Rjany nalětni swjedźeń w parku

póndźela, 16. apryla 2018
artikl hódnoćić
(0 )
Šefzahrodnikarka Simone Dietrich (nalěwo) je wopytowarjow wčera na němsko-pólskim swójbnym a nalětnim dnju po Wochožanskim parku błudźenkow wodźiła. 56lětna skutkuje mjeztym jědnaće lět w tutym jónkrótnym arealu. Foto: Martina Arlt Šefzahrodnikarka Simone Dietrich (nalěwo) je wopytowarjow wčera na němsko-pólskim swójbnym a nalětnim dnju po Wochožanskim parku błudźenkow wodźiła. 56lětna skutkuje mjeztym jědnaće lět w tutym jónkrótnym arealu. Foto: Martina Arlt

Prěni króć wotmě so wčera we Wochožanskim parku błudźenkow němsko-pólski nalětni swjedźeń. Mnozy běchu sej při rjanym słónčnym wjedrje z kolesom na swójbne zarjadowanje dojěli.

Wochozy (FAG/SN). „Što so pola našich susodow stawa?“ Tute prašenje steješe w srjedźišću prěnjeho dnja susodow, na kotrymž so wuměłcy, zahrodnikarjo, hosćencarjo a wuhotowarjo parkow z Němskeje a Pólskeje wčera wot 11 do 17 hodź. we Wochožanskim parku błudźenkow zetkachu. Předsyda towarstwa daloko znateho a přewšo woblubowaneho areala Ulrich Klinkert a Klaus Tschöke z jednaćelstwa ze swojimi sobudźěłaćerjemi k startej do nalěća přeprosyštaj. Přistajeni parka błudźenkow kaž tež klóšterskeje zahrody z Pančic-Kukowa sta hosćom tež z Pólskeje wo swojim skutkowanju rozprawjachu. We wopytowarskim centrumje parki a zahrody mjezynarodneje „zahrodoweje kulturneje šćežki wobeju stron Nysy“ předstajichu. Rady stej zahrodnikarce Simone Dietrich a Anita Schwitalla hosći po pućikach cyłkownje 20 hektarow wulkeho parka wodźiłoj.

Klawn Rafi Rufi z Pólskeje móžeše ze swojimi tryskami wosebje dźěći putać. Tohorunja pólska kapała Cocotier publikum zahori. Holcy a hólcy mějachu wosebje při rysowanskim wubědźowanju „błudźenki w parku“ swoje wjeselo. Kupowali su wopytowarjo kwětki a pikěrowane rostliny. Rady dachu sej mnozy tež kulinariske speciality wobeju krajow zesłodźeć. Tohorunja jězby z korejtu krasnu a słónčnu njedźelu wobohaćichu. Wochožanski park błudźenkow je najwjetša kamjentna zahroda Europy. Park je z wjace hač 7 000 błudźenkami prawdźepo- dobnje molersce wuhotowany zahrodowy swět. Wopytawši Łužisku jězorinu je mnohim turistam tutón areal sobu prěnja adresa. Derje, zo pokazaja jim při zachodźe tež ze serbskim napismom, zo je tu słowjanski lud žiwy.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND