Změna 180 000 městnow zničiła

Budyšin. Wostrózbjaca je bilanca zapósłanca CDU w Sakskim krajnym sejmje Marka Šimana nastupajo wuwiće strukturnje słabych kónčin na wuchodźe Němskeje. Jeničce w Hornjej Łužicy je strukturna změna w 1990tych lětach 100 000 dźěłowych městnow zničiła, po wšej Łužicy 180 000. „Trjebamy nowy kurs“, rjekny Šiman dźensa w Budyšinje.

Zwjazk spěchuje saněrowanje

Lubij. Ze 103 000 eurami chce Zwjazk saněrowanje Schminkoweho domu w Lubiju spěchować. To zdźěli zapósłanča zwjazkoweho sejma Caren Lay (Lěwica), kotraž bě so za podpěru zasadźiła. Wot Hansa Scharouna (1883–1972) naćisnjeny Schminkowy dom słuša k wuznamnym twarjenjam klasiskeje moderny.  

Předawarki wosebje wohrožene

Düsseldorf. Dźěłarnistwo ver.di warnuje před hrožacej chudobu w starobje pola mnohich sobudźěłaćerjow we wikowanju. W žanej druhej branši njeje riziko tak wulke, zo sy po zakónčenju powołanskeho žiwjenja chudy, rjekny čłonka zwjazkoweho předsydstwa ver.di Stefanie Nutzenberger dźensa nowinarjam. Wosebje wohrožene su žony. Dźeń a mjenje předawarnjow płaći ludźi po tarifje.

Swojich kedźbyhódnych sportowych wukonow dla je sej Smjerdźečan Gerat Krawc hižo jako šuler w Ralbicach kedźbnosć mjez wučerjemi a připóznaće swojich sobušulerjow zdobył. Wot šulskeho hač do młodźinskeho časa njeje jenož kopańcu hrał, ale so tež lochkoatletice wěnował – a to přewažnje běhanju srjedźnych a dołhich čarow hač do 10 000 metrow. Na wokrjesnej olympiadźe w 9. lětniku docpě nahladne 2. městno w běhu na 3 000 metrow.

Jako 43lětny přesta Gerat Krawc kopańcu hrać a rozsudźi so z kolesom jězdźić. Wot lěta 2006 nětko kóždolětnje registruje, kelko kilometrow je do pedalow stupał a kelko metrow wysokosće je přewinył.­ Dotal bě to něhdźe 120 000 kilometrow, z čimž je potajkim ekwator trójce wobjěł. Spočatnje bě to wob lěto 5 300 kilometrow, pozdźišo zliči wón samo 13 500 kilometrow puća. Zwjetša wuhladaš­ jeho njedźelu kolesować. Jeho najdlěša čara bě 256 kilometrow dołha a wjedźeše nimo třoch putniskich městnow: Róžanta we Łužicy, Krupki a Fili­pova w Čěskej.

Po rozsudźe LEAG wo Wochozach II wjele wotewrjenych prašenjow

Slepo (AK/SN). Přez lětstotki zrosćena Slepjanska wosada móže w dalokej měrje wostać. Jeničce Miłoraz ma so wotba­grować a 220 woby­dlerjow přesydlić. Tónle rozsud dohladowanskeje rady LEAG je zamołwity za přesydlenski management energijoweho koncerna Thomas Penk wčera na posedźenju Slepjanskeje gmejnskeje rady po­twjerdźił.

Jedyn z wuslědkow je, zo změja wot brunicy potrjechene komuny přichodnje cen­tralneho rozmołwneho partnera w sakskim knježerstwje. Budźe to Ulrich Beyer, kiž tuchwilu w sakskej statnej kencliji wotrjad za mjezynarodne poćahi nawjeduje. 13. junija ma so zhromadne kabinetne posedźenje sakskeho a bra­niborskeho knježerstwa wotměć, hdźež póńdźe hłownje wo strukturnu změnu we Łužicy.

Do jastwa chcył

Wojerecy. Při přepruwowanju personalijow 41lětneho we wčerawšich rańšich hodźinach we Wojerecach policistam napadny,­ zo njebě muž dotal napołoženu pokutu 125 eurow zapłaćił. Tohodla předležeše přećiwo njemu wukaz zajeća. By-li sumu na městnje zapłaćił, móhł wón jatbje w poslednim wokomiku zadźěwać. To pak 41lětny nochcyše. Město toho wón policistow prošeše jeho do jastwa dowjezć, štož zastojnicy nablaku sčinichu. Tam ma nětko wjacore dny wotsedźeć­.