Krótkopowěsće (30.04.18)

póndźela, 30. apryla 2018
artikl hódnoćić
(0 )

Twórba serbskeho komponista

Berlin. Berlinska Centralna kapała je mi­njeny pjatk nowu twórbu serb­skeho komponista Sebastiana Elikow­skeho-Winklera „Camper za dujarski orche­ster“ předstajiła. Twórba předźěła dopomnjenki komponista na camprowanje na wsach Delnjeje Łužicy. Orchester hudźeše pod nawodom Steffena Kempera w komornej žurli Berlinskeje filharmonije.

Wjace hač 200 wustajerjow

Lubij. Jeničke hišće so wotměwace přemysłowe wiki w regionje je Konventa. Minjeny kónc tydźenja su organizatorojo na mjeztym 17. přehladku w Lubiju tójšto wopytowarjow witali. Wjac hač 200 wustajerjow bě na wikach zastupjene. Nimo­ tójšto předewzaćow bě lětsa wje­le­ institucijow prezentne. Lětuše partnerske město Konventy bě Lubań.

Turistisku sezonu zahajili

Zły Komorow/Hamor. Z dnjomaj łužiskeje jězoriny je so minjeny kónc tydźenja nowa turistiska sezona zahajiła. Lětsa bě oficialna swjatočnosć při Parcowskim jězorje. Mnoho turistikarjow jězoriny wabješe wopytowarjow minjeny kónc tydźenja z wosebitymi poskitkami. Při Bjerwałdskim jězorje přewjedźechu Wikowy dźeń regionalneho wudźěłka.

Dumpery do sezony startowali

Adelsdorf. Filip Kral z Róžanta, amtěrowacy němski dumperowy mišter, je wčera do noweje dumperoweje sezony ze 4. městnom startował. W Adelsdorfje pola Großenhaina doby zazběhowe wurisanje lokalny matador André Grafe před teamowym kolegu Thomasom Neumannom. Najlěpši jězdźer z Lejnjanskeho dumperoweho teama bě na třećim městnje Marcus Donat. Mustwowe hódnoćenje doby hosćićelski cyłk před zastupnistwom z Lejna.

Hamilton dobył, Vettel štwórty

Baku. Lewis Hamilton je pod dramatiskimi wobstejnosćemi w formuli 1 wulke myto Azerbajdźana dobył a ze swojim teamom Mercedes prěnje dobyće sezony swjećił. Hamilton profitowaše w Baku wot borzdźenskeho zmylka Sebastiana Vettela, kotryž bu po riskantnym manewrje na kóncu jenož štwórty.

wozjewjene w: Krótkopowěsće
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND