Město měło nošer šule być

srjeda, 19. decembera 2018
artikl hódnoćić
(0 )

Město Wojerecy da bywše twarjenje Konrada Zusoweho gymnazija dospołnje saněrować a rozšěrić. Moderna cen­tral­na wyša šula ma 2020 dotwarjena być. Nastupajo nošerstwo maja měšćanscy radźićeljo hišće potrjebu rěčeć.

Wojerecy (AK/SN). Spočatk šulskeho lěta 2020/2012 chce město Wojerecy jako twarski knjez a nošer nowu centralnu wyšu šulu za wšědne wuknjenje wote­wrěć. Za to pomnikoškitany bywši do­micil Konrada Zusoweho gymnazija dospołnje saněruja a rozšěrja jón wo dalše twarjenje. „Na terminje dotwara w lěće 2020 wobstawamy“, podšmórny Dietmar Wolf, nawoda wěcneho wobłuka twarstwo města Wojerec, na wčera­wšim posedźenju měšćanskeje rady. 25 twarskich přemysłow je wupisanych, štož wotpowěduje 70 procentam twarskeho wobjima. „Předewzaće leži tuchwilu w časowym planje.“ Nimale 11,9 milionow eurow wučinja dospołny budget. „Přizemjo za rozšěrjenski twar je nětko hrubje hotowe“, Wolf zdźěli.

Stare a nowe twarjenje ze sobu zwja­zaja. Při tym nastanje nowa rumnosć, hdźež chcedźa biblioteku zaměstnić. „Kónc lěta 2019 maja hłowne dypki pedagogiskeho koncepta jasne być“, rozłoži Sascha Wenzel, jednaćel po cyłym Zwjazku skutkowaceje Freudenbergskeje załožby, měšćanskim radźićelam na posedźenju. Zhromadnje z kubłanskej přiradu města załožba nastaće noweje wyšeje šule wobsahowje přewodźa.

Nošer přichodneje centralneje wyšeje šule ma město Wojerecy być, byrnjež Budyski wokrjes zwólniwy był nošerstwo kubłanišća přewzać. „Hišće njeje ničo rozsudźene“, rjekny měšćanski radźićel Ralph Büchner (Lěwica). Radźićel Martin Schmidt (CDU) bě za to, diskusiju wo nošerstwje dale njewjesć. Po jeho słowach měło so město k swojej zamołwitosći wuznać a nošerstwo přewzać. To by wažne znamjo za šulske stejnišćo Wojerecy było. „Modernje wutworjeny šulski twar njeměli z rukow dać. Rozmyslować mamy runje tak wo tym, zo hišće třipolowa sportownja nastanje“, doda Joachim Glücklich, nawoda wyšeje šule „Na měšćanskej kromje“. Wón prošeše měšćanskich radźićelow, zo bychu temu chutnje rozjimali a sej po móžnosći fachowe měnjenja wobstarali. Město budźe so klětu dale wobšěrnje z naležnosću zaběrać, kaž to wyši měšćanosta Stefan Skora (CDU) wobkrući.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND