Policija (12.10.17)
Hižo dopołdnja wopity
Połčnica. Jako zastojnicy patrulje Kamjenskeho policajskeho rewěra w Połčnicy na Kamjenskej dróze wutoru dopołdnja wodźerja Forda kontrolowachu, za alkoholom „ćehnješe“. Po tesće so wukopa, zo měješe 63lětny 1,02 promilej alkohola w kreji. Měło so tole wobkrućić, wočakujetej wopiteho pjenježna pokuta 500 eurow a dypkaj w centralnym registrje w Flensburgu.
Popjeroweho pryskarja lepili
Běła Woda. W Běłej Wodźe je patrulja městneho policajskeho rewěra wčera w nocy 33lětneho na Karla-Marxowej dróze kontrolowała. W nachribjetniku młodeho muža nadeńdźechu stražnicy teleskopowe pradło a popjerowy spray. Z dokładnišeho přepytowanja wuchadźa, zo je kontrolowany spray před někotrymi tydźenjemi při padustwje wužiwał.
Wuměłstwo w chorowni
Wojerecy (SN/mwe). Hač do 7. nowembra su pod titulom „Fabulieren in Farbe“ ilustracije a rysowanki zemrěteho Mišnjanskeho wuměłca Lothara Sella w geriatriskej dnjowej klinice Łužiskeho jězorinoweho klinikuma wustajene. Kaž nam dźensa z jednaćelstwa chorownje zdźělichu, je ekspozicija tójšto připóznaća dóstała. Nimo pacientow a wopytowarjow chorownje bě sej ju tež tójšto wobydlerjow města a wokoliny wobhladało. „Dźensa sej zajimc mólbu kupi“, rěkaše. Geriatriska dnjowa klinika w přizemju, blisko hłowneho zachoda klinikuma, je wotydźenja wot 9 do 16 hodź. spřistupna.
Torhošćo bórze přetworjene
Najprjedy zrěčenje
Trjebin (AK/SN). Při dalewjedźenju planow Wochožanskeje wuhloweje jamy měli so w kóždym padźe naležnosće wobydlerjow Miłoraza wobkedźbować. K tomu je na posedźenju Trjebinskeje gmejnskeje rady wčera wječor wjetšina radźićelow přihłosowała. Brunicowy plan měł so hakle potom schwalić, předleži-li za Miłoraz podpisane přesydlenske zrěčenje, kotrež hodźi so juristisce tež wobskoržić. Přesydlenje měło socialnje znjesliwe a zawěsćene być a so po móžnosći tak zahe kaž móžno zeskutkownić.
Za to widźi gmejnska rada wjacore přičiny. Wobydlerjo dźěla Miłoraza dyrbja so tak a tak přesydlić. Tak to w lěće 1994 wobzamknjeny brunicowy plan předwidźi. „Někotři su hižo ležownosće kupili a chcedźa klětu w nalěću z twarom domskeho započeć. Swójby so při tym rozdrěja“, w stejnišću gmejnskeje rady rěka. Potrjecheni wobydlerjo maja dźěl Miłorazskeje wjesneje zhromadnosće wostać. A to w nowym zhromadnym sydlišću z tamnymi Miłoraženjemi.
Malešy a Kubšicy zhromadnje
Je tomu prěni króć, zo twarja w Budyskim wokrjesu nadkomunalny wohnjowoborny depot. To rěka, zo budźetej tón dwě gmejnje přichodnje zhromadnje wužiwać a wudźeržować.
Budyšink (CS/SN). W Budyšinku nastawa twarjenje, w kotrymž změjetej Přiwčanska a wohnjowa wobora z Budyšinka – Malešanska gmejna – kaž tež wohnjowa wobora z Poršic – gmejna Kubšicy – zhromadnje swój domicil. Tuž so komunje z Malešec a Kubšic tež ruku w ruce wo to staratej, zo budu wšitke hašenske a dalše nastroje přeco w najlěpšim stawje a změjetej wudźeržowanje depota zhromadnje w horšći.
Z tejele přičiny staj Malešanski wjesnjanosta Matthias Seidel (CDU) a jeho kolega Olaf Reichert (njestronjan) z Kubšic wutoru w Budyšinku zakładny kamjeń połožiłoj. Nowy depot dyrbja twarić, dokelž je wulka woda w lětomaj 2010 a 2013 na twarjenomaj w Budyšinku a Přiwćicach wulku škodu načiniła. Dźakowano stoprocentnym spěchowanskim srědkam z fondsa za wotstronjenje škodow wulkeje wody móža nětko zhromadnje wužiwajomny skład na wěstym městnje w Budyšinku natwarić. Depot budźe wot wšěch třoch woborow přeco derje docpějomny.
W Budyskim Kamjentnym domje nazwučuje 30 młodych hudźbnikow a ...
Měšćanske partnerstwa znowa wobkrućene
Dreux/Budyšin (CS/SN). Składnostnje 25. róčnicy załoženja měšćanskeho partnerstwa poda so delegacija z Budyšina wot 5. do 8. oktobra do francoskeho Dreuxa. Skupina 40 ludźi wobsteješe nimo čłonow partnerskeho towarstwa z hudźbnych šulerjow, wuměłcow, keramikarkow a šachownikow. Nimo toho běchu zastupjerjo z Wulkeje Britaniskeje a Burkina Faso z hosćom. Jendźelske město Evesham swjeći lětsa 40 a afriske Koudougou hižo 45 lět přećelstwa a kooperacije z Dreuxom.
We wobłuku wulkeho swjedźenja su sobotu partnerske zrěčenja znowa wobkrućili. Budyski wyši měšćanosta Alexander Ahrens (SPD), kiž bě sej podawka dla wosebje do centralneho regiona Loiry dolećał, zahori z jimacej a bjez manuskripta swobodnje přednošowanej narěču w perfektnej francošćinje. Nimo njeho podpisa dokument tež předsyda partnerskeho towarstwa Tomasz Nawka.
Sněhowe kulki
Krótkopowěsće (12.10.17)
Spěchuja zawodne pěstowarnje
Drježdźany. Swobodny stat Sakska chce klětu zawodne pěstowarnje we wysokosći 400 000 eurow spěchować. Z toho zapłaćić hodźi so nowozarjadowanje pěstowarnje abo zawěsćenje hižo wobstejacych pěstowarskich městnow. Wo podpěru prosyć móža zajimcy hač do 30. nowembra w Sakskim komunalnym socialnym zwjazku w Kamjenicy.
Lěkar nuznje pytany
Bóšicy. Lěkarja za powšitkownu medicinu pytaja nuznje w Bóšičanskej gmejnje. Kaž zdźěli Serbski rozhłós dyrbješe dotalna medicinarka ze strowotnych přičin přestać. Wobydlerjam gmejny by hižo pomhane było, by-li nowy lěkar dwaj dnjej wob tydźeń w komunje praktikował. Gmejna by jemu samo rumnosće bjez podruže přewostajiła, rjekny k tomu Bóšičanski wjesnjanosta Stanij Ryćer.
Jasnje wjac wučomnikow
Zahrodku na bližacu so zymu spřihotować
Z prěnimi sylnymi wichorami, dešćom a spadowacymi temperaturami so nětko w oktobrje lěto kćěwa a rósta w zahrodce kónči. Pola nas doma to rěka, zo poslednje tomaty wotžnějemy a tomatowe rostliny zwućahamy. Naše paprikowe rostliny hišće někotre skromne płody njesu, tola při prěnim zmjerzku budu tež tu žně doskónčnje nimo. Łopješka kuchinskich zelow kaž lubčika (Liebstöckel) a citronoweje melisy nětko wšitke zešćipam, je w ćopłej stwě na blachu sušu a do škleńcow pjelnju. Z lubčikom w zymje rady poliwki a mjasowe pojědźe posłodźu a z citronoweje melisy warju słódny čaj.
Twarja nowu šulu
Slepo (AK/SN). W Slepom su tele dny z twarom noweho němsko-serbskeho šulskeho centruma započeli. „4. oktobra bě zahajenje hrubeho twara. Tuchwilu wukonjeja twarscy dźěłaćerjo hłubokotwarske naprawy za fundamenty“, Steffen Seidlich, nawoda zarjada za planowanje, twar, hórnistwo a Slepjanskeho zarjadniskeho zhromadźenstwa, wčera na posedźenju gmejnskeje rady w Slepom podšmórny. Dalše wupisanja tam tučasnje přihotuja.
Mjez druhim dźe wo róštytwar a wo wotwodźenje dešća. Aktualny staw je planowanski běrow 25. septembra předstajił. W jednotliwym nastupa to tepjenje, přewětrjenje, sanitarny wobłuk, sylno- a słaboprud kaž tež elektriku.
