju jubilejnu „slěbornu“ sezonu.
We Łazu adwentne wiki přewjedli
Pytaja swěrnych pomocnikow
Kamjenc (SN/mwe). Kamjenske Černobylske towarstwo hižo lěta prózdninske přebywanje dźěći z běłoruskeho Budy Košeljowa organizuje. Tak dožiwichu holcy a hólcy wottam tež we Wotrowje a wokolinje w swójbach rjane prózdniny. Jedyn z hłownych organizatorow tajkich přebytkow bě Hubert Kokla z Pančic-Kukowa. Dźakowano jeho iniciatiwje běchu dźěći wuběrnje zastarane, móžachu so na wulětach a njezapomnitych dožiwjenjach ćělnje kaž tež dušinje wočerstwić.
Zo bychu potrěbnym z Budy Košeljowa kaž tohorunja na diabetes schorjenym dźěćom tež přichodnje pomhać móhli, prosy Černobylske towarstwo wo podpěru. „Mamy wulku starosć. Njetrjebamy nowe mocy jeno za njeposrědnje hladanje dźěći, ale runje tak za swoje organizatoriske a zarjadniske skutkowanje“, towarstwo namołwja. To rěka, zo pyta dalšich čestnohamtskich pomocnikow. Rady móža to tež šulske rjadownje być, kotrež sej hrajkanje z hóstnymi dźěćimi, pućowanje z nimi abo sportowanje jako projekt předewzaja?
Nowy kalender požadany
Hamor (SN). „Kołowokoło Bjerwałdskeho jězora 2019“ rěka nowy lětny kalender łužiskeje jězoriny. Za šěsć eurow móža sej jón zajimcy mjez druhim na Hamorskim gmejnskim zarjedźe kupić. Widźeć su wšelake fotowe motiwy, kaž swětłownja při jězoru. Požadany hodowny dar pak su tohorunja zastupne lisćiki za klětu planowane zarjadowanja w Dźiwadle we Wuchu.
Na farmje swjećili
Wojerecy (SN). Wulke wjeselo knježeše minjeny tydźeń mjez wopytowarjemi Wojerowskeje dźěćaceje a młodźinskeje farmy. 30 holcow a hólcow swjećeše tam swoju adwentničku, a to ći, kotřiž nimale wšědnje na farmu, zarjadnišćo Miłočanskeho Křesćansko-socialneho kubłanskeho skutka, přichadźeja, zo bychu tam skót picowali. Někotři w cirkusu Krabatino sobu skutkuja, dalši so na projektach wobdźěleja. Za swoju adwentničku dóstachu wot Wojerowskeho Lionsoweho kluba 350 eurow darjene.
Čitanski dobropis darić
Nowa wjednica
Wojerecy (SN). Annemie Klein nawjeduje wot 1. decembra Wojerowsku měšćansku biblioteku Brigitty Reimann. Za 50lětnu, kotraž naposledk w badensko-württembergskim Kehlu bydleše, je to štwórta knihownja we wodźacej funkciji. Do toho nawjedowaše wona mjez druhim 20 lět Kelkheimsku měšćansku biblioteku.
Zo je so bibliotekarka z bliskosće francoskeje hranicy sem přesydliła, ma wjele činić z wuběrnym mjenom Wojerowskeje biblioteki. Wšako wuznamjenichu hornjołužisku wupožčowarnju knihow, tež serbskich a mnohich dalšich medijow, wjacekróć z bibliotekowym indeksom BIX jako jednu z najlěpšich Němskeje. Prawidłownje wotměwaja tam lěta tež serbske čitanja a koncerty.
Annemie Klein so wjeseli, zo bě ju puć do Wojerec wjedł. „Złote wuznamjenjenje z indeksom BIX lubi inowatiwne mustwo a wulkotnu biblioteku“, zhladuje nowa wobydlerka města połna nadźije na swój nadawk. Wot wšeho spočatka so wona tu kaž doma čuje. Najwažniši pak su jej swěrni čitarjo.
Dźeń a wjace awtow
Wobydlerjo so wobchadej Lkw-jow spjećuja
Hamor (AK/SN). W gmejnje Hamor so wobydlerjo dale a bóle hněwaja, dokelž wobchad nakładnych awtow masiwnje přiběra, podšmórny Hendrik Scholz (Hamorske wolerske zjednoćenstwo), prěni naměstnik wjesnjanosty, njedawno na posedźenju gmejnskeje rady.
Hižo kónc nowembra su ludźo w Cymplu (Zimpel), wjesnym dźělu Klětnoho, demonstrowali. W tym času wosta dróha přez wjes dospołnje zawrjena. „Wobydlerjo chcychu z akciju na nadróžny staw a situaciju powjetšaceje so ličby nakładnych awtow pokazać“, rjekny Hendrik Scholz. „Zhorjelski wokrjes jako za dróhu zamołwity je nětko prašany.“ Po zdźělenju chce tón wot lěta 2020 dróhu přez Cympl saněrować. Wobydlerjo so nadźijeja, zo budźe potom mjenje wulkich awtow přez wjes jězdźić.
Pjekarnja změje bórze kofejownju
Klóšterska pjekarnja w Pančicach-Kukowje přisłuša dźěłarni za zbrašenych swj. Michała. Rady tam wobydlerjo ze wsy kaž tež z wokoliny wšědnje čerstwe pječwo kupuja.
Pančicy-Kukow (SN/mwe). Wot lěta 2016 je na Budyskej dróze w Kamjencu mały pjekarski wobchod klóštra Marijineje hwězdy zaměstnjeny. Wot wutory do pjatka wot 6 do 13.30 hodź. a sobotu wot 7.30 do 9 hodź. předawaja tam čerstwe pječwo z Pančičanskeje klóšterskeje pjekarnje. Ta je wotnožka dźěłarnje za zbrašenych swj. Michała, kotruž Karin Cyžowa nawjeduje.
Mjeztym wobsteji Kamjenski wobchod dwě lěće. Při wotewrjenju předawanišća chcychu tam zamołwići z klóštra jenož „probowy přechod“ zarjadować. Dokelž pak su Kamjenčenjo pječwowe předawanišćo tak derje přiwzali, a dokelž jim a druhim chlěb a całty, tykanc, wosušk a poprjančki z klóšterskeje pjekarnje tak derje słodźa, nochcychu wobchod na žadyn pad zawrěć. „Je wažne, zo so jako klóšter a dźěłarnja za zbrašenych zjawnosći prezentujemy. Chcemy pokazać, kotre dźěła móža tež zbrašeni na dobro druhich dosć wušiknje wukonjeć, štož jim wjeselo wobradźa“, Karin Cyžowa podšmórnje.
Nowe awto Choćebuskej tafli
Zeppelinowa dróha w Budyšinje je wot dźensnišeho zaso za wobchad ...
Město měło nošer šule być
Město Wojerecy da bywše twarjenje Konrada Zusoweho gymnazija dospołnje saněrować a rozšěrić. Moderna centralna wyša šula ma 2020 dotwarjena być. Nastupajo nošerstwo maja měšćanscy radźićeljo hišće potrjebu rěčeć.
Wojerecy (AK/SN). Spočatk šulskeho lěta 2020/2012 chce město Wojerecy jako twarski knjez a nošer nowu centralnu wyšu šulu za wšědne wuknjenje wotewrěć. Za to pomnikoškitany bywši domicil Konrada Zusoweho gymnazija dospołnje saněruja a rozšěrja jón wo dalše twarjenje. „Na terminje dotwara w lěće 2020 wobstawamy“, podšmórny Dietmar Wolf, nawoda wěcneho wobłuka twarstwo města Wojerec, na wčerawšim posedźenju měšćanskeje rady. 25 twarskich přemysłow je wupisanych, štož wotpowěduje 70 procentam twarskeho wobjima. „Předewzaće leži tuchwilu w časowym planje.“ Nimale 11,9 milionow eurow wučinja dospołny budget. „Přizemjo za rozšěrjenski twar je nětko hrubje hotowe“, Wolf zdźěli.
