Hudźba k sonjenju w sakralnej atmosferje
Njeswačidło (bn/SN). Zajimcy w połnej Njeswačanskej cyrkwi dožiwichu pod hesłom „(Wu)pokazowanje“ sobotu wječor multimedialny koncert projekta Servi. Jan Bělk na wjacorych synthesizerach a bubnar Peer Triebler přeprosyštaj připosłucharjow na „hudźbne wotkrywanja a sonjenje“ a nadźiještaj so, zo so jimaj poradźi publikum k tomu pohnuwać, „ze swojimi myslemi pozastać“, kaž Bělk rjekny.
Elektroniske ambient-zynki w kwadrofoniskej instalaciji zahorichu přitomnych runje tak kaž live-sampling zapřijace rytmiske improwizacije. Multimedialny koncert wobsahowaše nimo toho zlutniwje zasadźenu swěcu a cyłkownje pjeć hudźbu wobrubjacych wobrazow Caroliny Eyckec. Hłownje zaklinčachu twórby poslednjeje, lěta 1995 natočeneje tačele „Meditatio in variatione“, při čimž měješe kruch „Wječor“ na tekst Handrija Zelerja wosebity woznam, wšako bě słyšeć hłós njeboh Alfonsa Frencla, kiž běše baseń za cejdejku recitował. Tak staj wuměłcaj spěw na tymle wječoru serbskemu prócowarjej, wučerjej a spisowaćelej wěnowałoj a jeho tak akustisce počesćiłoj.
Robustne, moderne a mnohostronsce zasadźomne
Łaz (AK/SN). Za Łazowsku gmejnu ma moderne wuhotowanje jědnaće wjesnych a pjeć młodźinskich woborow dale prioritu. Tole podšmórny wjesnjanosta Udo Wićaz (CDU) sobotu na dnju wotewrjenych duri Łazowskeje wohnjoweje wobory. Jeje čłonam přepodachu nowe pomocne a hašenske jězdźidło HLF 10.
„Z techniskeho wida započina so we Łazu nowa doba“, rjekny wjesnjanosta. Nowe awto je na wšitkich wóskach ćěrjene, hodźi so tuž zboka pućow runje tak zasadźeć, potajkim tež w hórniskej naslědnej krajinje. K wuhotowanju słušeja dwanaće metrow wysoki rěbl, klumpa, hydrawliske nožicy a stabilizowanski system za znjezbožene jězdźidła. HLF 10 płaći 326 000 eurow. Z toho je Budyski wokrjes 117 000 eurow spěchował, zbytk je gmejna sama financowała.
Policija (02.11.15)
Zejicy. Hnydom dwě wobchadnej njezboži staštej so sobotu popołdnju w Zejicach. Něhdźe w 14.30 hodź. bě tam 52lětny wodźer motorskeho ze swójskeje winy padnył a so při tym ćežko zranił. Wjacore wosobowe awta dyrbjachu tam dla toho čakać. Tole pak 58lětny wodźer awta po wšěm zdaću přewidźa a do poslednjeho čakaceho jězdźidła zrazy. Na zbožo pak so při tym nichtó dalši zranił njeje. Statna dróha S 101 bě hodźinu zawrjena.
Domizna młodym ćěkancam
Debrikecy (CS/SN). Nimale 120 wopytowarjow, mjez nimi Hodźijski wjesnjanosta Gerald Meyer (njestronjan), zajimowachu so wčera popołdnju za dom, w kotrymž budu zaměstnjeni njepołnolětni młodźi ćěkancy bjez přewoda. W něhdyšim domje za zbrašenych nastachu městna za 24 młodostnych. Zamołwitosć za škit njepołnolětnych přewozmje Budyski wokrjesny młodźinski zarjad. Zastarać budźe wobydlerjow domu AWO Łužica a Budyšin. 15 přistajenych chce so młodostnym wěnować a jich na žiwjenje w Němskej přihotować. Dźesaćo z nich su so wčera na dnju wotewrjenych duri wobdźělili a zajimcam přichodne nadawki rozjasnili. W nocy budźetaj so dwaj kubłarjej wo młodostnych starać, jedyn jako narěčenski partner, tamny změje hotowostnu słužbu. Nimo toho změje so stražnik w času wot 22 do 6 hodź. wo wěstotu starać.
Krótkopowěsće (30.10.15)
Myto serbskej wědomostnicy
St. Louis. Concordia Historical Institute w ameriskim St. Louisu mytuje serbsku wědomostnicu Trudlu Malinkowu za wudawaće knihi „Jan Kilian (1811–1884) – Pastor, Poet, Emigrant“. Předmjet slědźenišća su stawizny Lutherskeje cyrkwje w Sewjernej Americe. 12. nowembra jej w St. Louisu myto spožča.
Nowum w LND
Budyšin. Znaty Towaršny spěwnik předleži nětko jako app. Tak je móžno, teksty spěwow spěšnje na wobrazowce měć. App hodźi so w Google Play Store jako light-wersija darmotnje downloadować, połna wersija płaći 3,99 eurow. Při zwoprawdźenju projekta je LND podpěrało Böhmak it-poradźowanje, technisku realizaciju přewza develAPPers UG.
Nowa čara za lěsnu železnicu
Běła Woda. Ze symboliskim prěnim zarywom zahajichu wčera nowotwar nimale štyri kilometry dołheje čary Mužakowskeje lěsneje železnicy k wěži při Ćežkej horje w Běłej Wodźe. Nowe kolije maja narunać dźěl tych, kotrež dyrbjachu Wochožanskeje brunicoweje jamy dla wotstronić. Šef lěsneje železnicy Friedemann Tischer naprawu wita, dokelž so techniski pomnik tak zachowa.
Wopominaja zemrětych
Kamjenc. Na Chudych dušow, 2. nowembra, wotměje so w kapałce Kamjenskeje chorownje maltezow swj. Jana w 15 hodź. wopomnjenska nutrnosć za w chorowni zemrětych pacientow. Na ekumeniskej pobožnosći chcedźa mjena zemrětych předčitać a za nich swěčku zaswěćić. Wšitcy přiwuzni su přeprošeni.
Zahaja dalšu akademiju
Budyšin. Nowy semester sakskeje akademije započnje so póndźelu, 2. nowembra, we 18 hodź. z přednoškom awtora a publicista Stefana Schriddy w Budyskej studijnej akademiji. Pod hesłom „Murks? Ně, dźakuju so!“ porěči wón wo obsolescency, potajkim wo tym, kak producenća wotpohladnje tomu polěkuja, zo so produkt po wěstym času skóncuje.
Policija (30.10.15)
Budyšin. Z woporom po wšěm zdaću wjacorych paduchow je so zawčerawšim připołdnju žona w Budyšinje stała. 77lětna w kupnicy na Kamjentnej nakupowaše, jako ju njeznaty muž narěča a do rozmołwy zapleće. Při tym měješe rentnarka swoju ručnu tobołku přez ramjo powěsnjenu. Tole wuži najskerje komplica a žonje móšnju z tobołki wućahny, štož pak wobkradnjena hakle pozdźišo pytny. W móšni běchu dwucyfrowa suma pjenjez a wosobinske papjery. Kriminalna policija pad přepytuje.
Ćěkancow jako šansu widźeć
Wyši měšćanosta za dobrowólny zawjazk komunow wabił
Budyšin (CK/SN). Přichodnu wutoru wotměje so w Budyskim wokrjesu wjerškowe zetkanje požadarjow azyla dla. Krajny rada Michael Harig (CDU) je na nje wšitkich wjesnjanostow a měšćanostow wokrjesa přeprosył. Po zakonju je wokrjes za zaměstnjenje požadarjow azyla zamołwity, dokelž pak woni dale we wulkej ličbje přichadźeja, trjeba wokrjes pomoc komunow. Tohodla so krajny rada nadźija, zo so města a gmejny dobrowólnje k zaměstnjenju ćěkancow zawjazaja. Hižo do toho bě wokrjesne zarjadnistwo wozjewiło, kelko ćěkancow chcedźa po tak mjenowanym Königsteinskim kluču jednotliwym komunam přidźělić.
Přećiwo strašnym jědam na polu
Njebjelčicy (UM/SN). Kak strašne su rostlinoškitne srědki za strowotu čłowjeka? Wo tymle prašenju a wo swojich dopóznaćach k tomu porěča wčera w Njebjelčicach Berlinska žurnalistka Ute Scheub a namołwješe připosłucharjow, so na cyłoněmskej akciji Urinale wobdźělić. Njeje připad, zo wotmě so dotal jeničke wuchodosakske zarjadowanje w tymle zwisku w Njebjelčicach. „Zaběramy so hižo wjele lět z wobswětej wotpowědowacym ratarjenjom a smy jako gmejna tež wotpowědnje wusměrjeni“, praji wjesnjanosta Tomaš Čornak (CDU). Zdobom wón podšmórny, zo nochcedźa zasudźić, ale wo problematice informować.
Nuk: Taktěrowanje wohańbjace
Jenož na kromje je so zhromadźizna zarjadniskeho zwjazka Při Klóšterskej wodźe wčera z prašenjom ćěkancow a jich móžnym zaměstnjenjom zaběrała. Přiwšěm wujewichu so při tym rozdźělne měnjenja.
Pančicy-Kukow (SN/MWj). Po něhdźe sto dnjach w zastojnstwje je wčera nowy předsyda zarjadniskeho zwjazka Při Klóšterskej wodźe Měrko Domaška swoje prěnje posedźenje zhromadźizny zarjadniskeho zwjazka nawjedował. Při tym dyrbješe wón zastupjerjam pjeć přisłušnych gmejnow zdźělić, zo změja komuny klětu wjace za spjelnjenje zarjadniskich nadawkow płaćić. Tak rozrosće wotedawk gmejnow na 150,49 eurow na wobydlerja. Přiwšěm zwostanje mjez dochodami a wudawkami deficit nimale 30 000 eurow, kotrež pak chce zarjadniski zwjazk ze swójskich rezerwow zwjesć. Přičina rozrosćacych wudawkow su mjez druhim přiběrace zarjadniske kóšty, stupace zarunanje čestnohamtsce skutkowacych a nic naposledk planowane saněrowanje twarjenja zarjadniskeho zwjazka w Pančicach-Kukowje.
