Konjecy (aha/SN). Wjesna rada Šunow-Konjecy je wšěch wobydlerjow na swoje wčerawše posedźenje do Konječanskeho towarstwoweho domu „Delany“ přeprosyła. Mjeztym dwě lěće wukonja Frank Šołta zamołwitu funkciju wjesneho předstejićerja. Po jeho słowach maja tam wjacore chutne naležnosće rozrisać, a to nanajspěšnišo.
Tak chcedźa zaručić, zo zwón na Konječanskej kapałce tež přichodnje trójce wob dźeń zwoni – rano w šesćich, připołdnju w dwanaćich a wječor w šesćich. Regina Šołćina na to skedźbni, zo čini so to wot lěta 1894, jako bu kapałka w nowogotiskim stilu ze swojim 20 kilogramow ćežkim zwonom wot biskopa Ludwiga Wahla poswjećena. Twar płaćeše tehdy něšto wjace hač 4 000 hriwnow. Swoju pod pomnikoškitom stejacu drohoćinku sej Konječenjo přewšo waža.
Jónu wob lěto ma zjawnosć składnosć, sej w Pančicach-Kukowje dźěłarnje swjateho Michała wobhladać. Wosebje w najnowšim času tam stajnje něšto noweho nazhonješ.
Pančicy-Kukow (JK/SN). Dźěłarnja swjateho Michała w Pančicach-Kukowje bě minjeny pjatk swoje wrota zajimcam zaso šěroko wotewrěła. Hosćo dźěłarnje sej najwšelakoriše zaběry zbrašenych wobhladachu a běchu sej po tym přezjedni, zo stej dźěło a kreatiwne tworjenje jara dobra móžnosć, zbrašenych zapřijeć do wužitneho skutkowanja. Widźomne a čujomne wjeselo a hordosć zaběranych zbrašenych stej wuraz wuspěšneje integracije a posrědkuja začuće, zo su zbrašeni na swoje wašnje zbožowni.
Škarakaj do jastwa
Budyšin. K jastwu dweju a poł lěta resp. třoch lět je Budyske hamtske sudnistwio wčera młodeju muži w starobje 21 lět zasudźiło. Wonaj běštaj w februaru při wohenju w bywšim hotelu „Husarenhof“ dźěło wohnjowych wobornikow myliłoj a so přikazam policije spřećiwjałoj. Do chłostanja zapřija sudnistwo dalše njeskutki, kaž padustwo a zranjenje ćěła.
Wuradźuja wo matematice
Drježdźany. Fachowcy ze wšitkich zwjazkowych krajow a Awstriskeje wuradźuja dźensa a jutře w Drježdźanach wo přichodźe maturitneho pruwowanja w matematice. W srjedźišću steji, kak móhło maturitne pruwowanje w matematice w lěće 2030 wupadać, informuje kultusowe ministerstwo. Zaměr je, nadawki po wšej Němskej dołhodobnje na samsnej runinje přibližić.
Hans-Joachim Wolfram njeboh
Z fotami Jürgena Maćija
Drježdźany. Pod hesłom „Pódla był – fotografije z NDRskeho časa“ wustajeja fotografojo Frank Höhler, Thomas Kläber, Georg Krause a Jürgen Maćij tuchwilu w rumnosćach přichodneho NDRskeho muzeja w Drježdźanskim Simmelowym nakupnišću na Albertowym naměsće. Hač do 14. januara je wustajeńca přistupna.
Maja nowu nawodnicu
Choćebuz. Uta Henšelowa stanje so z nowej nawodnicu Šule za delnjoserbsku rěč a kulturu w Choćebuzu. 1. februara wona nowe zastojnstwo nastupi, rozprawja delnjoserbski rozhłós RBB. Lubnjowčanka, kotraž skutkuje hišće jako regionalna rěčnica Domowiny w Delnjej Łužicy, přewozmje nawodnistwo kubłanišća wot Marje Elikowskeje-Winkleroweje, kiž so kónc lěta na wuměnk poda.
Telekom pruwuje nadpad
Berlin/Bonn. Po masiwnych hawarijach internetnych přizamkow Němskeje Telekom předewzaće pruwuje, hač móhło so wo nadpad hackerow zwonka předewzaća jednać. Wotpowědne pokiwy je Telekom wot fachowcow dóstała. Potrjechenych je něhdźe 900 000 internetnych routerow. To su nastroje, kotrež zmóžnjeja zwisk do interneta.
Konjecy (aha/SN). Wulce přiwabliwy swójbny swjedźeń bjez komerca bě sobotu mjeztym šeste adwentne popołdnjo na dworje Konječanskeho towarstwoweho domu „Delany“. Předsydka Domowinskeje skupiny Konjecy-Šunow Kerstin Mauwowa witaše na połnje wobsadźenej žurli wjace hač sto hosći, přewažnje swójby z dźěćimi, z Konjec a Šunowa, ale tež ze susodnych delanskich wsow.
Padušny porik lepił
Dobruša-Huska. 47lětny muž w Dobruši-Husce je sobotu dopołdnja padušny porik lepił a policiji přepodał. Jako wón nakupowane twory do domu donjese, steješe jeho pućowanska toboła pódla awta. 44lětna žona a 48lětny muž tobołu hrabnyštaj. Jako chcyštaj so wotsalić, jeju 47lětny lepi a zadźerža, doniž wobsadka policajskeho awta njepřijědźe.
W Pěskečanskim metal předźěłacym zawodźe Ziegler ma tež wjele Serbow swoje dźěłowe městno. Dokelž ma předewzaće dosć nadawkow, mysla tam na nowe produkciske hale.
Pěskecy (HS/SN). Lětuše předposlednje posedźenje Njebjelčanskeje gmejnskeje rady tele dny w Pěskečanskej wohnjowobornej gratowni je so runje na prawym městnje wotměło. Na dnjowym porjedźe stejachu mjez druhim nowe wuhotowanje wohnjowych wobornikow a plany za rozšěrjenje metal předźěłaceho zawoda Ziegler na bliskim přemysłownišću Při jězoru.