Ze sobu rěčeć je wo wjele wunošnišo hač wo sebi rěčeć. Pjatkowna idejowa konferenca Dźěłoweho kruha za serbske naležnosće Budyskeje měšćanskeje rady bě dawno trěbna prěnja kročel. Wotewrjenosć rozmołwow za třomi blidami bě wočerstwjaca a nadźiju budźaca. Wuslědk běchu namjety, kotrež móhli serbsko-němskej mjezsobnosći w sprjewinym měsće woprawdźity pohon być. Z lětnym „dnjom serbskeho witanja“ hodźeli so měšćenjo za dwurěčnosć sensibilizować. Najbóle překwapiła je mje wosobinsce mysl, w Budyskej měšćanskej radźe wuběrk za serbske naležnosće wutworić. Zrodźerjo namjeta chcedźa tak docpěć, zo nowy gremij předłohi za měšćansku radu pod aspektom zakonskich serbskich rjadowanjow přepruwuje. Njewotpowěduja-li jim, maja so polěpšić. Zo měła tajkemu wuběrkej přirada poboku być, je cyle praktiskeho razu: Wěcywustojnosć serbskich wobydlerjow by na kóždy pad zapřijata była. To je mjezsobnosć. Axel Arlt

„Serbsko-němska mjezsobnosć w Budyšinje“ rěkaše titl idejoweje konferency minjeny pjatk w Kamjentnym domje sprjewineho města. Podate nastorki zjimaja do kataloga, kotryž ma skutkowanje dźěłoweho kruha za serbske naležnosće a kaž tež měšćanskeje rady w nowej wólbnej periodźe wopłodźeć.

Budyšin (SN/at). Impulsy za lěpšu mjezsobnosć je sej dr. Susanne Hozyna, měšćanska radźićelka w frakciji CDU a rěčnica dźěłoweho kruha za serbske naležnosće města Budyšina, na spočatku nimale třihodźinskeje wuměny myslow přała. A někotre zajimawe su wobdźělnicy za třomi blidami zrodźili. Woni diskutowachu w kołach „komunalne zarjadnistwo a politika“, „wobydlerki a wobydlerjo“ kaž tež „kultura a kreatiwne hospodarstwo“. Mjez přitomnymi běchu tež wyši mě­šćanosta Alexander Ahrens (SPD), měšćanostaj dr. Robert Böhmer a Juliane Naumann, předsyda Domowiny Dawid Statnik,­ załožbowy direktor Jan Budar, měšćanscy radźićeljo, zastupjerjo měšćanskich zawodow towarstwow a serbskich zarjadnišćow.

FDP z nowym předsydstwom

Kamjenc. Budyski wokrjesny zwjazk FDP je zašły pjatk na stronskim zjězdźe w Kamjencu nowe předsydstwo wuzwolił. Nowy a bywši předsyda je Budyski měšćanski radźićel Mike Hauschild. Za jeho naměstnika wuzwolichu Thomasa Kunza a za pokładnika Holgera Johnu. Dalši čłonojo su Sirko Rosenberg, Stefan Richter, Katharina Gerber, Reiner Deutschmann, Matthias Schniebel a Martin Nedo.

IG metal konferencu přewjedła

Kamjenc. Něhdźe 60 aktiwnych čłonow dźěłarnistwa IG metal z najwšelakorišich zawodow je so sobotu na konferency w Kamjencu wobdźěliło. Na diskusijach a forumach woni zhonichu, što sobustawow dźěłarnistwa zajimuje. Zdobom wuwiwachu plany, kak móhli so přichodnje zaměrnišo za dobre tarifowe zrěčenja zasadźić a dobrych zawodnych radźićelow zdobyć.

W Pólskej čitałoj

Budyšin. Předań zastupnych lisćikow za 144. schadźowanku, kotraž budźe 24. nowembra w Budyskim Němsko-Serbskim ludowym dźiwadle, zahaji so štwórtk, 1. nowembra, při dźiwadłowej pokładni. Internetne skazanki su tohorunja móžne.

Čita z noweje knihi

Ćisk. Na němsko-serbski literarno- a hudźbny wječor přeproša Ćišćanske kulturne towarstwo jutře, sobotu, wot 17.30 hodź. na Kasperec dožiwjenski statok. Doris Kasper čita tam ze swojeje noweje knihi „Kuzło dejmantneje soniny“ a přeradźi tajny recept, kak móže čłowjek zbožowny być. Spěwna skupina Wólbernosće wječor hudźbnje wobrubi. Zastup je darmotny.

Kabaret dožiwić

Kamjenc. „Darmotne piwo budźe dróše“ rěka program kabareta „Die Herkules­keule“ njedźelu, 28. oktobra, w 16 hodź. w Kamjenskim hotelu Město Drježdźany. Za njón maja hišće zastupne lisćiki, kotrež dóstanu zajimcy za 23,50 eurow direktnje w hotelu.

Nyšpor hońtwjerjow a hajnikow