„Serbja, žonop a Silbermond“

wutora, 06. měrca 2018
artikl hódnoćić
(0 )

Město Budyšin proces wuwića hač do lěta 2030 oficialnje zahajiło

Budyšin (SN/mwe). „Kak dale z Budyšinom, a to znajmjeńša hač do lěta 2030?“ Tute prašenje steješe wčera w fokusu nowinarskeje konferency. Wyši měšćanosta Alexander Ahrens (SPD) bě žurnalistow na rozmołwu přeprosył. Wšako je Budyšin oficialnje zjawny proces k zdźěłanju wusměrjenja do přichoda zahajił. „Wobraz přichoda je směrnica za wuwiće města“, Ahrens nowinarjow witaše. „Tomu drje kóždy přihłosuje, wšako dźe wo faktor derjeměća.“ Wyši měšćanosta rysowaše situaciju, zo je wot lěta 2005 wjele ludźi město dźěła a druhich přičin dla wopušćiło. Mnozy pak so zaso nawróćeja a tež na wokolnych wsach swoju domi­znu nadeńdu. Ličba porodow stupa. Z tysac ludźi ma něhdźe 670 dźěło. Přede­wzaća nadźěłuja dobre wobroty, a wšědnje jězdźi něhdźe 19 000 ludźi z wokoliny do města na dźěło. ­K identiće Budyšina słušeja Serbja, jich stawizny a žiwjenje dźensa. „Žiwej stej tu dwaj ludaj“, rěkaše.

Nětko přewjedu so k „wobrazej přichoda 2030 plus“ tematiske zarjadowanja. 21. měrca je tema „identita“. Něhdźe sto prošenych akterow ze wšelakich towaršnostnych worštow chce sej tam pod hesłom „Serbja, žonop a Silbermond“ nazhonjenja wuměnjeć. Prašenje rěka: „Što smy a što nas wučinja?“ Skupina, wobstejaca z měšćanskich radźićelow, wyšeho měšćanosty a wobeju měšćanostow, ma z temowych namjetow přednaćisk zdźěłać. Wo nim chcedźa wot junija hač do kónca lěta na cyłkownje wosom zjawnych tematiskich forumach diskutować. 4. apryla steja pod hesłom „Mnohostronske město“ tež Serbja a jich naležnosće w srjedźišću.

Hižo loni w nowembru su so něhdźe 280 Budyskich towarstwow za jich měnjenjom prašeli. Něhdźe 50 je so dotal přizjewiło. Towarstwa widźa Budyšin jako stolicu Serbow a jako hospodarski, duchownokulturny a towaršnostny centrum regiona. Konkretnje pak sej mnozy wjace aktraktiwity za młodych ludźi žadaja. K tomu tež słuša, zarjadować komunalny dom towarstow. Měnjena njeje „Króna“. Nic naposledk chcedźa so hubjenemu imagej města wobarać.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND