Hižo lětdźesatki je z tradiciju, zo přeproša gmejna Ralbicy-Róžant swojich wuměnkarjow na adwentničku do Šunowskeje Fabrikskeje hospody.
Šunow (aha/SN). Něhdźe 150 wuměnkarjow – žony starše hač 60 lět a mužojo starši hač 65 lět – je zawčerawšim na swoju adwentničku do Šunowa přichwatało. Woni sej wulce chwalachu, zo gmejna Ralbicy-Róžant kóžde lěto tak wulkomyslnje na staršu generaciju dźiwa.
83lětny Pawoł Rachel, sobu najstarši serbski hajnik, rjekny, zo jako rentnar přeprošenje na dohodowne zarjadowanje stajnje rady sćěhuje. „Lětuša adwentnička w tak lóštnej atmosferje mje wosebje wokřewja“, wón měnješe. Pódla njeho za blidom sedźeše Monika Hajnkowa jedna z najmłódšich w kruhu seniorow. „Sym prěni raz w tymle kruhu. Mam to za prawe hódnoćenje dźěła staršeje generacije.“
Wjesnjanosta Hubertus Ryćer (CDU) naliči a hódnoćeše najwšelakoriše aktiwity na dobro ludźi we wšěch wjesnych dźělach gmejny. Po jeho słowach je w gmejnje tuchwilu 1 711 wobydlerjow. W minjenych dwanaće měsacach je wosom wosobow zemrěło, w samsnym času so 16 dźěći narodźi.