Hamor (AK/SN). Hamorska gmejna registruje zwjeselace turistiske wuwiće. Tole podšmórny wjesnjanosta Achim Junker (CDU) wčera na posedźenju gmejnskeje rady. „W času wot januara do kónc julija 2016 je so w dwanaće registrowanych přenocowanskich městnosćach a stanowanišćach cyłkownje 5 848 hosći zapisało. Přirunujo z lońšim lětom je to stopnjowanje wo 29,3 procenty“, wjesnjanosta spokojny podšmórny.
Tuž móžachu při Bjerwałdskim jězoru lětsa w prěnim połlěće 18 589 přenocowanjow registrować. Loni bě to 12 609 a w lěće 2014 jenož 8 107 hosći. Wjele turistow je w minjenych měsacach turistisku informaciju „Bjerwałdski jězor“ při Hamorskim sewjernym přibrjóhu wopytało. Wot jeje wotewrjenja w aprylu 2014 naličichu 30 000 hosći z kraja a wukraja. Woni so přewažnje za jězor a wokolinu zajimowachu.
Woheń wulku škodu načinił
Berthelsdorf. W połnocy je z dotal njewuslědźeneje přičiny na Berthelsdorfskej přemysłowej přestrěni njedaloko Biskopic woheń wudyrił. 76 wohnjowych wobornikow gmejnskeje wohnjoweje wobory běchu na městnje, zo bychu płomjenja zhašeli. Po něhdźe štyrjoch hodźinach so jim to poradźi. Policija trochuje škodu na něhdźe 40 000 eurow.
W zawodomaj kradnyli
Porchow. Minjeny kónc tydźenja zadobychu so njeznaći w Porchowje do dweju zawodow na Šulskej dróze. Z prěnjeho objekta pokradnychu skućićeljo wjacore pakćiki kofeja, z druheho pak laptopaj, widejowu kameru a fotoaparat.
Rěčica (SN/mwe). Tuchwilu wobkedźbowany přirost torhanja skoćatow w pózdnim lěću a nazymu wotpowěduje typiskemu sezonalnemu mustrej. To měni Rěčičanski kontaktny běrow „Wjelči region Łužica“. „To je w Němskej runje tak znate kaž w dalšich europskich wjelčich kónčinach. Tuž dóńdźe zwjetša w tym času k najwjace torhanjam, štož zwisuje pozdaću ze zwyšenej potrjebu žratwy nimale hižo wurosćenych wjelčich šćenjow“, zdźěla běrow w nowinskej zdźělence. Zdobom wobkrući wón, zo su plahowarjo skotu w teritoriju Róžeńčanskeho wjelčeho stadła zašły tydźeń tři nadpady wjelkow na stadła wowcow přizjewili. „Sornjeća, jelenjowe ćelata a prosata dźiwich swini su mjeztym k spěšnje reagowacej dźiwinje wurostli a njedadźa so hižo tak lochko hrabnyć“, ma běrow za dalšu přičinu wjelčich nadpadow tež w Hornjej Łužicy. Skóržby a protesty poslednich nadpadow wjelkow dla w Konjecach a pola Ralbic do Rěčičanskeho kontaktneho běrowa dóšli njejsu, rěka wottam na naprašowanje Serbskich Nowin.
Transporter so přećisnył
Delnja Hórka. Njedaloko Delnjeje Hórki je wčera wodźer transportera na B 156 z dotal njeznatych přičin z dróhi zjěł a so z jězdźidłom na polu přećisnył. Dokelž běchu durje wuhorbjene a awto na boku ležeše, bě šofer w jězdźidle zatłusnjeny. Wohnjowi wobornicy jeho wuswobodźichu. Tež ambulantna słužba bě na městnje, njetrjebaše pak wulce pomhać.
Opel do štoma zrazył
Budyšin. W nocy na njedźelu dóńdźe w Budyšinje na Mužakowskej dróze k njezbožu. Wodźer Opela je naprawo z dróhi zjěł a prasny do štoma.
Jězdźidle do so zrazyłoj
Njebjelčicy. Na wobjězdowej dróze mjez Njebjelčicami a Protecami stej pjatk něhdźe w 15 hodź. jězdźidle frontalnje do so zrazyłoj. Wjacore wosoby so při tym zranichu. Jich dyrbjachu zastarać.
Tójšto wukubłanskich městnow
Drježdźany. Po cyłej Sakskej su hišće wjac hač 5 300 wukubłanskich městnow swobodne. To zdźěla agentura za dźěło. Zdobom pak wona zwěsća, zo hišće wjac hač 3 300 młodostnych wukubłanje pyta. Šansy tuž špatne njejsu, njewobstawaja-li wukubłanje pytacy na powołanju, kotrež chcyli rady nawuknyć.
Myto Hartej a Holmströmej
Stockholm. Nobelowe myto za hospodarstwo 2016 dóstanjetaj wědomostnikaj Oliver Hart a Bengt Holmström za jeju přinošk ke kontraktnej teoriji. Tole zdźěli dźensa kralowska-šwedska wědomostna akademija w Stockholmje. Tak su slědźenja jara drohotne nastupajo zrěčenskich strukturow. Kaž akademija hižo zašły pjatk wozjewi, spožča so lětuše měrowe myto kolumbiskemu prezidentej Juanej Manuelej Santosej.
Andrzej Wajda njeboh
Waršawa. Pólski dźiwadłowy a filmowy režiser Andrzej Wajda je wčera wječor w starobje 90 lět zemrěł. Komplikowane a dramatiske stawizny jeho pólskeje domizny běchu zakład swojeho dźěła a je charakterizowachu. Z jeho najmłódšim filmom „Powidoki“ chce so Pólska wo wuznamjenjenje Oscara powabić.
Budyšin (SN/MWj). By-li Karlheinz Domaschk minjenu njedźelu na prezentaciji starych traktorow na Bóščanskim rybarskim swjedźenju wobdźěleny był, bychu wopytowarjo jeho traktor najskerje wosebje wobdźiwali. Budyšan wobsedźi traktor typa Lanz z lěta 1923. Jězdźidła z toho časa dźensa lědma hišće něhdźe wuhladaš, tak zo smě so Domaschk hordźić, zo drje ma prawdźepodobnje jedyn z najstaršich traktorow tohole typa cyłeje Hornjeje Łužicy.