Wulke Ždźary. Cyrkej swjateje Borbory we Wulkich Zdźarach bě minjenu sobotu městno žiwych tradicijow a hudźbneje mnohotnosće. Slepjanski serbski folklorny ansambl je tam nalětni koncert wuhotował. Podpěrali su jón Załožba za serbski lud, Domowina a Syć za serbsku rěč a regionalnu identitu Zari.

W srjedźišću stejachu serbske dudy, z kotrymiž koncert zahajichu, po tym zo bě farar Christian Huth wopytowarjow serbsce a němsce witał. Zahrodnikec sotře Hanka a Martha kaž tež Holger Mä­ckelburg zahudźichu kruch „Dudy strowja“ a přeprosychu přitomnych z tym na lětuši 10. mjezynarodny festiwal dudakow wot 19. do 21. junija do Slepoho.