Smartphone město móšnički

Budyšin. Klienća Budyskeje wokrjesneje lutowarnje móža kaž ći 300 dalšich lutowarnjow wot dźensnišeho nakup ze smartphonom zapłaćić. To je móžno z „mobilnym płaćenjom“, w druhich krajach hižo dosć rozšěrjenym. Zapłaćenje je wěste, dokelž wučinja wotstawk mjez terminalom a smartphonom jenož něšto centimetrow. Za to trjebaš wotpowědnu app z Google-play-stora.

Tomasz Stańko njeboh

Waršawa. Wuznamny pólski trompetar Tomasz Stańko je njeboh. Pućrubar europskeho jazza je něhdźe 40 zynkonošakow nahrawał. Zwonka fachoweho publikuma bě wosebje znaty přihladowarjam ameriskeje serije „Homeland“, w kotrejž jeho kompoziciju „Terminal 7“ jako dźěl titulneje melodije wužiwachu. Wčera je Stańko 76lětny zemrěł.

KaBi přećehnje do přitwara

Njezbožo njedaloko tankownje

Słona Boršć. W Słonej Boršći je wčera připołdnju 63lětna wodźerka Audija na křižowanišću blisko tankownje nakładnemu awtu předjězbu wzała. Na zbožo dyrbješe policija jenož blachowu škodu na wosobowym jězdźidle registrować.

16lětny so zatepił

Nysowa łučina. Srjedu popołdnju je so 16lětny w Nysowej łučinje (Neißeaue), njedaloko kulturneje kupy Einsiedel na pólskim brjohu Nysy zatepił. Něhdźe w 16 hodź. hólcaj widźeštaj, kak so jeju přećel we hłubinje wody zhubi. Nan hólčeca přihladowaše, kak jeho wobornicy pozdźišo mortweho z wody ćehnjechu.

Hodźij (SN/mwe). Hodźijska gmejnska rada je wčera na swojim wurjadnym posedźenju nowe wustawki za hort wobzamknyła. Tak chcedźa wot septembra w Hodźijskim šulskim horće w času wot 6.30 do 7.45 hodź. přidatne zažne hladanje dźěći zarjadować. Kaž wjesnjanosta Gerald Meyer (njestronjan) našemu wječornikej zdźěli, chcedźa k tomu tež popłatki přiměrić. „Dotal tajke wašnje hladanja dźěći trěbne njebě, dokelž to nichtó požadał njebě“, Mayer rjekny. Naćisk wustawkow tuchwilu na gmejnskim zarjedźe wuleži a je tež w hamtskim čisle gmejny wotćišćany. Nimo toho wěnowachu so radźićeljo wčera nastajenju lisćiny za wólby přisydnika. Jako třeće bě wuradźowanje trěbneje próstwy rjadowanja naležnosće w solarnym parku w Žičenju (Seitschen) dla. Wulke starosće načinja tež Hodźijskim radźićelam, tak Gerald Meyer, tuchwilna ekstremna suchota. Tuž gmejna wobydlerjow namołwja, zlutniwje z wodu wobchadźeć.

Chrósćicy (SN). Župa „Michał Hórnik“ přeprošuje čłonow a dalšich zajimcow na kubłansku jězbu wot pjatka 31. awgusta do njedźele 2. septembra do Namysłowa. Na programje steja wodźenje po měsće, wopyt radnicy kaž tež dalšich wosebitosćow města a wokoliny. Jězbu přewjedu z transporterami. Wotjězd je pjatk popołdnju z Chrósćic. Njedźelu po wobjedźe podadźa so na dompuć. Swójski přinošk za jězbu z přenocowanjom a połnym zastaranjom wučinja 80 eurow z přenocowanjom w dwułožowej stwě a 90 eurow z přenocowanjom w jednołožowej stwě. Přizjewjenja su do 16. awgusta w regionalnym běrowje Domowiny w Chrósćicach móžne. Telefonowe čisło (035796) 96254 a e-mail: .

Wo Domje biskopa Bena

Smochćicy (SN). Radijowy sćelak Deutsch­landfunk wusyła zajutřišim, 29. julija, w swojim rjedźe „Njedźelne wuchodźowanje – Pućowanske noticy z Němskeje a swěta“ mjez druhim přinošk wo Smochčanskim Domje biskopa Bena. Wusyłanje je wot 11.30 do 13 hodź. a přinošk wobswětla stawizny daloko znateho doma.