Budyšin (CK/SN). W juniju bě w Hornjej Łužicy 18 831 žonow a muži jako bjezdźěłnych registrowanych. To je 469 mjenje hač w meji a samo 1 674 mjenje hač w samsnym času loni. Dale woteběrała je bjezdźěłnosć w Hornjej Łužicy do­breje hospodarskeje konjunktury dla, ale tež sezonalnych přičin. „Wuwiće minjenych dźesać lět pokazuje, zo je so ličba bjezdźěłnych wo wjace hač społojčiła“, rjekny operatiwna jednaćelka Budyskeje agentury za dźěło Ilona Winge-Paul, jako wona aktualne ličby z dźěłowych wikow předstaji. Před dźesać lětami bě we wuchodnej Sakskej 45 224 ludźi bjez dźěła.

„Dokelž su knihi předewzaćelow połne nadawkow, je jich zwólniwosć wulka nowych sobudźěłaćerjow přistajić“, Ilona Winge-Paul rozłoži. Jeje sobudźěłaćerjo móža tuchwilu 4 561 swobodnych dźěłowych městnow sposrědkować. We wobłuku podźělneho dźěłoweho časa maja 1 078 městnow, w předźěłacym přemysle 895, a na polu strowotnistwa a hladanja starych ludźi 430. Runja zašłym měsacam pytaja w tychle branšach najwjace nowych při­stajenych.