Wudwor (SN/MWj.) Lońša akcija Wudworskeho Krollec zahrodnistwa, w jednej ze swojich rostlinarnjow čaporowe wiki wuhotować, je mjez wobydlerjemi dobry wothłós žnjała. Nimo toho je Smječkečanska młodźinska wohnjowa wobora z toho profitowała, dóstawši dźěl dobytka. Mjeztym so wjacori naprašowachu, hač drje lětsa pokročowanje slěduje. A dokelž chcyše něchtóžkuli k tomu přinošować a starožitnosće přewostajić, staj so Kerstin Kroll a jeje mandźelski René za dalše čaporowe wiki rozsudźiłoj. Te wotměja so sobotu, 2. februara, wot 8 do 18 hodź. w samsnej rostlinarni, kotruž běchu hižo loni za to wužili.