30. žonjace póstnicy swjećili

póndźela, 27. februara 2017 spisane wot:

Z 89 pisanymi wobrazami telko kaž hišće ženje w Kulowje

Kulow (aha/SN). Po wichorojtych dnjach minjeny tydźeń wabješe sobotu poměrnje rjane wjedro tysacy ludźi do Kulowa, zo bychu sej wobhladali žonjacy póstniski ćah. Tón wšak je tam wot lěta 1988 z tradiciju. Bě to potajkim třicety raz, zo wuhotowachu žony a holcy do róžoweje póndźele tež swoje póstnicy.

Krótkopowěsće (27.02.17)

póndźela, 27. februara 2017 spisane wot:

Dale požadane město filma

Zhorjelc. Na wšě dźesać mjezynarodnych kinowych filmow chcedźa lětsa w Zhorjelcu nahrawać. Tole je wyši měšćanosta Siegfried Deinege (njestronjan) připowědźił. Hižo w měrcu maja so dźěła za nowu filmowu wariantu „Kuzłarskeho wučomnika“ zahajić. Město chce so jako posłužbnik filmoweje branše dale wuwić, kaž Deinege rjekny.

Čaru skónčnje ponowja

Liberec. Železniska čara mjez Liberecom a Žitawu bědźi so hižo wjacore lěta z tři kilometry dołhim wotrězkom na teritoriju Pólskeje. Zanjechanosće dla móža tule ćahi jeno ze spěšnosću 30 km/h jězdźić. Pólska wulkopósłanča w Čěskej republice Grażyna Bernatowicz pak je nětko na zetkanju z hejtmanom Liberecskeho regiona Martinom Půtu přilubiła, zo pólski wotrězk ponowja.

Dynamo so jasnje přesadźił

125 000 eurow za projekty

pjatk, 24. februara 2017 spisane wot:

Budyšin/Wojerecy/Drježdźany (SN/CoR). Ze spěchowanskeho programa „Integratiwne naprawy“ přewostaji sakske ministerstwo za runostajenje a integraciju třom projektam Budyskeho wokrjesa dohromady 125 000 eurow.

Spěchowanje dóstanu Budyski Kamjentny dom za wjetšinu a ćěkancow zwjazowacy projekt „Ćěkancow w Budyšinje integrować“, towarstwo Majak jako interkulturny centrum z poradźowanskim poskitkom, kotryž chce mjezykulturny a -na­božinski dialog spěchować, kaž tež Wojerowske regionalne dźěłanišćo za kubłanje, demokratiju a žiwjenske perspektiwy za projekt „Integracija požadarjow azyla we Wojerecach“, zdźěla ministerstwo za runostajenje a integraciju. „Demokratiske a integraciske dźěło w Sakskej je wjace hač trěbne. To su minjene tydźenje a měsacy pokazali. Ze spěchowanjom tworimy poskitki, kotrež tyja wšitkim wobydlerjam. Klima so polěpši, hdyž zesylnimy mjezyčłowjeski a interkulturny dialog kaž tež solidarnu mjezsobnosć“, podšmórny ministerka Petra Köpping (Lěwica).

Krótkopowěsće (24.02.17)

pjatk, 24. februara 2017 spisane wot:

Mjenje mortwych na dróhach

Wiesbaden. Ličba smjertnych woporow při wobchadnych njezbožach je w Sakskej loni widźomnje woteběrała. Cyłkownje 162 ludźi je na dróze žiwjenje přisadźiło, zdźěla Zwjazkowy statistiski zarjad we Wiesbadenje. To je 30 mjenje hač lěta 2015. Po wšej Němskej zličichu loni 3 214 smjertnje znjezboženych.

Tysac kulturnych wjerškow

Podstupim. Hač w koncertnych halach, cyrkwjach abo pod hołym njebjom – w Braniborskej chcedźa lětsa wjace hač tysac koncertow, dźiwadłowych předstajenjow, operow, čitanjow, filmow a dalšich zarjadowanjow wotměć. Wone su wažny wobstatk kulturneho turizma a zesylnjeja regiony, potwjerdźi kulturna ministerka Martina Münch (SPD).

Planuja datajowy skład

Hrádek nad Nisou. Liberecska firma „CS spoje“ planuje na přemysłownišću pola Hrádeka nad Nisou natwarić najwjetši skład kompjuterowych datajow w sewjernej Čěskej. W kruće škitanym objekće móhli statne organy, předewzaćeljo kaž tež priwatnicy swoje dataje jako rezerwu składować. Projekt wusměrja so tež na zajimcow w Němskej, kaž čěske medije rozprawjeja.

Na swójbnu schadźowanku

pjatk, 24. februara 2017 spisane wot:

Chrósćicy (SN). Rěčny centrum WITAJ a župa „Michał Hórnik“ přeprošatej dźěći, jich staršich, dźědow a wowki, na 7. swójbnu schadźowanku, kotraž budźe njedźelu, 5. měrca, w Chróšćanskej „Jednoće“. W 15 hodź. zahaji so popołdnjo z klankarjom Měrćinom Krawcom. Dale skića dźěćom paslenske a sportowe zaběry, krosnowanje a šminkowanje. W rjadownjach zakładneje šule změja čitanski stan, a zajimcy móža so wobdźělić na dźěłarničce wo strowym zežiwjenju a dalšich.

Město budźe zašlahane

Kulow (SN). Składnostnje Kulowskeho karnewala je nutřkowne město wot jutřišeho do přichodneje wutory, 28. februara, zašlahane. Tam bydlacy pak móža z awtom hač k swojim domskim jěć. Wob­jězdka je wupisana a wopytowarjo karnewala měli awto po móžnosći zwonka města, kaž při Kobrec młynje, wotstajić.

Čita wo Lutheru

Budyšin (SN). Dr. Jens Buliš w swojej knize „Das Bistum in der Reformationszeit“ wopisuje, kotre nahlady Luther, jeho rowjency a w přećiwku k tomu posledni Mišnjanscy biskopja zastupowachu a kotrym wliwam woni podležachu. Wo tym čita awtor knihi 2. měrca, w 19.30 hodź. w Budyskej Smolerjec kniharni.

Policija (24.02.17)

pjatk, 24. februara 2017 spisane wot:

Do nakładneho awta zrazył

Porchow. Dźensa rano je 59lětny wodźer awta typa Kia na awtodróze A 4 mjez Ohornom a Porchowom do směra na Zhorjelc z wotmachom do před nim jěduceho nakładneho awta z napołožakom zrazył. Při tym stłóči so přezpólne jězdźidło hač k prědnjej škleńcy pod napołožak. 51lětnu sobujěducu njezbožo zawinowaceho awta dyrbjachu zranjenu do bliskeho klinikuma dowjezć. Šofer Kije pak so njezrani.

Z nimale třomi promilemi jěł

Kamjenc. Srjedu popołdnju lepi policija w Kamjencu 51lětneho, kiž bě z 2,6 promilemi alkohola z awtom po puću. Chětro wopiteho wodźerja Opela bě patrulja Kamjenskeho policajskeho rewěra kontrolowała. Zastojnicy jemu wězo hnydom jězbnu dowolnosć sćazachu.

Městna za hort nuznje trěbne

pjatk, 24. februara 2017 spisane wot:

Radźićeljo maja so lětsa wažnym gmejnskim naležnosćam wěnować

Njebjelčicy (SN/mwe). W Serbskich Pazlicach matej lětsa nowej busowej čakarni nastać. Inwesticija płaći něhdźe 18 000 eurow. Projekt předstajił je wčera wječor na prawidłownym posedźenju gmejnskeje rady w Njebjelčicach Peter Linke z Drježdźanskeho inženjerskeho a twarskoplanowanskeho běrowa. Radźićeljo su na to wobzamknjenje k inženjerskemu zrěčenju schwalili.

Schwaliła gmejnska rada tohorunja je, podpisać zrěčenje planowanskeho dojednanja mjez Budyskim wokrjesom, gmejnu a Kamjenskim zaměrowym zwjazkom za wopłóčki. „Hdźe wo to, planować puć ze Serbskich Pazlic do směra na Miłoćicy a dale přez wjes hač k přemysłowej štwórći. To rěka, štó kotre kóšty přewozmje“, wjesnjanosta Tomaš Čornak (CDU) našemu wječornikej rozłoži. Inwesticija ma něhdźe tři miliony eurow płaćić. Gmejna ma so ze swójskim podźělom na kóštach za kolesowarsku šćežku, za chódniki a wobswětlenje starać. Twar noweje dróhi, kotryž je wot klětušeho hač do lěta 2020 planowany, ma so w třoch wotrězkach přewjesć.

W serbsko-arabskej barje swjećić

pjatk, 24. februara 2017 spisane wot:

Dožiwimy na póstnicach w Kulowje serbsku baru? A zasłyšimy po žonjacym karnewalowym ćahu sobotu a róžowu póndźelu našu maćeršćinu? Na kóždy pad: Tuž do Kulowa!

Kulow (bl/SN). Hač we wulkej bróžni, w přetwarjenej garaži abo na starej žurli – we wšěch kutach Kulowa so šrubuje, moluje a pasli. Witać chcedźa póstniski kónc tydźenja a hač do přichodneje wutory zaso tysacy hosći, kotřiž w njeličomnych mjeńšich a wjetšich barach hejsuja.

Njeje hižo ničo wosebite, zo Łazkowski lěs po taću sněha pod wodu steji. Nowe je, zo bě tam wichor minjenu nóc a dźensa dopołdnja škody načinił. Tež w druhich delanskich kónčinach drje wětřikec hólcy chětro zachadźachu, na zbožo njetrjebachu tam wohnjowych wobornikow wo pomoc wołać. W Połčnicy pak dyrbjachu woni runja přistajenym twarskeho zawoda złamany telefonowy sćežor, spowalane štomy a na puć spadane třěšne cyhele wosrjedź města rumować. Foto: SN/Maćij Bulank

Prašeć so ničo njepłaći

štwórtk, 23. februara 2017 spisane wot:
Wot tohole tydźenja je při mnohich wjesnych taflach, kaž na prěnjej stronje dźensnišeho wudaća zwobraznjene, připrawjena taflička z napisom „Wildvogel-Ge­flügelpest“ a „Beobachtungsgebiet“ abo „Sperrzone“. Škoda, zo njemóžu tam tele słowa tež w swojej maćeršćinje čitać. To by pozitiwny signal ze stron wokrjesa Budyšin był, by-li sam wot so dwurěčnym komunam taflički tež ze serbskim napisom dał. Tak by tež dopokazał, zo zamóže sam na serbskosć dźiwać. Tak by ze stron wokrjesa tež samozrozumliwosć, našu maćeršćinu wužiwać, wočiwidna była a njetrjebali zamołwitych stajnje znowa na njedostatk skedźbnjeć. Na to pak móžemy zawěsće hišće cyłu chwilu čakać. Město toho přisuwa wokrjes „čorneho Pětra“ gmejnam, dokelž njejsu so za tafličku ze serbskim napisom prašeli. Čehodla poprawom nic? Prašeć so dźě ničo njepłaći. Hač pak tež to dóstanješ, štož chceš měć, njemóže nichtó zaručić. Janek Wowčer

Serbska debata

nowostki LND