Budyšin (UM/SN). Na twarnišću wuchowanskeje straže na Budyskej Flincowej su wčera zběhanku swjećili. Z twarskej naprawu inwestuje Budyski wokrjes dalše 1,6 milionow eurow do syće swojich cyłkownje 17 wuchowanskich stražow. 1. měrca běchu twarić započeli, spočatk decembra chcedźa objekt wuchowanskej słužbje přepodać. „Z přetwarom wuho­tujemy wuchowansku stražu tak, zo wotpowěduje wona wotwidźomnym změnam normow DIN, kotrež sej wjace městna za jězdźidła žadaja“, rozłožuje prěni přirjadnik krajneho rady Udo Wićaz (CDU). Tak nastanje ze zestarjeneje garaže nowa jězdźidłowa hala z městnom za štyri wuchowanske awta. Po přetwarje móža je tež w zymje optimalnje rje­dźić, desinfikować a z materialom wu­hotować.

Jenož nutřkownje přetwarja socialny dźěl straže. Tam změjetaj potom nuzowaj lěkarjej, kotrajž staj wodnjo stajnje na městnje, separatne rumnosće ze swójskim sanitarnym dźělom. „Hłowny zaměr přetwara je dospołne rumnostne dźělenje socialneho wobłuka wot jězdźidłoweje hale“, Wićaz wuswětla.