Budyšin/Zhorjelc (SN/at). Na za kónc tydźenja připowědźene akcije towaršnostneje njeposłušnosće zwjazkarstwa „Ende Gelände“ we Łužicy stej Budyski a Zhorjelski wokrjes ze zakazom zhromadźowanja pod hołym njebjom reagowałoj, dokumentowanym we wčera wozjewjenymaj powšitkownymaj postajenjomaj wokrjesow. Nichtó njesmě tam zarjadowanja přewjesć abo so na tajkich wobdźělić. Zakaz płaći wot dźensnišeho w 0 hodź. hač do njedźele w 24 hodź. Potrjechene w Zhorjelskim wokrjesu su areale Wochožanskeje a Rychwałdskeje jamy kaž tež Hamorskeje milinarnje. W Budyskim wo­krjesu je to železniska čara LEAG stajnje we wobłuku koridora 50 metrow po woběmaj stronomaj kolijow. Zawrjena je Sprjewina dróha mjez Hamorom a Nowym Městom. Busy pak tam jězdźa.

Kaž „Ende Gelände“ dźensa zdźěli, chce přećiwo zakazam prawnisce postupować. „Swoboda so zhromadźować je elementarne zakładne prawo w demokratiji. Wobstatk toho je, sej městnosć protesta wólnje wuzwolić směć“, rjekny prawiznik Michael Plöse. Wón zwjazkarstwo w tym padźe juristisce zastupuje.