Pilnje wuknyli a so prócowali

srjeda, 28. nowembera 2018
artikl hódnoćić
(0 )
Brigita Šramina (naprawo) nawjeduje we Wojerecach rěčny kurs měšćanskeho zarjadnistwa, kiž so tam dźensa kónči.  Foto: Andreas Kirschke Brigita Šramina (naprawo) nawjeduje we Wojerecach rěčny kurs měšćanskeho zarjadnistwa, kiž so tam dźensa kónči. Foto: Andreas Kirschke

Štwórty kurs serbšćiny města Wojerec so dźensa kónči

Wojerecy (AK/SN). Wot kónca awgusta je so dwaceći žonow a muži na štwórtym kursu serbšćiny we Wojerecach wobdźěliło. Pola bywšeje wučerki a wjelelětneje županki župy „Handrij Zejler“ Brigity Šramineje nawuknychu woni zakładne wopřijeća kaž tež rěčne wobroty a dóstachu dohlad do kultury, stawiznow a zakonjow Serbow. Z přepodaćom certifikatow so kurs dźensa wječor kónči.

„Chcu znajmjeńša zakładne znajomosće nawuknyć a ludźi serbsce witać a so z nimi rozžohnować chcyć“, měni Ina Züchner. 48lětna dźěła wot lońšeho jako managerka za kulturne a dźěćace młodźinske dźěło we Wojerowskej Kulturnej fabrice. W kursu zajimowaše so wona nimo rěče předewšěm za stawizny, kulturu a nabožinu Serbow. „Jako Kulturna fa­brika smy dwurěčne zarjadnišćo. Serb­šćina prosće k tomu słuša.“

Kaž Inje Züchner je tež Julianje Wünsche praktiske nałožowanje rěče wažne. 33lětna je muzejowa pedagogowka w Hórnikečanskej Energijowej fabrice. Narodźiła je so w Bukecach, hdźež ma swoje serbske korjenje. W septembru witaše­ wona w Energijowe fabrice 6. lětnik Budyskeje Serbskeje wyšeje šule. Nowa­ trajna wustajeńca ma po słowach Juliany Wünsche tež serbske wobsahi zapřijeć.­ Tohodla wona serbšćinu trjeba.

Podobnje dźe so Hansej-Christophej Gille. 52lětny je farar w ewangelskim cyrkwinskim wokrjesu šleska Hornja Łužica. Tuchwilu wón Wulkoždźarowsku a Kulowsku wosadu sobu zastaruje. Po tuchwilnym kursu chce swoje znajomosće serbšćiny dale rozšěrić a snano móže je pozdźišo tež na Božej słužbje nałožować.

„Mam před wšitkimi wobdźělnikami wulku česćownosć, dokelž su woni pilnje wuknyli a wjele prócy nałožowali“, praji Brigita Šramina. Kaž wona měni, bě tuchwilny kurs po dokładnosći a mnohostronskosći wobdźělnikow najintensiwniši. Po lětach 2010, 2011 a 2014 je jón čestnohamtska zamołwita za serbske naležnosće­ města Wojerec Gabriela Linakowa štwórty raz organizowała.

Wobdźělnicy pak njejsu jenož teoretisku wědu wo rěči, kulturje, organizacijach a aktualnych problemach do so srěbali, ale swoje znajomosće tež praktisce nałožować spytali. Mjez druhim po­da­chu so na ekskursiju. W Ralbicach rozłoži jim farar Šćěpan Delan wuznam tamnišeho kěrchowa, w Budyšinje wobhladachu sej studijo Serbskeho rozhłosa. Z dobyćerskim mytom 1 000 eurow za prěnje městno we wubědźowanju „Rěčam přichilena komuna“ financowaše město wučbny material a honorar za wučerku.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND