Wurunany etat lětsa móžny

pjatk, 19. oktobera 2018
artikl hódnoćić
(0 )

Najebać wjacore njeplanowane wudawki­ móhli w delanskej gmejnje lěto­ 2018 z wurunanym hospodarskim planom zakónčić. Tole bě jedna z temow na dnjowym porjedźe gmejnskich radźićelow.

Róžant (JK/SN). Z pjenježnymi nalež­no­sćemi dyrbješe so wčera gmejnska rada­ Ralbicy-Róžant zaběrać. Tamniši radźićeljo mějachu wjacore njeplanowane wudawki wobzamknyć. Komornica Franciska Čapikowa jim tuchwilnu hospodarsku situa­ciju gmejny rozłoži. Wona zdźěli, zo solidne hospodarjenje njeplanowane wudawki zmóžnja a zo je na kóncu lěta wurunany etat móžny. Tež hdyž schwa­lichu hospodarski plan hakle w juliju, je gmej­na zaměrnje po nim dźěłała. To wobkrući wjesnjanosta Hubertus Ryćer (CDU). Po jeho słowach přemysłowe dawki we wjetšim wobjimje dochadźeja hač bě planowane. Dźakowano wulkemu spektrumej spěchowanskich programow a čujomnje nišemu gmejnskemu podźělej za Ralbičansku pěstowarnju móžachu radźićeljo trěbne přidatne wudawki wobzamknyć. Mjez druhim za to, zarjadować w Smjerdźečanskej wotnožce Ralbičanskeje pěstowarnje přidatne žłobikowe městna. Za trěbnej přetwar a nakup mobiliara nałoži gmejna cyłkownje nimale 47 000 eurow. Tež nakup noweho hašenskeho jězdźidła za Konječanskich wobornikow móže gmejna dźakowano spěchowanskeje sumy 87 000 eurow ju ze swójskim podźělom 32 000 eurow zawěsćić. Kaž wjesnjanosta radźićelam zdźěli, změja potom wšitke wjesne wobory nowe abo znajmjeńša načasnym žadanjam wotpowědowace jězdźidła. Ralbičenjo su swój stary W50 předali. W interneće namakachu přijomny poskitk města Köln za jězdźidło za zasadźenske nawodnistwo. Za nje maja jeničce 100 eurow přidatnje wudać. Dotalne Ralbičanske zasadźenske awto dóstanu Róžeńčanscy wobornicy, kotřiž móža swój wusłuženy LO z 1960tych lět nětko na wuměnk pósłać.

W Sernjanach na nastawacej bydlenskej štwórći su dźensa započeli asfaltowu worštu na dróhu přez štwórć připrawić. Póndźelu dźěła dokónča. Dołhož w štwórći jednoswójbne domy twarja, njebudu hišće za to předwidźane płoniny z plesternakami wukłasć, ale z mi­neralnej měšeńcu wupjelnić. Pozdźišo ju z plesternakami wuměnja. Wotkryće štwórće ma kónc nowembra zakónčene być, zdźěli wjesnjanosta Ryćer.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND