Na rozmołwu z politikarjemi
Kamjenc. Předsydka Lěwicy a zapósłanča zwjazkoweho sejma Katja Kipping budźe jutře, wutoru, w Kamjencu. Hromadźe ze zapósłanču Sakskeho krajneho sejma Marion Junge prosy wona na piknik a rozmołwu na zahrodowej kulturnej šćežce. Zajimcy zetkaja so w 10 hodź. před hotelom „Villa Weiße“ blisko dwórnišća. Tam wočakuja tohorunja předsydu frakcije Lěwicy krajneho sejma Rica Gebhardta. Wot 13 hodź. chcedźa wšitcy třo Kamjenskej tafli pomhać. Wot 16 hodź. je dalša rozmołwa z wobydlerjemi při kofejowni před Klóšterskimi wrotami planowana.
Za dźěłarničku so přizjewić
Wojerecy. Wot 30. julija do 3. awgusta wotměje so na Wojerowskej dźěćacej a młodźinskej farmje cirkusowa dźěłarnička za dźěći a młodostnych w starobje sydom do 18 lět. Wšědnje wot 9 do 16 hodź. budu tam wobdźělnicy akrobatiku, kuzłarstwo, reje a wjele dalšeho zwučować. Nazwučowany program předstaja woni 3. awgusta w 16 hodź. Za dźěłarničku móža so zajimcy hač do 16. julija přizjewić, a to pod telefonowym čisłom 03571/ 979 164 abo e-mailnje pod .
Dyrdomdej po měsće
Podpěra za čestnohamtskich
Towarstwa a jednotliwcy móža namjetować, štó měł pjenjezy dóstać
Hórki (SN/MWj). Swobodny stat Sakska podpěruje lětsa na wosebite wašnje čestnohamtske dźěło. Za to přewostaji wšitkim wokrjesam po 100 000 eurow. Budyski wokrjes je sumu městam a gmejnam rozdźělił, tak zo móže kóžda komuna čestnohamtsce skutkowacych z cyłkownje 1 250 eurami počesćić. Wo tym informowase Chróšćanski wjesnjanosta Marko Kliman (CDU) na zašłym posedźenju gmejnskeje rady w Hórčanskej wohnjowobornej gratowni. Nětko su towarstwa a jednotliwcy namołwjeni namjetować, štó měł w Chróšćanskej gmejnje dźěl tychle pjenjez za swój čestnohamtski angažement dóstać.
Změje noweho wobsedźerja
Parkowanski dom na Wonkownej Lawskej w Budyšinje ma do komunalneho wobsydstwa přeńć. To drje so na parkowansku situaciju w měsće njewuskutkuje, ma pak lěpšiny při wobhospodarjenju.
Budyšin (CK/SN). Z 289 městnami je Budyski parkowanski dom Centrum na Wonkownej Lawskej za parkowansku situaciju w sprjewinym městnje dosć wažny. Za tych, kotřiž parkowanske městno pytaja, po wšěm zdaću nic tak jara. 190 trajnych městnow drje je zwjetša wuknihowanych. Wot městnow za dnjowych hosći pak wostanje často dźěl prózdny. Wobdźělenskej a zawodowej towaršnosći (BBB) jako wobhospodarjerjej načinja to kóžde lěto deficit něhdźe 200 000 eurow. Přiwšěm chce komunalne předewzaće parkowanski dom kupić. Wo tym pak měješe měšćanska rada rozsudźić. Na swojim zašłym posedźenju bě wjetšina jeje čłonow za to.
Jedyn z najwjetšich podawkow w běhu lěta w Salowje je diskoteka ...
Krótkopowěsće (09.07.18)
Ukrainjanka wuznamjenjena
Celovec. Ukrainska žurnalistka a spisowaćelka Tetjana Maljarčuk je lawreatka lětušeho Myta Ingeborg Bachmann. We wobłuku Dnjow němskorěčneje literatury spožči awstriske město Celovec (Klagenfurt) awtorce z 25 000 eurami dotěrowane wuznamjenjenje za tekst „Žaby w morju“. Kóždolětnje přizwolene myto słuša k najwuznamnišim toho razu.
Sorbian Art Trio na festiwalu
Rudolstadt. Na lětušim 28. Rudolstadtskim festiwalu je so kónc tydźenja něhdźe 130 wuměłcow z wjace hač 30 krajow předstajiło. Mjez druhim wustupištej tam pólska skupina Hańba a Sorbian Art Trio. W srjedźišću wuznamneho zetkanja folklory, ludoweje a swětoweje hudźby steješe Estiska. Dohromady 25 000 ludźi dožiwi něhdźe 300 koncertow.
Swjedźeń Harley-Davidson
Policija (06.07.18)
Konjenc přepytali
Kamjenc. Na přikaz statneho rěčnistwa je policija zawčerawšim konjenc w Kamjencu přepytała. Kontrola měrješe so přećiwo mužomaj w starobje 68 a 49 lět. Wonaj staj podhladnaj, zo běštaj při wikowanju z konjemi falšowane papjery wužiwałoj. Mjez druhim wobhladachu sej zastojnicy papjery 150 koni. Jako je jednotliwym skoćatam přirjadowachu, zwěsćichu wšelake njedostatki. Kriminalna policija pad nětko dale přepytuje.
Pytaja mjeno za puć
Hórnikecy. Wot minjeneho kónca tydźenja twarja w Hórnikecach nowy puć k Energijowej fabrice. Po nim budu wopytowarjo přichodnje hač k muzejej jěć móc. Je to dźěl cyłkowneho přetwara bywšeje briketownje na muzej. Nětko pyta Wojerowske měšćanske zarjadnistwo namjety za mjeno noweho puća. Te móža wobydlerjo hač do 17. awgusta e-mailnje w radnicy wotedać, a to pod adresu . Wažne je wobkedźbować, zo njedóńdźe k dwojenju z hižo wobstejacymi mjenami, tež podobnym pomjenowanjam měło so zadźěwać.
Po bahnje pućować
Michałki. Kulowska skupina přirodoškitneho zwjazka NABU poskića w prózdninach wosebite pućowanja po Dubrjenskim bahnje. Prěnje budźe zajutřišim, njedźelu. Dalšej terminaj stej 22. julij a 5. awgust. Zajimcy zetkaja so stajnje w 9 hodź. při hosćencu w Michałkach. Wobdźělenje płaći za dorosćenych dwaj euraj, dźěći smědźa darmotnje sobu pućować.
Kak su so něhdy wochłódźili?
Chcedźa dušine srjedźišćo wsy
Z bywšeje wohnjowoborneje gratownje móhła kapałka nastać
Nuknica (SN/MWj). Z ideju, w Nuknicy kapałku natwarić, je so wčera Chróšćanska gmejnska rada na posedźenju w Hórčanskej wohnjowobornej gratowni zaběrała. Kaž wjesnjanosta Marko Kliman (CDU) rjekny, chcedźa wobydlerjo rady městno měć, hdźež móhli so róžowc modlić. Na gmejnje so tuž naprašowachu, hač móhli za to Nukničansku staru wohnjowobornu gratownju přetwarić.
Ideju nadrobnišo předstajił je wčera radźićel a Nukničan Roman Nuk. „Nastała bě myslička w kruhu ludźi, kotřiž přeja sej dušine srjedźišćo wsy“, wón rozłoži. Za to wuhladachu sej jako kmanu městnosć staru gratownju, kotruž wobornicy jenož hišće jako skład wužiwaja. Zo wjetšina wobydlerjow za projektom steji, zwěsćichu na wjacorych zeńdźenjach we wsy a samo z małymi wólbami.
Wopomnišćo chcedźa saněrować
Za wšě móžne naprawy wobsteja w Sakskej spěchowanske programy, tež za ponowjenje pomnikow. Z tajkeho hornca profituje nětko gmejna Łaz, a njetrjeba za to ani swójski podźěl płaćić.
Łaz (AK/SN). Sowjetske wopomnišćo mjez Łazowskim torhošćom a tamnišej radnicu chce gmejna Łaz saněrować dać. To su čłonojo tamnišeje gmejnskeje rady na swojim zašłym posedźenju jednohłósnje wobzamknyli. Nadawk dósta Kulowska firma Elster-Bau. „Hižo před měsacami smy próstwu wo spěchowanje krajnej direkciji w Drježdźanach zapodali. Spočatk februara nam zdźělichu, zo móžemy ze stoprocentowskim spěchowanjom ze stron Swobodneho stata Sakskeje ličić“, wuzběhny nawodnica powšitkowneho zarjadnistwa Łazowskeje gmejny Manuela Wukasch.
