Wudźěłki kónčiny poskićeli

wutora, 08. meje 2018
artikl hódnoćić
(0 )
Ellengard Chichowitz a Konrad Lock z Lipoja wobhladaštaj sej dźesać lět zrawjeny jubilej ny twarožk. Jara wobrazliwje běchu organizatorojo mlokowy wudźěłk wše lakich časowych dobow za zajimcow spřihotowali.  Foto: Bianka Šeferowa Ellengard Chichowitz a Konrad Lock z Lipoja wobhladaštaj sej dźesać lět zrawjeny jubilej ny twarožk. Jara wobrazliwje běchu organizatorojo mlokowy wudźěłk wše lakich časowych dobow za zajimcow spřihotowali. Foto: Bianka Šeferowa

Hołk a tołk knježeštej zawčerawšim na jubilejnych burskich wikach w Koćinskim zawodźe Krabatowy mlokowy swět. Přijomne nalětnje wjedro je naladu hišće přisporjało.

Koćina (SN/BŠe). Je stajnje derje znać městno, hdźež wudźěłk nastawa. To wědźa tež zamołwići Krabatoweho mlokoweho swěta w Koćinje, hdźež su njedźelu mjeztym dźesate wulke burske wiki přewjedli. Wšitke kročele – wot produkcije mloka hač k zhotowjenju twarožka – móžachu sej ludźo dosć wobrazliwje wobhladać. Dwaceći družin twarožka tam mjeztym poskićeja. A wobstajnje dźěłaja na dalšich idejach.

Nimo Krabatoweho mlokoweho swěta je zawčerawšim hišće 70 dalšich wiko­warjow na ležownosć ratarskeho zawoda přijěło. Prěni raz pódla bě Hózkowska hornčernja Baćonjace hnězdo. Hornčerka Josefine Gleinicke witaše tam wjele stajnych kupcow, kotřiž sej swoju domjacu nadobu krok po kroku wudospołnjeja. Wosebje požadane pak běchu tónkróć keramikowe kwětki jako rjana dekoracija rostlinam. Dale móžachu wopytowarjo tójšto přirodnych wudźěłkow z regiona nakupować. Tak bě Hózkowski ratar Doma­nja přitomny, kiž poskićeše nimo sadźen­kow zeleniny tež mjaso a kołbasu ze swójskeho plahowanja. Móhłrjec wšitke produkty kónčiny běchu na wikach zastupjene. Jako swěrny wikowar zdaloka bě na přikład zawod Essig Schneider z Freiberga přitomny.

Na zahajenju burskich wikow wozjewichu zdobom dobyćerjow w regionje přewjedźeneho wubědźowanja na temu mloko. Šěsć rjadownjow smě na Mjezynarodny dźeń mloka 1. junija, hdźež swjeća zdobom dźeń dźěsća, do Koćiny přijěć. Mjez dobyćerjemi su tež tři rjadownje serbskeju kubłanišćow, dwě Radwor­skeje zakładneje šule „Dr. Marja Grólmusec“ a jedna Serbskeje zakładneje šule Budyšin.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND